Cani bisiidiʼ Jesús de laa

«Jesús gunna dxichi tu laa, padé beeda, xiñee beedabe ndaaniʼ Guidxilayú ne xi zazaacabe.» (HERBERT LOCKYER, RUCAABE LIBRU)

PARA ganda gápanu fe Jesús ne guni crenu cani bisiidibe la? naquiiñeʼ gunibiáʼ chaahuinu laabe. Napa xidé gánnanu tu laabe, padé beedabe ne xi pur bibánibe ndaaniʼ Guidxilayú. Ca Evangeliu stiʼ Mateo, Marcos, Lucas ne Juan cacabi cani gunabadiidxanu ca, ne ni jma galán nga purtiʼ Jesús peʼ guníʼ cani.

Maca bibánibe guibáʼ ante gálebe ndaaniʼ Guidxilayú Ti biaje guníʼ Jesús sicaríʼ: «Dede ante gale Abraham, naa maca nuaaʼ» (Juan 8:58). Yanna, pa gúlebe chupa mil iza despué de Abrahán, ximodo ndiʼ maca nuube ante gale Abrahán yaʼ. Laabe bisiénebe ni sicaríʼ: «Purti biete de ibáʼ» (Juan 6:38).

Xiiñiʼ Dios Nécapeʼ napa Jiobá stale xiiñiʼ ni naca ángel guibáʼ la? Jesús gadxé laa lade guirácabe. Laapebe guniʼbe nácabe «tobi lucha Xiiñi» Dios (Juan 3:18). Laabe nga tobi lucha Xiiñiʼ Dios purtiʼ Jiobá peʼ bizáʼ laabe. Xcaadxi cosa ni bizáʼ Dios despué la? biquiiñebe Jesús para guca cani (Colosenses 1:16).

«Hombre Biseenda Dios» Ca diidxaʼ ca nga ni jma biquiiñeʼ Jesús para guníʼ de laa (Mateo 8:20). Zacá bisihuínnibe nácabe ti binni, cadi ti ángel ni biʼniʼ ti cuerpu para ganda guʼyaʼ binni laa, ne cadi guyuudibe lu cuerpu stiʼ Dios o lu cuerpu stiʼ sti espíritu ne gúcabe binni. Biquiiñeʼ Dios espíritu santu stiʼ para guluu guendanabani stiʼ Xiiñiʼ ndaaniʼ ti binnidxaapaʼ láʼ María. Zacá nga bireebe de guibáʼ para beeda gálebe ndaaniʼ Guidxilayú riʼ casi binni ni qué gapa donda, o ni qué gapa pecadu (Mateo 1:18; Lucas 1:35; Juan 8:46).

Mesías ni maca nexheʼ gueeda Ti biaje gudxi ti gunaa de Samaria laabe: «Nanna ziuu dxi gueeda Mesías», óraque bicábibe laa: «Laape be nga caníʼ né be lii» (Juan 4:25, 26). Ca diidxaʼ mesías ne cristu ca riníʼcani: «ni bibí». Ne ca diidxaʼ ca riénenu gulí Dios Jesús para guni ti dxiiñaʼ risaca ti ganda gaca guiráʼ ni maca gudixhe ique Dios guni.

Dxiiñaʼ jma risaca beeda gúnibe Jesús peʼ bisiene xi para beeda ora guníʼ: «Napa xidé chaa xcaadxi guidxi. Chi güe nia binni modo runi mandar Dios, purti para nga bendáʼ» (Lucas 4:43). Nécapeʼ bíʼnibe stale cosa galán, peru ni jma bisaca para laabe nga gusiidibe binni modo runi mandar Dios o de Reinu stiʼ Dios. Peru despué zadúʼyanu xi guiráʼ bisiidibe de Reinu riʼ.

Ne cani maʼ guninu ca maʼ bidúʼyanu cadi tutiisi binni nga guca Jesús.a Despué zadúʼyanu ximodo biquiiñeʼ guiráʼ ni biziidibe guibáʼ para gunda bisiidibe binni jma jneza dxi bibánibe ndaaniʼ Guidxilayú riʼ. Nga runi, qué ridxagayaadinu yendá guiráʼ ni bisiidibe ndaaniʼ ladxidóʼ millón de binni.

[Cani cá ñee yaza]