Ni gusiiditu ca xiiñitu
Ti baʼdudxaapaʼ ni nabé gunnaxhiicabe
CHIGÜENIÁʼ lii de ti baʼdudxaapaʼ ni nabé risaca. Laabe nga xiiñiʼ Jefté. Qué rieeteʼ diʼ labe lu Biblia, peru rábini laanu xi bizaacabe. Guidúʼndanu historia stiʼ Jefté ne xiiñidxaapaʼ. Zuuyaluʼ pabiáʼ gunnaxhii Jiobá Dios laabe ne laaca gunnaxhii ca xhamígabe laabe.
Historia riʼ zeeda ni lu capítulo 11 stiʼ libru stiʼ Jueces. Cumu guca Jefté ti hombre ni nabé biʼniʼ xhiiñaʼ Dios la? rihuínnica nabé biindanebe xiiñidxaapabe Stiidxaʼ Dios, casi modo biʼniʼ mandar Dios ca israelita que gusiniisicaʼ ca xiiñicaʼ.
Dxi bibani ca israelita, qué ñápacaʼ ti rey ñuni mandar laacaʼ. Peru gúpacabe guendanagana purtiʼ ca ammonita, ca xhenemígucabe maʼ xadxí de cucaalucaʼ laacabe, ngue runi caquiiñecabe tuuxa gaca xaíque stícabe. Cumu nabé guyé Jefté lu guerra, guca ti hombre nadipaʼ ne nadxibalú la? ngue runi gunabaʼ ca israelita que laabe gacanebe laacaʼ.
Cumu racalaʼdxiʼ Jefté gacané Dios laa ra chitinde que la? guniʼbe zudiibe laa ti cosa. Gúdxibe Dios pa guni ganarbe, zudiibe laa primé binni guiree ralídxibe guidxaagalú laabe. Binni ca naquiiñeʼ chindeza ndaaniʼ tabernáculo —lugar ra guyé binni para guni adorar Dios— ne guni xhiiñaʼ Dios biaʼ dxi guibani. Ñee biʼniʼ ganar Jefté guerra que la? Biʼniʼ ganarbe ni. Peru, ñee nannuʼ tu bidxagalú laabe primé ora yendabe ralídxibe la?a...
Ya, xiiñidxaapabe. Primé que la? nabé guyuu Jefté triste purtiʼ qué gáparuʼ jma xiiñiʼ. Peru cumu maʼ gúdxibe Jiobá xi chigúnibe la? ngue runi naquiiñeʼ gúnibe ni. Ne xiiñidxaapabe qué ñuu ora niguicheruaa. Laga guluube gana bixhózebe guni ni maʼ bidii stiidxaʼ que. De raqué gunábabe bixhózebe gudii lugar chebe chupa beeu lu ca dani que. Xiñee yaʼ. Purtiʼ nuube triste. Nánnabe maʼ qué zanda guichaganabe ne maʼ qué zanda gápabe xiiñibe ra chindézabe ndaaniʼ tabernáculo que. Ne zándaca ñuuláʼdxibe ñápabe familia. Peru ni jma risaca para laabe nga guzuubabe stiidxaʼ bixhózebe ne stiidxaʼ Jiobá. Cadi dxandíʼ guizáʼ bisiéchebe Jiobá ne bixhózebe la?...
Jefté bidii lugar chuʼné xiiñidxaapaʼ que ca xhamiga chupa beeu. Bibiguetaʼ si baʼdudxaapaʼ que la? biseendaʼ bixhózebe laabe ndaaniʼ tabernáculo que casi maca bidii stiidxaʼ Jiobá. Guiráʼ iza, ca baʼdudxaapaʼ de Israel que riecaʼ Siló, ra nuu tabernáculo que, para chigánnacaʼ laabe ne cuʼcaʼ gana laabe. Ne raqué nga guyuube biaʼ dxi bibánibe.
Ñee runibiaʼluʼ xcaadxi xcuidi huiiniʼ ni ruzuubaʼ stiidxaʼ bixhoze ne jñaa ne nadxiicaʼ Jiobá la?... Galán ñaca xhamíguluʼ laacabe. Peru para ganda guʼnuʼ ni la? caquiiñeʼ guzuubaluʼ stiidxaʼ bixhózeluʼ ne jñaaluʼ ne guzuubaluʼ stiidxaʼ Jiobá, cásica biʼniʼ xiiñidxaapaʼ Jefté. Pa guʼnuʼ zacá la? nabé zusiécheluʼ bixhózeluʼ ne jñaaluʼ ne nabé zannaxhii Jiobá lii.
[Textu ni zeeda lu yaza 29]
RA GUIUUNDAʼ BIBLIA
[Ni cá ñee yaza]
a Pa cayuundaneluʼ tema riʼ ti xcuidi la? zanda guiaanadxiluʼ ra cá chonna puntu huiiniʼ ne guleza guicábibe.