NI RINABADIIDXAʼ CANI RUUNDAʼ

Ñee bicaa ca israelita que binni malu lu yaga para gáticaʼ la?

Ca romanu que gúpacaʼ costumbre de gundiibicaʼ o gucaacaʼ binni malu lu ti yaga o lu ti poste, zaqué nga modo runi castigárcabe laaca, ne rusaanacabe laacaʼ raqué dede ora gáticaʼ pur yuubaʼ cadíʼdicaʼ, pur qué reʼcaʼ nisa, qué rocaʼ, pur nuucaʼ lu gubidxa o pur rigaacaʼ nisaguié. Ne ca binni si ni jma malu nga ruuticabe zaqué, purtiʼ nabé naná ni.

Yanna, ñee zaqueca nga biiti guidxi Israel binni la? Ley stiʼ Moisés que na sicaríʼ: «Pa guni tuuxa hombre ti pecadu ne caquiiñeʼ gati, ne biiticabe laabe, ne pa bigaandaluʼ laabe lu ti yaga la? cadi naquiiñeʼ guiaana xcuerpu gueʼtuʼ ca lu yaga guidubi gueelaʼ; dxi queca naquiiñeʼ gucaachiluʼ laabe» (Deut. 21:22, 23). Nga runi, tiempu bibani ca binni ni ruzeeteʼ Stiidxaʼ Dios ni gucuá lu diidxaʼ hebreu, primeru nga ruuticabe ti binni malu ne despué maʼ rugaandacabe xcuerpu lu ti yaga o lu ti poste.

Yanna guidúʼyanu xi cuzeeteʼ Levítico 20:2 de ni caninu riʼ: «Tutiica hombre de ca xiiñiʼ Israel, ne tutiica dxuʼ ni guedandeza ndaaniʼ guidxi Israel, ni gudii xiiñiʼ Mólek, naquiiñeʼ gatiʼ. Naquiiñeʼ guchá ca binni ni nuu ndaaniʼ guidxi ca guié laabe dede gátibe». Tutiica binni guni dxiiñaʼ de espiritista o gaca tobi de cani riníʼ xi chiguizaaca, naquiiñeʼ guchácabe guié laa dede gatiʼ (Lev. 20:27).

Yanna guidúʼndanu xiná Deuteronomio 22:23, 24: «Pa chuʼ ti binnidxaapaʼ ni mayaca guichaganáʼ ti hombre, ne chuʼ ti hombre ndaaniʼ guidxi ca ni gatané laabe, naquiiñeʼ cueetu guirópacabe ra puertaʼ guidxi ne guchatu guié laacabe dede ora gáticabe, baʼdudxaapaʼ ca purtiʼ qué nucaa ridxi para ñacané binni laa, ne hombre que purtiʼ gulaxoo xheelaʼ sti hombre. Zacá nga naquiiñeʼ cueeluʼ guendaquéiquiiñeʼ ndaaniʼ xquídxiluʼ». Racá ridúʼyanu modo biiticabe ca binni ni biʼniʼ xiixa cosa malu, ruchácabe guié laacaʼ dede gáticaʼ.a

Deuteronomio 21:23 na: «Qué riuulaʼdxiʼ Dios ugaandacabe tuuxa lu yaga». Nga runi, ora rugaandacabe xcuerpu ti binni malu ni maʼ guti lu ti yaga o lu ti poste, riquiiñeni para cadi gúnicaʼ ca israelita casi biʼniʼ binni que, purtiʼ qué riuulaʼdxiʼ Dios ni.