Dios zaquiiñeʼ Mesías para gulá laanu
«Cásica rati irá binni purti za de Adán la? zaqueca zabani irá cani aca né Cristu tobi si.» (1 COR. 15:22)
1, 2. 1) Xi biʼniʼ Andrés ne Felipe ora bidxélacaʼ Mesías. 2) Xiñee rininu jma nápanu razón para guni crenu Jesús nga Mesías que ca primé discípulo stibe.
ANDRÉS nanna dxichi Jesús de Nazaret nga binni ni gulí Dios. Ngue runi gúdxibe Pedru bíʼchibe: «Ma bidxela du Mesías». Zaqueca bizaaca Felipe, laaca biʼniʼ cré maʼ bidxela Mesías, ngue runi yeyúbibe xhamígube Natanael para gábibe laa: «Ma bidxela du dxa hombre de ni bicaa Moisés lu guiʼchi ra cá ca ley ne ni bizeete ca profeta que, ne laabe nga Jesús xiiñi José de Nazaret» (Juan 1:40, 41, 45).
2 Lii yaʼ, ñee laaca runi creluʼ de guidubi ladxidoʼloʼ Jesús ni nexheʼ gueeda que nga «Xaíque ni Zaniruʼ ni chigulá» laanu la? (Heb. 2:10.) Ca dxi stinu riʼ nápanu stale razón para guni crenu ni que ca primé discípulo stiʼ Jesús ni bibani lu primé siglu que. Pur guiráʼ ca relatu ni zeeda lu Biblia, nánnanu dede dxi gule Jesús hasta dxi biasa de lade gueʼtuʼ bisihuinni laa nga Cristu o Mesías (biindaʼ Juan 20:30, 31). Stiidxaʼ Dios na qué zusaana de gaca Jesús Mesías guibáʼ (Juan 6:40; biindaʼ 1 Corintios 15:22). Nga runi, pur guiráʼ ni maʼ huazíʼdinu de lu Biblia zanda guininu «ma bidxela [n]u Mesías». Primeru guidúʼyanu ximodo gunna ca primé discípulo que Jesús nga Mesías.
Chaahuiʼ chaahuiʼ bihuinni cani qué nuluíʼ Dios binni de Mesías
3, 4. 1) Ximodo gunna ca primé discípulo que Jesús nga Mesías. 2) Xiñee zanda guininu luguiáʼ si Jesús guca ni na guiráʼ ca diidxaʼ riguixhená ni caníʼ de Mesías que.
3 Xiñee gunna ca primé xpinni Jesús que laa nga Mesías que yaʼ. Purtiʼ Jiobá biquiiñeʼ cani riguixhená stiʼ para guniʼcaʼ ximodo zanda gunibiaʼcaʼ laabe. Ti hombre ni nabé biindaʼ Biblia biquiiñeʼ ti ejemplu stiʼ ti estatua de mármol para gusiéneni. Laabe guniʼbe bidagulisaa caadxi hombre ni qué runibiáʼsaacaʼ ndaaniʼ ti yoo ne cada tobi de laacaʼ zinecaʼ ti ndaa de estatua que. Pa ora uquiidicabe cada ndaa ni zinécabe que guihuinni ti estatua ni, xi niníʼ íquenu yaʼ. Niníʼ íquenu guyuu tuuxa ni gundaa ni ne biseendaʼ ca ndaa que ra nuu cada tobi de ca binni que. Ngaca nga ni zanda guininu de ca diidxaʼ riguixhená ni caníʼ de Mesías que, zeeda gácacani casi ca ndaa stiʼ estatua que: cada tobi de laacani biluíʼcani ximodo zanda gunibiáʼ binni Mesías.
4 Ñee raʼbuʼ zanda gueeda gaca ni na guiráʼ ca diidxaʼ riguixhená ca luguiáʼ ti binni ni cadi naca Mesías la? Qué zanda diʼ. Ti hombre ni biindaʼ modo bibani Jesús guníʼ: «Nagana gueeda gaca ni na guiráʼ ca diidxaʼ riguixhená ca lu luguiáʼ tutiica binni [pa cadi Jesús ni]». Óraque biluxe guníʼ hombre que: «De lu guiráʼ tu huabani lu Guidxilayú, luguiáʼ si Jesús» guca ni na guiráʼ ca diidxaʼ riguixhená ni caníʼ de Mesías que.
5, 6. 1) Ximodo zusabanáʼ Jiobá Binidxabaʼ. 2) Ximodo bisihuinni Jiobá tu de gueeda binni «ni za de gunaa» que.
5 Ca diidxaʼ riguixhená ni caníʼ de Mesías que cuzeetecani de cani «qué niná [Dios] nuluíʼ» dxiqué (Col. 1:26, 27; Gén. 3:15). Lu cani qué niná Jiobá nuluíʼ dxiqué zeeda stale cosa risaca para cani nuu guibáʼ ne cani nuu lu Guidxilayú. Tobi de laacani nga ra guiabanáʼ «beenda yooxho», o Binidxabaʼ, purtiʼ pur laa guyuu binni lu naʼ donda ne guendaguti (Apo. 12:9). Ximodo zusabanáʼ Jiobá laabe yaʼ. Jiobá guníʼ zeeda tobi ni za de ti gunaa ne laa zucaache ique beendaʼ ca, o zunitilube Binidxabaʼ, purtiʼ pur laa cucaalú binni Dios, raca huaracaʼ ne ráticaʼ. Peru ante gaca nga, Dios zudii lugar guniná Binidxabaʼ xatini ñee «ni za de gunaa» que.
6 Chaahuiʼ chaahuiʼ gúnnacabe tuu nga binni «ni za de gunaa» que. Primeru gudxi Jiobá ca diidxaʼ riʼ Abrahán: «Pur ni za de lii zaguaa ndaayaʼ guiráʼ guidxi ni nuu lu guidxilayú riʼ» (Gén. 22:18). Gudiʼdiʼ si iza, Moisés guníʼ ni za de gunaa que nga ti ni riguixhená, ti binni ni jma risaca que laa (Deu. 18:18, 19). Despué gudxi Dios David zeeda Mesías que de lade ca binnilídxibe, laa zabí lu trono stibe ne qué zusaana de guni mandar ne laaca zacaca guníʼ cani riguixhená que ni despué (2 Sam. 7:12, 16; Jer. 23:5, 6).
Ximodo nánnanu Jesús nga Mesías
7. Ximodo nga beeda Jesús de «gunaa» stiʼ Jiobá.
7 Binni ni bieeteʼ gueeda que, zeedabe de ti «gunaa» ne gunaa ca nga zeeda gaca guiráʼ ca ángel ni cayuni ni na Jiobá. Tobi lucha Xiiñiʼ Dios, primé binni de espíritu ni bizáʼ, bisaana dxiiñaʼ risaca stiʼ para gueeda gale casi ti hombre ni qué ruchee (Fili. 2:5-7; Juan 1:14). Jesús gunda bireechube para Dios ne beeda gácabe «Xiiñi Dios», purtiʼ gupa espíritu santu jñaabe María (Luc. 1:35).
8. Xi diidxaʼ riguixhená guca ni na luguiáʼ Jesús ora guyé ra nuu Juan para chúʼnisa.
8 Ca diidxaʼ riguixhená que nacaʼ zeeda Mesías que de Belén, ne raquepeʼ nga gule Jesús (Miq. 5:2). Peru laaca biluíʼcani padxí guihuínnibe. Ngue runi, lu primé siglu que stale de ca judíu que maʼ nuucaʼ gánnacaʼ padxipeʼ gueedabe, purtiʼ nánnacaʼ mayaca gueedabe. Ne ora bíʼyacabe Juan ni Riguunisa, gunabadiidxacabe laca laacabe: Ñee «laabe nga Cristu» la? Peru Juan bicabi laacabe: «Nanda stobi naa jma nandxóʼ que naa» (Luc. 3:15, 16). Dxi napa Jesús 30 iza, guyebe ra nuu Juan para cúʼnisa laabe. Para ca dxi que maʼ caluxe ca últimu beeu stiʼ iza 29, iza bieeteʼ zahuinni Mesías que (Dan. 9:25). Dxi que bizulú bicheechebe diidxaʼ ne guniʼbe: «Ma bidxiña dxi gudixhe Dios guni mandar, ne ma chi aca ni» (Mar. 1:14, 15).
9. Neca qué ganna chaahuiʼ ca discípulo que stale cosa de Mesías, xi biʼniʼ crécabe.
9 Peru qué zaca guiráʼ ni cabézacabe guni Mesías que. Neca guníʼ ca binni que laabe nga rey sticaʼ, peru despué beeda guiénecaʼ cadi ca dxi que nga chiguni mandarbe, sínuque zúnibe ni guibáʼ ne zácani despué (Juan 12:12-16; 16:12, 13; Hech. 2:32-36). Peru ora gunabadiidxaʼ Jesús ca discípulo stiʼ: «Laatu yaʼ. Tu rabi tu naa», oraqueca bicabi Pedru: «Lii nga Cristu, Xiiñi Dios ni nabani» (Mat. 16:13-16). Ne zaqueca guníʼ Pedru dxi bidxiichiné stale binni Jesús pur cani bisiidiʼ (biindaʼ Juan 6:68, 69).
Naquiiñeʼ gucaadiágacabe Mesías que
10. Xiñee biʼniʼ mandar Jiobá gucaadiágacabe Xiiñiʼ.
10 Dxi guyuu tobi lucha Xiiñiʼ Dios guibáʼ gupa stale poder. Ne dxi beedabe lu Guidxilayú riʼ laabe guniʼbe pur Bixhózebe (Juan 16:27, 28). Ngue runi guniʼbe: «Cadi naa diaʼ gudixhe ni rusiideʼ, sínuque rusiide ni gudixhe ni biseenda naa» (Juan 7:16). Ne dxi bidxaa modo bihuinni Jesús, Jiobá peʼ guníʼ laabe nga binni ni gulí, ne biʼniʼ mandar: «Laucaa diaga» laabe (Luc. 9:35). Naquiiñeʼ gucaadiaga ca discípulo que laabe o guzuubacaʼ stiidxabe. Laaca naquiiñeʼ gápacaʼ fe laabe ne gúnicaʼ cosa galán para xcaadxi binni, purtiʼ zacatiʼ nga zusiéchecaʼ Jiobá ne zacaacaʼ ti guendanabani ni qué zaluxe (Juan 3:16, 35, 36).
11, 12. 1) Xiñee qué ñuni cré stale de ca judíu ni bibani ca dxi stiʼ Jesús que laabe nga Mesías. 2) Tu laa biʼniʼ cré laabe.
11 Stale cosa bisihuinni Jesús nga Mesías que, peru stale de ca judíu ni bibani dxiqué qué ninacaʼ ñuni crecaʼ laabe. Xiñee yaʼ. Purtiʼ biʼniʼ Jesús gadxé de cani cabézacabe guni. Primé la? cabézacabe ti binni ni gulá laacabe de lu naʼ ca binni de Roma (biindaʼ Juan 12:34). Peru ca diidxaʼ riguixhená que bizeetecani zácabe ti hombre ni zúnicabe menu laa ne guirutiʼ tu zaná gucaadiaga laabe ne zánnabe xii nga guendahuará, yuubaʼ ne dede zuuticabe laabe. ¡Ngue runi qué ñuni crécabe pa laabe nga Mesías! (Isa. 53:3, 5.) Ne chupa chonna de ca discípulo stiʼ Jesús guyuucaʼ triste ora biiyacaʼ qué nulabe guidxi Israel. Peru qué ninacaʼ nusaanacaʼ de ñúnicaʼ ni nabe ne despué biénecabe xiñee qué ñúnibe ni (Luc. 24:21).
12 Ne laaca guyuu stale tu bidxiideche Jesús purtiʼ nácabe nagana guni binni cani cusiidibe que. Para guni mandarnécabe Jesús lu Reinu stiʼ naquiiñeʼ gusiaandacabe laca laacabe, gócabe beela ne guécabe rini stiʼ Cristu, gálecabe sti tiru ne cadi gúnicaʼ ni runi binni guidxilayú (Mar. 8:34; Juan 3:3; 6:53; 17:14, 16). Para ca ricu, cani rudxiibaʼ laca laa ne cani riníʼ si ti cosa ne qué runi ni, nabé stale nga ni canabaʼ Jesús laacaʼ. Peru xcaadxi judíu ni qué nudxiibaʼ laca laa qué ñaca nagana para laacaʼ ñuni crecaʼ laabe ngue Mesías que. Ne zaqueca bizaaca caadxi samaritanu, purtiʼ guniʼcaʼ: «Nanna dxichi du laabe nga ni zeda ulá binni guidxilayú» (Juan 4:25, 26, 41, 42; 7:31).
13. Xi bizaaca Jesús ni zeeda gaca casi ñacaná xatini ñeebe.
13 Maca guníʼ Jesús dede ante zaguixhe ca xaíque stiʼ cani ruzaaquiʼ guʼxhuʼ que gátibe, cani cadi judíu que zucaacaʼ laabe lu ti yaga ne ziásabe de lade gueʼtuʼ lu chonna gubidxa (Mat. 20:17-19). Ora guniʼbe nezalú Sanedrín laabe nga «Cristu», «Xiiñi Dios» la? ca judíu que guniʼcaʼ caniʼbe mal de Dios (Mat. 26:63-66). Ne dxi yenécabe laabe ra nuu Pilatu, laa bidii cuenta «qué huayuni be gasti para gati be», peru cumu ca judíu que laaca guniʼcaʼ cucaalube gobiernu sticaʼ la? bisaanabe Jesús lu nacaʼ (Luc. 23:13-15, 25). Laacabe bidxiidéchecabe Jesús, «ni rudii enda nabani» ne biyúbicabe modo guuticabe laabe, neca guyuu stale prueba ni bisihuinni laabe nga ni biseendaʼ Dios (Hech. 3:13-15). Ne casi maca bieeteʼ que, bicaacabe laabe lu ti yaga ne luni gútibe dxi cayaca saa Pascua, iza 33 (Dan. 9:26, 27; Hech. 2:22, 23). Nabé naná modo gútibe ne zeeda gácani casi ñacaná xatini ñee binni ni rieeteʼ lu Génesis 3:15 que.
Xiñee naquiiñeʼ gati Mesías que
14, 15. 1) Xi chupa razón gupa Jiobá para bidii lugar guti Jesús. 2) Xi biʼniʼ Jesús biasa si de lade gueʼtuʼ.
14 Jiobá bidii lugar gati Xiiñiʼ pur chupa razón nabé risaca. Primé la? para gusihuínnibe tobi de ca cosa risaca ni qué nuluiʼbe binni dxiqué. Ra qué nuchee Jesús dede ora guti, bisihuinni zanda guni ti hombre ni qué ñalené donda ni na Dios. Ne laaca zanda gusihuinni napa Jiobá derechu de guni mandar, neca gacaná ra gutiidiʼ Binidxabaʼ laa lu guendanagana jma naroʼbaʼ (1 Tim. 3:16). Guiropa razón ca bisihuinni Jesús ni ora guníʼ: «Naa nga Hombre Biseenda Dios ne benda [...] para udiee xpida para ilá stale binni» (Mat. 20:28). Casi maʼ bidúʼyanu ca, gupa xidé bidii Jesús xquendanabani para quixe saca guilanu de lu naʼ guendaruchee ni bisaanané Adán laanu. Ni bíʼnibe ca laaca zacané laanu guicaanu guendanabani ni qué zaluxe pa guidúʼyanu Jesús casi ni caquiiñeʼ Dios para gulá laanu (1 Tim. 2:5, 6).
15 Chonna gubidxa despué, biasa Jesús de lade gueʼtuʼ ne lu cuarenta dxi bihuínnibe nezalú ca discípulo stibe, para gánnacaʼ maʼ bibánibe ne para gudiibe laacaʼ xcaadxi dxiiñaʼ gúnicaʼ (Hech. 1:3-5). Despué guyebe guibáʼ ti guluiʼbe Jiobá pabiáʼ risaca rini bixhiibe. Ne neca gupa xidé gulézabe para bizulú biʼniʼ mandarbe lu Reinu stibe, peru qué nusaana de ñúnibe dxiiñaʼ biaʼ tiempu gulézabe que.
Mayaca guiluxe dxiiñaʼ stiʼ Mesías
16, 17. Xi dxiiñaʼ biʼniʼ Jesús guyuu si guibáʼ.
16 Maʼ gudiʼdiʼ gayuaa iza de biasa Jesús de lade gueʼtuʼ, ne biaʼ tiempu ni maʼ gudiʼdiʼ ca cayuuyabe ximodo cayaca dxiiñaʼ ndaaniʼ ca neza binni ridagulisaa ca ne cayuni mandarbe cani (Col. 1:13). Peru bidxiña dxi ni maca nexheʼ para cuibe casi Rey lu Reinu stiʼ Dios. Ca diidxaʼ riguixhená zeeda lu Biblia ne guiráʼ ni cazaaca lu guidxilayú riʼ, cusihuínnicani guribe casi Rey lu iza 1914 ne laaca mayaca «iluxe guidx[i]layú riʼ» (Mat. 24:3; Apo. 11:15). Qué nindaa de ngue, Jesús ne ca ángel stiʼ guleecabe Binidxabaʼ ne ca demonio stiʼ de guibáʼ (Apo. 12:7-10).
17 Lu iza 29 bizulú Jesús bicheeche diidxaʼ ne bisiidiʼ binni, peru dxiiñaʼ ca mayaca guiluxe ni. Maʼ qué zandaa zuni juzgarbe guiráʼ binni nabeza lu guidxilayú. Ca binni nachaʼhuiʼ ni nanna Jesús nga bilá laacaʼ zaca invitarcaʼ para guicaacaʼ guidxilayú ni «maʼ nexhe chaahui para [laacaʼ] dede ante cha guidxilayú» (Mat. 25:31-34, 41). Peru guiráʼ cani gudxiideche Jesús zanitilucaʼ ora iquiiñebe ca ángel stibe para cueecaʼ guiráʼ ca cosa malu cayaca lu guidxilayú riʼ. Gaca si nga zundiibi Jesús Binidxabaʼ ne zusábabe laa ne ca demonio stiʼ ndaaniʼ ti «bizé» roʼ (Apo. 19:11-14; 20:1-3).
18, 19. Xi zuni Mesías, ne xi zabeendú binni ni guzuubaʼ stiidxabe de cani chigúnibe.
18 Ora maʼ guni mandar Jesús lu ti mil iza, zusihuínnibe ca título ni nápabe, casi «Ni jma nanna gudii conseju, Dios ni napa poder, Bixhózenu ne qué zusaana de gácabe ni, Príncipe ni rudii Guendariuudxi» (Isa. 9:6, 7). Dxi maʼ guni mandarbe, guiráʼ binni guidxilayú zácacaʼ binni ni qué ruchee dede ne cani guiasa de lade gueʼtuʼ (Juan 5:26-29). Mesías ca ziné ca binni ni guzuubaʼ diidxaʼ «ra candani nisa rudii enda nabani», ne zacané nga laacabe chúʼcabe galán ne Jiobá (biindaʼ Apocalipsis 7:16, 17). Peru Jesús zucaache ique beendaʼ que para gati ne despué de guihuinni tu guiráʼ qué zudxiideche Jiobá zusábabe Binidxabaʼ ne ca demonio stiʼ «lu gui ne azufre» ne raqueca zié ca binni ni qué nuzuubaʼ diidxaʼ (Apo. 20:10).
19 Pabiáʼ sicarú runi Jesús dxiiñaʼ stiʼ casi Mesías. Ne pur nga zeeda gaca Guidxilayú riʼ ti paraísu ra maʼ qué ziuu ni guchiiñaʼ binni, ra chuʼcaʼ nayecheʼ ne ra maʼ qué zaca huaracaʼ. Ne laaca zia lá Jiobá de cani guníʼcabe de laa ne zahuinni laasibe nga nápabe derechu de guni mandarbe guidubi naca guibáʼ ne Guidxilayú. ¡Nabé sicarú nga ni cabeza ca binni guzuubaʼ stiidxaʼ Jesús, binni ni gulí Jiobá!
Ñee maʼ bidxélaluʼ Mesías la?
20, 21. Xi razón nápanu para guinínenu binni de Mesías.
20 Dede iza 1914 maʼ nabáninu tiempu rábicabe parousía, o dxi maʼ nuu Cristu lade binni cayuni mandar casi Rey dede guibáʼ. Neca qué zadúʼyanu laabe nuube lade binni, peru nánnanu dxandíʼ zacá ni pur ca diidxaʼ riguixhená ni cayaca ca dxi stinu riʼ (Apo. 6:2-8). Peru cásica qué ñuni cré ca judíu ni bibani lu primé siglu que, stale binni laaca qué náʼ guni cré pa maʼ nuube lade binni. Laacaʼ cabézacaʼ ti mesías ni gaca políticu, o tuuxa ni iquiiñeʼ ca gobiernu nuu lu Guidxilayú riʼ para guni chaahuiʼ guendanagana stiʼ binni. Peru laanu nánnanu maʼ cayuni mandar Jesús guibáʼ. Ximodo biʼniʼ sentirnu dxi gúnnanu ni yaʼ. Zándaca guninu cásica guníʼ ca discípulo stiʼ Jesús que: «Ma bidxela du Mesías».
21 Ca dxi nabáninu riʼ jma naquiiñeʼ gábinu binni dxiiñaʼ napa Jesús casi Mesías. Ñee cayúniluʼ ni la? Pa cayúniluʼ ni, jma zusisácaluʼ guiráʼ ni huayúnibe ne ni chigúnibe pur lii. Cásica Andrés ne Felipe, zándaca maʼ guníʼneluʼ ca xhamíguluʼ ne ca binnilídxiluʼ de Cristu. Ribézadu uguu tema riʼ gana lii para cadi gusaana de guluiʼluʼ laacabe Jesús nga ni riquiiñeʼ Dios para gulá binni, purtiʼ laa nga Mesías ni nexheʼ gueeda que.
Ñee zanda gusiéneluʼ ni la?
• Ximodo gunna ca discípulo ni bibani lu primé siglu que tuu nga Mesías.
• Xi chupa razón nabé risaca guyuu para guti Jesús.
• Xi maʼ qué zandaa zuni Mesías.
[Ca dibuju/foto ni zeeda lu yaza 21]
Xiñee naquiiñeʼ ñanna ca judíu ni bibani lu primé siglu que Jesús nga Mesías ni nexheʼ gueeda que
[Dibuju/foto ni zeeda lu yaza 23]
Ñee rusiénenu cani cucaadiaga laanu xi dxiiñaʼ napa Jesús casi Mesías la?