«Qué nusiaandaʼ Jiobá naa»

MODO BIBANEʼ DXIQUÉ:

De guidxi Bilbao naa ne guleʼ ndaaniʼ ti barrio ra nabeza binni ni cadi tan pobre, riaana ni ladu guiaʼ de guidxi España. Gupa jñaaʼ tapa xiiñidxaapaʼ, ne naa nga ra guiropa xiiñibe. Nabé católicu binnilidxeʼ, ne guiráʼ dxi riuudu mixaʼ. Dxi maʼ napaʼ 23 iza, bireenduáʼ de maestra, ne bineʼ dxiiñaʼ riʼ cuarenta iza purtiʼ ngue nga ni racalaʼdxeʼ guneʼ. Ne ni jma guyuuladxeʼ gusiideʼ nga de religión católica. Ne guiráʼ huadxí rudieeʼ catesismo, laaca racaniáʼ ca dxaapahuiiniʼ gúnicaʼ primera comunión sticaʼ.

Nabé nayecheʼ gulezaniáʼ xheelaʼ doce iza, peru gútibe ne maʼ stubeʼ bisiniiseʼ guidapaʼ xiiñidxaapadu. Dxiqué deruʼ napaʼ 33 iza. Biyubeʼ quixhedxícabe ladxiduáʼ ndaaniʼ religión stinneʼ, peru qué ñanda nicábicabe cani gunabadiidxaʼ laacabe riʼ: Xiñee rati binni pa bilá Jesús laanu de lu naʼ guendaguti yaʼ. Xiñee rinábanu Dios gueeda Reinu stiʼ pa rié ca binni nachaʼhuiʼ guibáʼ yaʼ. Ne ni jma racalaʼdxeʼ gannaʼ nga xiñee caquiiñeʼ guiree binni de guibáʼ, de ndaaniʼ purgatorio o de ndaaniʼ infiernu para guni juzgar Dios laacaʼ pa maca biʼniʼ juzgarbe laacaʼ dxi gúticaʼ yaʼ.

Gunabadiidxaʼ cani stale cura. Tobi de laacabe gudxi naa: «Qué gannadiáʼ, gunabadiidxaʼ obispo. Ne xi páraruʼ racalaʼdxuʼ gannuʼ. Cadi xa maʼ runi creluʼ Dios, ne nga si nga laani». Despué biyubeʼ tu gusiene cani naa, ngue runi guyaaʼ ra nuu cani rábicabe jesuita, ca pentecostés ne ra nuu ca gnóstico peru qué ñuuladxeʼ modo bisiénecabe ni naa.

XIMODO GUCANÉ BIBLIA NAA BICHAAʼ:

Lade cani rusiideʼ que nuu ti dxaapahuiiniʼ de gadxe iza naa ni biʼniʼ invitar naa chaaʼ ra ridagulisaa ca testigu stiʼ Jiobá, ne dxiqué maʼ napaʼ jma de 60 iza. Guyuulaʼdxeʼ ni biiyaʼ ne ni binadiaʼgaʼ raqué, peru cumu nabé napaʼ stale dxiiñaʼ la? maʼ qué ñanda ñueniáʼ ca Testigu diidxaʼ. Chupa iza despué, bixhidxi Juan ne xheelabe Maite ra puerta lidxeʼ. Ra bizaa chonna beeu de canagánnacabe naa biluxe bicábicabe cani gunabadiidxaʼ laacabe, óraqueruʼ nga bizulú biindanécabe naa Biblia.

Nabé riecheʼ ora ganda dxi chigusiidiʼ ca Testigu que naa. Ruundaʼ chaahueʼ guiráʼ ni rusiidicabe naa ne riquiiñeʼ chonna clase Biblia para guuyaʼ pa dxandíʼ ngue ni cusiidicabe naa. Qué nindaa bidieeʼ cuenta cadi jneza ngue cani runeʼ cré maʼ xadxí. Guizáʼ feu bineʼ sentir ora biiyaʼ gadxé ngue cani runeʼ cré ne gadxepeʼ nga ni rusiidiʼ Biblia. Nabé nagana guca ni para naa, purtiʼ cani runeʼ cré que beeda gaca cani casi ti yaga ni nabé maʼ gucuaa xcu ne cayáxhacabe laa.

Guiropa xheelaʼ guizáʼ guca huará ne guti. Ca dxi que gucaʼ jubilar ne bireeʼ de guidxi Bilbao ne yendezaʼ sti ladu ti tiempu. Juan ne Maite laaca yendézacaʼ sti ladu. Triste guiniéʼ ni peru bisaanaʼ de guundaʼ Biblia. Neca zaqué, ndaaniʼ ladxiduáʼ bineʼ sentir casi ñaca bidxelaʼ ti tesoro ne qué ñuu dxi nusiaandaʼ ni.

Gudiʼdiʼ si gande iza, dxi napaʼ 82 iza bibiguetaʼ Juan ne Maite ndaaniʼ guidxi Bilbao ne yegánnacaʼ naa. ¡Guizáʼ biecheʼ ora biiyaʼ laacabe sti biaje! Raqué bidieeʼ cuenta qué nusiaandaʼ Jiobá naa, ngue runi biindanécabe naa Biblia sti biaje. Qué lica niree Juan ne Maite gana naa, purtiʼ stale biaje gunabadiidxaʼ laacabe ngueca ca ngueca. Ne bineʼ sentir caquiiñeʼ gunadiaʼgaʼ cani dxandíʼ rusiidiʼ Biblia que stale biaje ti ganda gaxhaʼ cani maca runeʼ cré que ndaaniʼ ladxiduáʼ. Bineʼ zacá purtiʼ racalaʼdxeʼ gannaʼ ximodo gusieneʼ cani caziideʼ lu Biblia que ca binnilidxeʼ ne ca xhamiguaʼ.

Guyuaanisaʼ lu ti guendaridagulisaa stiʼ ca testigu stiʼ Jiobá dxi napaʼ 87 iza, nabé nayecheʼ guyuaaʼ dxi que. Guiráʼ cani chichuunísadu que bicaadiágadu ti libana. Ca diidxaʼ guníʼ xpinni Cristu que yendácani ndaaniʼ ladxiduáʼ dede bisiguunacani naa. Bineʼ sentir casi ñaca Jiobá peʼ ngue caniʼné naa. Despué de guyuaanisaʼ que stale testigu gudiidxicaʼ naa neca stale de laacabe qué lica runibiáʼ naa.

XI MAʼ GULEENDUÁʼ:

Maca riníʼ iqueʼ Jesús nga zeeda gaca ti «neza» para guidxíñanu Dios (Juan 14:6). Peru ora biindaʼ Biblia jma binebiaʼyaʼ Jiobá, Dios ni racané Jesús laanu guidxíñanu ra nuu. Yanna maʼ randa rinieniáʼ Dios casi Bixhozeʼ ni nadxieeʼ ne casi ti xhamiguaʼ. Biindasiáʼ libru Acerquémonos a Jehováa bicaani naa guuyaʼ xipeʼ nga naquiiñeʼ guneʼ. Dxi gucuaaʼ libru que ti gueelaʼ si biindaʼ guidubi ni. Guizáʼ galán bineʼ sentir ora biziideʼ pabiáʼ rilaselaʼdxiʼ Dios binni.

Ora guiníʼ iqueʼ guiráʼ ni bineʼ para gannaʼ xipeʼ nga ni rusiidiʼ Biblia la? rietenalaʼdxeʼ ca diidxaʼ guníʼ Cristu: «Lainaba lu Dios, zudii laatu. Lauyubi, zadxela tu. Lauxhidxi náʼ, zaxele chuʼ tu» (Mateo 7:7). Yanna, cumu maʼ bicabi Biblia guiráʼ ni gunabadiidxaʼ dxiqué la? guizáʼ nayecheʼ runeʼ sentir ora gusiideʼ cani binni.

Neca maʼ napaʼ 90 iza la? cayaadxaruʼ guiziideʼ jma de Jiobá. Guiráʼ biaje chaaʼ ndaaniʼ Yoo stiʼ Reinu la? runeʼ sentir galán purtiʼ riziideʼ stale cosa sicarú ne nayecheʼ runeʼ sentir lade ca xpinni Cristu. Racalaʼdxeʼ guedandá dxi gusiideʼ binni ndaaniʼ Paraísu ni maʼ guníʼ Dios chiguni lu Guidxilayú riʼ (Apocalipsis 21:3, 4). Ne ni jma racalaʼdxeʼ nga guuyaʼ guiasa ca binni ni nadxieeʼ de lade gueʼtuʼ ne gusiideʼ laacabe ni na Biblia (Hechos 24:15). Guizáʼ racalaʼdxeʼ gusieneʼ laacabe xi bisigaʼdeʼ Dios naa dxi maʼ nagolaʼ.