Ximodo gusiidiluʼ laacabe​—Modo jma jneza gúniluʼ ni

«Ca diidxaʼ cayabeʼ lii yannadxí riʼ naquiiñeʼ gapuʼ cani ndaaniʼ ladxidoʼloʼ; ne naquiiñeʼ gábiluʼ cani xiiñiluʼ gatigá ti guiziidibe cani ne gábiluʼ cani laabe ora maʼ nuutu ralídxitu, ne ora maʼ zetu paxaraa ne ora gátatu ne ora guiásatu.» (DEUTERONOMIO 6:6, 7)

ZÁNDACA nuu binni riree gana gusiidiʼ xiiñiʼ purtiʼ ruuyacaʼ nácani ti dxiiñaʼ naroʼbaʼ. Ne ora guyúbicabe tu gacané laacabe ridxélacabe stale conseju ni caníʼ de tema riʼ ne zándaca jmaruʼ si gucheni lúcabe. Ca familia ne ca xhamigu binni nabé rudiicaʼ conseju de modo zanda guni binni né ca xiiñiʼ, zaqueca lu ca libru, lu ca revista ne lu Internet zeeda stale conseju, ne nuu tiru gadxé gadxé ni riníʼcani.

Peru lu Biblia zeeda stale conseju galán ni zacané binni ganna xi gusiidiʼ ca xiiñiʼ, ne cadi ngasi, laaca rábini laacaʼ ximodo gúnicaʼ ni. Ca versículo ni cá ra bizulú tema riʼ, cusiénecani binni nga naquiiñeʼ guyubi modo güiné ca xiiñiʼ de Dios guiráʼ dxi. Lu tema riʼ zadúʼyanu tapa conseju ni cudii Biblia ni huayacané stale binni ni napa xiiñiʼ.

1. Laguluíʼ laacabe cani bizáʼ Dios. Apóstol Pablu bicaa: «Enda nandxóʼ [stiʼ Dios] qué ziuu dxi iluxe, ne qué zanda guʼyaʼ cabe ximodo laabe, peru dede dxi bizáʼ be guidxilayú rihuinni dxichi tu naca be pur irá ni biʼni be» (Romanos 1:20). Zanda gacané binni ca xiiñiʼ para gúʼyacaʼ Dios casi tuuxa ni nabani ora guluíʼcabe laacaʼ guiráʼ ca cosa ni bizaʼbe ne uguucabe gana laacaʼ guiníʼ íquecaʼ de guiráʼ ca guenda ni rusihuínnibe lu cani bizaʼbe.

Jesús biquiiñeʼ guiráʼ ni bizáʼ Dios para bisiidiʼ ca discípulo stiʼ. Casi dxi gúdxibe laacaʼ: «Laguuya ca mani huiini ni ripapa. Qué riguu ca biní ne qué ribee ca guela, ne qué ruchá ca troja, peru rudii Bixhoze tu ni nuu ibáʼ ni go caʼ. Ñee cadi jma risaca tu que laacame la?» (Mateo 6:26). Ra biʼniʼ Jesús zacá, bisiidibe ca discípulo stibe pabiáʼ rannaxhii Jiobá binni ne riá laacaʼ, ne laaca bicaabe laacaʼ guiníʼ íquecaʼ ximodo rusihuinni Dios ca guenda ca né ca xiiñiʼ.

Nabé sicarú ni bisiidiʼ rey Salomón ora guníʼ pabiáʼ nuu xpiaaniʼ birí purtiʼ maca bizáʼ Dios laacame para gánnacame xi gúnicame. Laabe bicaabe: «Biiyadxí ca birí ca binni nachaabaʼ; biiyaʼ cani rúnicame ne guca binni nuu xpiaaniʼ. Neca qué gápacame comandante, oficial ne nin ti gobiernu la? riguucame listu guendaró ni iquiiñecame tiempu nandáʼ ne rindísacame cani» (Proverbios 6:6-8). Cadi nagana diʼ modo bisiene rey nuu xpiaaniʼ riʼ ora guníʼ risaca quixhe íquenu ugaandanu xiixa cosa galán ne gúninu stipa pur ugaandanu cani.

Laatu cani napa xiiñiʼ, ximodo zanda chinándatu ejemplu stiʼ Jesús ne Salomón ora gusiiditu ca xiiñitu. Primé, laguinabadiidxaʼ laacabe xi yagahuiiniʼ ne tu maniʼ jma riuuláʼdxicabe. Guiropa, laguyubi xiixa ni cusiene jma de cani bizáʼ Dios ca. Ne guionna, lagüiʼné laacabe xi rusiidicani laacabe de Dios.

2. Lagaca casi guca Jesús ora bisiidiʼ binni. Guirutiʼ qué huaníʼ cosa jma risaca casi guníʼ Jesús de lade guiráʼ binni ni huabani lu guidxilayú. Neca zacá guleebe stale tiempu para guinabadiidxabe ca binni ni cucaadiaga laabe, purtiʼ nabé bizaaláʼdxibe gánnabe xi riníʼ íquecaʼ ne xi runi sentircaʼ (Mateo 17:24, 25; Marcos 8:27-29). Ca binni ni napa xiiñiʼ laaca nápacaʼ stale cosa risaca gusiidicaʼ ca xiiñicaʼ, peru para ganda gúnicabe ni jneza la? caquiiñeʼ gúnicabe casi biʼniʼ Jesús ne cúʼcabe gana ca xiiñicabe guiniʼcaʼ sin guidxíbicaʼ.

Yanna, xi naquiiñeʼ guni binni pa qué guzuubaʼ ca xiiñiʼ diidxaʼ o pa raca nagana para laacaʼ guiziidicaʼ xiixa ni cusiénebe laacaʼ yaʼ. Guidúʼyanu ximodo gucané Jesús ca apóstol stiʼ ora bíʼnicaʼ zacá. Guyuu ora gudinde diidxacabe ne qué ñénecabe xi pur cadi naquiiñeʼ gudxiibacabe laca laacabe. Neca zaqué, qué nusaana Jesús de ñapa paciencia laacabe, ne stale biaje gúdxibe laacaʼ cadi gudxiibacaʼ laca laacaʼ (Marcos 9:33, 34; Lucas 9:46-48; 22:24, 25). Ca binni ni napa xiiñiʼ zusihuínnicaʼ zinándacaʼ ejemplu stiʼ Jesús ra gulídxecaʼ ca xiiñicaʼ né stale paciencia, ne pa caquiiñeʼ la? rábicabe ca xiiñicabe chupa chonna biaje xi naquiiñeʼ gúnicaʼ.

3. Lagusiidiʼ laacabe né ejemplu stitu. Ca binni ni napa xiiñiʼ, galán rúnicaʼ ora rinándacaʼ ni na ca diidxaʼ ni bicaa apóstol Pablu ra nuu ca binni ni nabeza Roma: «Yanna lii, rusiidi lu stobi, xiñee qué usiidi lu laca lii yaʼ. Raʼbu laacabe cadi cuana cabe, peru lii ribaʼna luʼ» (Romanos 2:21).

Galán guiníʼ íquenu de ca diidxaʼ riʼ, purtiʼ ca xiiñiʼ binni jma rúnicaʼ ni ruuyacaʼ guni bixhózecaʼ ne jñaacaʼ que ni riníʼcabe. Ora quixhe binni ti ejemplu galán nezalú ca xiiñiʼ la? jma nagueenda ruzuubacaʼ diidxaʼ.

4. Laguzulú dede ora nahuiinicabe. Timoteu, ti hombrehuiiniʼ ni guca xcompañeru apóstol Pablu dxi guzá de misioneru, nabé galán guca xpiaʼbe nezalú ca binni ni runibiáʼ laabe (Hechos 16:1, 2). Beeda gácabe zaqué purtiʼ «dede dxi nahuiini[be]» bisiidiʼ jñaabe ne jñaabiidabe laabe «ni cá lu Xquiʼchi Dios». Ne cadi biindanésicabe laabe Stiidxaʼ Dios, sínuque laaca gucanécabe laabe guiénebe ni (2 Timoteo 1:5; 3:14, 15).

Xi zanda gacané laacabe

Ca testigu stiʼ Jiobá huabeecaʼ stale libru ne revista ni guca para gacané binni gusiidiʼ ca xiiñiʼ ni dxandíʼ de Dios. Nuu de laacani gúcacani para ca xcuidihuiiniʼ ne xcaadxi de laacani racanécani ca hombrehuiiniʼ ca güínecaʼ bixhózecaʼ ne jñaacaʼ diidxaʼ.a

Peru para ganda guiniʼné binni xiiñiʼ de Dios la? caquiiñeʼ gánnacaʼ guicábicaʼ chupa chonna de ca guendarinabadiidxaʼ nagana ni zándaca guni ca xiiñicaʼ laacaʼ. Casi xi nicábiluʼ pa ninabadiidxacabe lii xiñee cudii Dios lugar gacaná binni, xi cá íquebe guninebe Guidxilayú riʼ o paraa nuu ca gueʼtuʼ ca. Ca testigu stiʼ Jiobá zusiidicaʼ lii né stale guendanayecheʼ cani gunabadiidxanu riʼ ne xcaadxi guendarinabadiidxaʼ casi laacani, ti ganda chuʼluʼ gaxha de Dios, lii né ca binnilídxiluʼ (Santiago 4:8).

[Cani cá ñee yaza]