Gacanenu laacabe para guicaacabe dxiiñaʼ ndaaniʼ xquidxi Dios
«Ora ma binduuxe [tuuxa], ma nanna biaʼ nanna jmaistru.» (LUC. 6:40)
1. Xi biʼniʼ Jesús dxi bicheeche diidxaʼ para bidale ca xpinni.
RA ZILUXE apóstol Juan Evangeliu stiʼ, bicaa ca diidxaʼ riʼ: «Nuu ru stale ni biʼni Jesús, pa nicá cada tobi ni la? rabe nin qué nugaanda guidxilayú nidxá irá guiʼchi ra nicá ni» (Juan 21:25). Nabé nadipaʼ modo biʼniʼ Jesús dxiiñaʼ dxi bicheeche diidxaʼ, purtiʼ huaxiéʼ tiempu gúpabe. Biquiiñebe tiempu riʼ para guyúbibe hombre, gusiidibe laacaʼ ti ganda gúnicaʼ dxiiñaʼ riʼ ora guibiguétabe guibáʼ. Ne lu iza 33 dxi maʼ nuube guibáʼ, mápeca nuu ti grupu huiiniʼ de xpínnibe lu Guidxilayú ne qué nindaa bidálecaʼ dede gúcacaʼ mil de binni (Hech. 2:41, 42; 4:4; 6:7).
2, 3. 1) Xiñee jma caquiiñeʼ guiziidiʼ ca hombre ni maʼ guyuunisa para ganda guicaacaʼ jma dxiiñaʼ. 2) Xi zadúʼyanu lu tema riʼ.
2 Yanna riʼ maʼ nuu jma de gadxe millón de binni ni rucheeche diidxaʼ ne ridagulisaacabe ndaaniʼ jma de ti gayuaa mil neza binni ridagulisaa. Nga rusihuinni caquiiñeʼ stale hombre ni gacané ca binni ridagulisaa guiziidicaʼ de Dios. Casi yanna riʼ, caquiiñeʼ chuʼ stale binnigola para chiganna ca neza binni ridagulisaa. Guiráʼ xpinni Cristu ni guni stipa pur guicaa dxiiñaʼ riʼ «jneza ni cá ique guni» (1 Tim. 3:1).
3 Peru nuu caadxi cosa ni naquiiñeʼ guni tuuxa ante gapa xiixa dxiiñaʼ lade ca binni ridagulisaa. Cadi purtiʼ si guzá tuuxa scuela roʼ o purtiʼ maʼ nanna stale nga zanda guni ca dxiiñaʼ riʼ. Ni jma naquiiñeʼ nga guibánibe modo na Dios ne gusihuínnibe ca guenda ni naquiiñeʼ gapa ca xpinni Cristu. Ximodo zanda gacanenu ca hombre para ganda guiziidicaʼ gúnicaʼ dxiiñaʼ riʼ yaʼ. Cristu guníʼ: «Ora ma binduuxe [tuuxa], ma nanna biaʼ nanna jmaistru» (Luc. 6:40). Jesús nga Maestru ni jma nanna gusiidiʼ, ne lu tema riʼ zadúʼyanu caadxi modo bisiidibe ca discípulo stibe para ganda guicaacaʼ jma dxiiñaʼ, ne zazíʼdinu ximodo zanda gúninu cásica bíʼnibe.
«Ma xhamigua laatu»
4. Ximodo bisihuinni Jesús nabé guca xhamigu ca discípulo stiʼ.
4 Jesús qué niníʼ ique jma risaca que ca discípulo stiʼ, sínuque biiyabe laacaʼ casi xhamígube. Guyuube stale tiempu né laacaʼ ne bisihuínnibe zanda gúnicaʼ xhiiñabe. Ngue runi dede guniʼbe: «Ma gudxe laatu irá ni gudxi Bixhoze naa» (biindaʼ Juan 15:15). Ti biaje gunabadiidxacabe Jesús: «Xi seña ihuinni dxi mayaca gueedu ne iluxe guidx[i]layú riʼ» yaʼ. Biéchecabe stale ora bicabi Jesús laacabe (Mat. 24:3, 4). Ne laaca qué nucaachiʼ Jesús xi riníʼ ique ne xi runi sentir. Casi gueelaʼ bitoocabe laabe que, yenebe Pedru, Santiagu ne Juan ndaaniʼ jardín ni nuu Getsemaní, raqué biiyacabe modo biʼniʼ orarbe Dios de guidubi ladxidoʼbe pur ca guendanagana stibe. Zándaca qué ñunadiaga guionnaʼ apóstol que cani guniʼbe lu oración que, peru biénecabe pabiáʼ naná modo guyuube gueelaʼ que (Mar. 14:33-38). Laaca guiníʼ íquenu pabiáʼ biguidxi fe stícabe ora biiyacabe bidxaa modo bihuinni Jesús lu dani que (Mar. 9:2-8; 2 Ped. 1:16-18). Cumu nabé guca xhamígucabe Jesús la? gucané ngue laacabe para gúnicabe dxiiñaʼ nabé risaca ni biaananécabe gúnicabe.
5. Gunáʼ nga caadxi modo rusihuinni ca binnigola nuucaʼ para gacanecaʼ xcaadxi binni.
5 Cásica Jesús, ca binnigola ni nuu yanna racanecaʼ ne raca xhamígucaʼ ca xpinni Cristu. Rannaxhiicabe laacaʼ ne rusihuínnicabe rizaaláʼdxicabe laacaʼ ora ribeecabe tiempu para gúʼyacabe xi caquiiñecaʼ. Peru nánnacabe nuu ni qué zanda gábicabe ca xpinni Cristu. Runi crécabe ca bíʼchicabe ne ca bizáʼnacabe ne rusiidicabe laacaʼ cani maʼ biziidicabe lu Biblia. Qué riníʼ ique ca binnigola jma risácacaʼ que ca siervu ministerial, neca pa jma nahuiinicaʼ. Ruuyacabe laacaʼ casi binni ni caniisi lu stiidxaʼ Dios, nadxiicaʼ Jiobá ne cayúnicaʼ ti dxiiñaʼ risaca para gacanecaʼ ca binni ridagulisaa.
«Ma bilué laatu xi guni tu»
6, 7. Xi ejemplu bisaana Jesús para ca discípulo stiʼ, ne xi bicaani laacabe gúnicabe.
6 Nécapeʼ nabé gunnaxhii ca discípulo que Dios, guyuu biaje guníʼ íquecabe casi riníʼ ique binni ni biniisinécabe ne bibánicabe casi modo nabánicaʼ (Mat. 19:9, 10; Luc. 9:46-48; Juan 4:27). Peru Jesús qué ñuu dxi niníʼ mal de laacabe o nidindené laacabe. Ne laaca qué ñabi laacabe gúnicabe xiixa ni nabé nagana ne qué ñabi diʼ laacabe: «Laguni ni cayabeʼ laatu ne cadi gúnitu ni runeʼ», sínuque bisiidiʼ laacabe né ejemplu stiʼ (biindaʼ Juan 13:15).
7 Xi ejemplu bisaana Jesús para ca discípulo stiʼ yaʼ (1 Ped. 2:21). Gúpabe ni caquiiñesibe para guibánibe ti gápabe tiempu para gacanebe sti binni (Luc. 9:58). Bisiidibe guiráʼ ni zeeda lu Stiidxaʼ Dios ne qué ñuu dxi nusiidibe ni zeeda si de ndaaniʼ íquebe (Juan 5:19; 17:14, 17). Gúcabe nachaʼhuiʼ ne qué ñaca nagana para binni nidxiña laabe, ne bíʼnibe guiráʼ ni purtiʼ nadxiibe laacaʼ (Mat. 19:13-15; Juan 15:12). Nabé guleendú ca apóstol stale cosa galán de ejemplu stibe. Guzéʼtenu ni bizaaca Jacobo (Santiago). Gúcabe nadxibalú neca guzanándacabe laabe, ne bíʼnibe ni na Dios dede dxi biiticabe laabe (Hech. 12:1, 2). Ne ngaca biʼniʼ Juan, purtiʼ yenanda ejemplu stiʼ Maestru stiʼ jma de sesenta iza (Apo. 1:1, 2, 9).
8. Xi ejemplu rudii ca binnigola para ca hombre ni jma nahuiiniʼ ne para xcaadxi xpinni Cristu.
8 Ximodo zanda gaca ca binnigola ti ejemplu galán para ca hombre ni jma nahuiiniʼ yaʼ. Ra gusihuínnicabe qué rudxiibacabe laca laacabe, nadxiicabe binni ne iquiiñecabe tiempu ne stipa stícabe para gacanécabe stobi (1 Ped. 5:2, 3). Ne cumu runi crécabe Jiobá, nánnacabe gusiidicabe, nabánicabe modo naquiiñeʼ guibani ti xpinni Cristu ne nánnacabe gucheechecabe diidxaʼ la? riéchecabe ora gúʼyacabe zanda chinanda ca xpinni Cristu ejemplu stícabe (Heb. 13:7).
Biseendaʼ Jesús laacabe ne guníʼ xi gúnicabe
9. Ximodo nánnanu bisiidiʼ Jesús ca discípulo stiʼ para ganda gucheechecaʼ diidxaʼ.
9 Gudiʼdiʼ si chupa iza de cucheeche Jesús diidxaʼ né stale gana, biseendabe doce apóstol stibe para gúnicaʼ zaqueca. Peru primeru bisiidibe laacaʼ ximodo gúnicaʼ ni (Mat. 10:5-14). Ne ante gúnibe ti milagru ra biyaanabe stale mil de binni bisiénebe ca apóstol ximodo naquiiñeʼ quíʼzicabe guendaró que ti ganda gó guirácabe (Luc. 9:12-17). Casi maʼ bidúʼyanu ca, guiráʼ biaje bisiidibe laacaʼ ne bisiénebe laacaʼ ximodo naquiiñeʼ gúnicaʼ xiixa. Pur modo bisiidiʼ Jesús ca apóstol ne modo gucané espíritu santu laacabe, gunda gudixhe chaahuicabe modo guireeche diidxaʼ dede iza 33.
10, 11. Ximodo racané ca binnigola ca ti hombre para guni dxiiñaʼ lade ca binni ridagulisaa.
10 Ca dxi stinu riʼ, ruzulú riziidiʼ ti hombre guni dxiiñaʼ dede primé biaje guzulú guiziidiʼ de Biblia. Nuu biaje zusíʼdinu laabe gúʼndabe jma jneza. Ne ora maʼ cayúʼndanenu laabe, laaca naquiiñeʼ gusíʼdinu laabe xcaadxi cosa. Ora maʼ biaabe chebe ca guendaridagulisaa guiráʼ semana, zanda gábinu laabe guicá labe lu Scuela stiʼ cani Rucheeche Diidxaʼ, gácabe ni rucheeche diidxaʼ ni caʼruʼ chúʼnisa ne gúnirube xcaadxi cosa. Ora maʼ guyuunísabe laaca zusiidicabe laabe ximodo gacanebe para gaca chaahuiʼ Yoo stiʼ Reinu. Ne despué zanda gusiénecabe laabe xi naquiiñeʼ gúnibe ti ganda gácabe siervu ministerial.
11 Cada biaje guicaa ti hombre ni maʼ guyuunisa xiixa dxiiñaʼ, naquiiñeʼ gusiene ti binnigola laabe ximodo na xquidxi Dios gaca dxiiñaʼ ca ne gabi laabe xipeʼ nga naquiiñeʼ gúnibe. Ne zabi laabe xi ribézacabe gúnibe. Pa cayaca nagana para laabe gúnibe dxiiñaʼ bidiicabe laabe la? cadi casi zeʼ binnigola ca guiníʼ ique qué zanda gúnibe ni. Ni guni binnigola ca nga gusiene laabe sti biaje xi naquiiñeʼ gúnibe ne ximodo gúnibe ni. Nabé riecheʼ ca binnigola ora ruuyacaʼ riuulaʼdxiʼ ti hombre guni ni cayábicabe laa ne ora ruuyacabe nuube nayecheʼ purtiʼ cayacanebe stobi (Hech. 20:35).
«Ti binni nuu xpiaaniʼ rucaadiaga conseju»
12. Xiñee galán guiráʼ ca conseju bidii Jesús.
12 Ora bisiidiʼ Jesús ca discípulo stiʼ, bidiibe conseju ni caquiiñeʼ cada tobi de laacaʼ. Casi dxi gunabaʼ Jacobo (Santiago) ne Juan guiaba gui de guibáʼ para gunitilú caadxi samaritanu ni qué nucaadiaga laacabe la? gudxi Jesús laacabe cadi jneza ngue ni canábacabe (Luc. 9:52-55). Ne dxi gunabaʼ jñaa guiropaʼ apóstol riʼ Jesús guni xiixa pur ca xiiñiʼ ora maʼ nuu lu Reinu, guniʼné Jesús laacabe purtiʼ laacabe nga gúdxicabe jñaacabe chitidxini Jesús. Gúdxibe laacaʼ: «Para cui tu cuee ladu derechu ne ladu biga la? cadi nexhe ni lu naya para gudieeʼ, purti maca gudixhe Bixhoze tuu nga icaa ni» (Mat. 20:20-23). Nabé nayá ca conseju bidii Jesús laacabe, purtiʼ zacaneni laacabe gánnacabe xi gúnicabe lu xcaadxi cosa. Biquiiñebe Stiidxaʼ Dios guiráʼ biaje purtiʼ rápabe gana guiziidiʼ ca discípulo stibe guiníʼ íquecaʼ ne gúnicaʼ modo na Stiidxaʼ Dios (Mat. 17:24-27). Qué ñaandaʼ Jesús binni ruchee laacabe ne nuu caadxi cosa ni qué zanda gúnicabe. Bidiibe conseju laacaʼ purtiʼ dxandíʼ nadxiibe laacaʼ (Juan 13:1).
13, 14. 1) Tuu nga cani jma caquiiñeʼ gudiicabe conseju laacaʼ. 2) Bizeeteʼ caadxi conseju ni zanda gudii ti binnigola tuuxa xpinni Cristu ni cadi caniisi lu stiidxaʼ Dios.
13 Guiráʼ hombre ni rapa gana gacané lade ca binni ridagulisaa ziuu ora zaquiiñecabe Biblia para gudiicabe conseju laabe. Proverbios 12:15 na: «Ti binni nuu xpiaaniʼ rucaadiaga conseju». Ti xpinni Cristu bidii cuenta zacá ni ora guníʼ: «Nabé guníʼ iqueʼ qué zanda gacaniáʼ xcaadxi binni. Peru gucané ti binnigola naa para guieneʼ cadi caquiiñeʼ diʼ gannaʼ guiráʼ xixé cosa para ganda gacaniáʼ stobi».
14 Pa guʼyaʼ ca binnigola qué ganda guiniisi ti hombre lu stiidxaʼ Dios pur modo laa la? naquiiñeʼ guyúbicabe modo gacanécabe laabe ne guiniʼnécabe laabe né diidxaʼ nadóʼ (Gál. 6:1). Peru ziuu ora naquiiñeʼ gudiicabe conseju ti hombre para guchaa xpiaʼ. Ximodo zanda gacané ti binnigola ti hombre ni qué riuulaʼdxiʼ guni stale dxiiñaʼ yaʼ. Gusietenaláʼdxibe laa modo bicheeche Jesús stiidxaʼ Reinu de guidubi ladxidóʼ ne biʼniʼ mandar chinanda ca discípulo ejemplu stiʼ (Mat. 28:19, 20; Luc. 8:1). Yanna pa riuuláʼdxibe gácabe tuuxa ni jma risaca lade xcaadxi yaʼ. Naquiiñeʼ gábicabe laabe bisiidiʼ Jesús cadi galán diʼ chuulaʼdxiʼ binni gaca tuuxa jma risaca (Luc. 22:24-27). O ximodo jma galán gacanécabe laabe pa raca nagana para laabe gutiidiláʼdxibe stonda binni yaʼ. Guʼndanécabe laabe relatu stiʼ esclavu ni bitiidilaʼdxiʼ ti rey laa guiráʼ ni nuzaabiʼ, peru laa qué niná nutiidilaʼdxiʼ stonda sti hombre ni nuzaabiʼ laa huaxiéʼ bueltu (Mat. 18:21-35). Naquiiñeʼ gudiicabe conseju ca xpinni Cristu nagueendaca guiráʼ biaje iquiiñeʼ cani. Biblia na: «Pomada ne perfume nga rusiecheʼ ladxidóʼ binni, ne nabé sicarú nga conseju ni ricaa binni de ti xhamigu» (Pro. 27:9, La Biblia de las Américas).
«Bicaa ique sa lu gaxha de Dios»
15. Ximodo racané ca binnilidxi ti hombre laa para ganda gúnibe dxiiñaʼ lade ca binni ridagulisaa.
15 Ca binnigola nga cani jma naquiiñeʼ gacané ca hombre para guicaacaʼ dxiiñaʼ lade ca binni ridagulisaa. Peru laaca zanda gacané xcaadxi xpinni Cristu. Xheelaʼ hombre riʼ ne ca xiiñiʼ zanda gacanecaʼ laabe para guiniisibe lu stiidxaʼ Dios ne naquiiñeʼ gúnicabe ni. Ne pa maʼ naca ti hombre binnigola la? naquiiñeʼ gacané binnilídxibe laabe para ganda gúnibe guiráʼ ca dxiiñaʼ nápabe lade ca binni ridagulisaa. Nánnacabe zaquiiñebe tiempu ne stipa stibe para gacanebe sti binni. Ne riéchebe ora ruuyabe modo rudiináʼ familia stibe laabe para ganda gúnibe xhiiñabe. Cadi dxandíʼ rudiʼnu xquíxepeʼ familia stibe pur modo racané laabe la? (Pro. 15:20; 31:10, 23.)
16. 1) Tuu nga ni jma naquiiñeʼ gusihuinni dxandíʼ racalaʼdxiʼ gacané stobi. 2) Ximodo rusihuinni ti hombre dxandíʼ rapa gana guni dxiiñaʼ lade ca binni ridagulisaa.
16 Nécapeʼ zanda gacanécabe hombre riʼ, laabe nga jma naquiiñeʼ gúnibe stipa para guiale de laabe gacanebe sti binni (biindaʼ Gálatas 6:5). Cadi caquiiñepeʼ gaca binni siervu ministerial o binnigola para ganda gacané xcaadxi binni gucheeche diidxaʼ jma jneza. Peru Stiidxaʼ Dios na, napa xidé guni ti xpinni Cristu guiráʼ ni canabaʼ Dios para ganda guicaa ti dxiiñaʼ lade ca binni ridagulisaa (1 Tim. 3:1-13; Tito 1:5-9; 1 Ped. 5:1-3). Para ganda gaca tuuxa siervu ministerial o binnigola, naquiiñeʼ guʼyaʼ xi xcaadxi cosa naquiiñeʼ guni primeru. Naquiiñeʼ gúʼndabe Biblia gatigá ne gúnibe stipa pur guiénebe ni, guiníʼ íquebe ni cusiidini laabe, guni orarbe de guidubi ladxidoʼbe ne gucheechebe diidxaʼ né stale gana. Zacá zanda gúnibe ni na conseju bidii Pablu Timoteu: «Bicaa ique sa lu gaxha de Dios» (1 Tim. 4:7).
17, 18. Xi naquiiñeʼ guni tuuxa pa riníʼ ique qué zanda guni dxiiñaʼ gudiicabe laa o pa qué riuulaʼdxiʼ guicaa ni.
17 Peru xi guni ti binni pa riníʼ ique qué zanda gaca siervu ministerial o ti binnigola. Galán guiníʼ íquenu xi guiráʼ runi Jiobá ne Jesús pur laanu. Jiobá, Bixhózenu ni nuu guibáʼ maʼ guníʼ zanda gacané laanu para gúninu intiica dxiiñaʼ guicaanu (Sal. 68:19). Jiobá zanda gacané laabe para gúnibe ca dxiiñaʼ ni gudiicabe laabe lade ca binni ridagulisaa. Xi zacané ti xpinni Cristu para quixhe ique gaca siervu ministerial o binnigola yaʼ. Ora gúʼyabe pabiáʼ caquiiñeʼ chuʼ stale hombre para guni dxiiñaʼ ndaaniʼ xquidxi Dios. Ora guiníʼ íquebe cani bizéʼtenu ca, zándaca gucaani laabe gúnibe biaʼ gándatiʼ para guicaabe ca dxiiñaʼ ca. Laaca naquiiñeʼ guinábabe espíritu santu stiʼ Jiobá purtiʼ zacaneni laabe para gatadxí ladxidoʼbe ne gánnabe gucueezabe laabe. Pa gúnibe zacá la? maʼ qué zaníʼ íquebe qué zanda gúnibe dxiiñaʼ ca (Luc. 11:13; Gál. 5:22, 23). Ne naquiiñeʼ gánnabe zaguu Jiobá ndaayaʼ laabe pa cá íquebe guiniisibe lu stiidxaʼ Dios purtiʼ riuuláʼdxibe gacanebe sti binni.
18 Xi zanda gacané ti xpinni Cristu pa qué riuulaʼdxiʼ guicaa dxiiñaʼ lade ca binni ridagulisaa yaʼ. Apóstol Pablu bicaa: «Dios cayacané laatu uluiʼlaʼdxi tu guni tu ni na, ne zaqueca ti ganda guni tu ni» (Fili. 2:13). Racá ridúʼyanu Jiobá nga rucaa laanu gúninu dxiiñaʼ para xcaadxi binni, ne zanda iquiiñebe espíritu stibe para gudiibe stipa tutiica xpinni Cristu para guni xhiiñabe (Fili. 4:13). Ne zanda guinabaʼ ti xpinni Cristu gacané Jiobá laa ti ganda guni ni jneza guiráʼ hora (Sal. 25:4, 5).
19. Xii nga ni na Jiobá zaca ora uguube «gadxe pastor, [ne] xhono xaíque».
19 Jiobá riguu ndaayaʼ stipa ni runi ca binnigola ora racanecaʼ xcaadxi hombre. Ne laaca riguube ndaayaʼ cani rudii lugar gacanécabe laa ti ganda guicaacaʼ xiixa dxiiñaʼ lade ca binni ridagulisaa. Stiidxaʼ Dios na zudii Jiobá «gadxe pastor, ya, xhono xaíque». Tuu nga ca binni riʼ yaʼ. Laacabe nga guiráʼ ca hombre ni caquiiñeʼ chuʼ para guni dxiiñaʼ ndaaniʼ xquidxi Dios (Miq. 5:5). Yanna riʼ nuu stale hombre ni riuulaʼdxiʼ gacané stobi ne rudiicaʼ lugar gusiidicabe laacaʼ ti ganda gúnicaʼ dxiiñaʼ lade ca binni ridagulisaa. ¡Nabé rusisácacabe Jiobá ne ni rúnicabe ne pur laani ricaanu stale ndaayaʼ!
Xi nicábinu
• Ximodo bisiidiʼ Jesús ca discípulo stiʼ para ganda guicaacaʼ jma dxiiñaʼ.
• Ximodo chinanda ca binnigola ejemplu stiʼ Cristu ora gacanecaʼ xcaadxi hombre para ganda guni dxiiñaʼ lade ca binni ridagulisaa.
• Ximodo zanda gacané xheelaʼ ti hombre ne ca xiiñiʼ laa ti ganda gacané ca binni ridagulisaa.
• Xi naquiiñeʼ guni ti xpinni Cristu para gusihuinni dxandíʼ riuulaʼdxiʼ guicaa dxiiñaʼ lade ca binni ridagulisaa.
[Dibuju/foto ni zeeda lu yaza 31]
Ximodo zanda gacanenu tuuxa ni caziidiʼ de Biblia para guiniisi lu stiidxaʼ Dios
[Dibuju/foto ni zeeda lu yaza 32]
Ximodo rusihuinni ti hombre dxandíʼ racalaʼdxiʼ guicaa jma dxiiñaʼ