Lagannaxhii ca hombre casi laacabe
DEDE iza 1992, huabí Grupu ni Zaniruʼ hermanu ni maʼ xadxí de naca binnigola para gacané laacaʼ gúnicaʼ xhiiñacaʼ. Ca xpinni Cristu ni maʼ biniisi lu stiidxaʼ Dios riʼ, nácacabe de «xcaadxi dendxu», ne nabé racanécabe ca comité napa Grupu ni Zaniruʼ (Juan 10:16).a Guiráʼ semana riécabe ora ridagulisaa comité ni runinécabe dxiiñaʼ ne rábicabe laacaʼ xi ruuyacabe caquiiñeʼ gaca. Grupu ni Zaniruʼ nga riníʼ xi gaca, peru laacabe nga ruuyacabe gaca cani. Laaca rinécabe ca hermanu ni nuu lu Grupu ni Zaniruʼ ora checaʼ ti asamblea internacional o ti asamblea especial. Ne nuu tiru laaca rigánnacabe xcaadxi yoo Betel ni nuu gadxé gadxé guidxi roʼ casi representante stiʼ Betel nuu Brooklyn. Runi ca hermanu riʼ intiica dxiiñaʼ gudiicabe laacaʼ né stale gana.
Sicaríʼ guníʼ tobi de ca hermanu ni cayacané grupu riʼ dede iza 1992: «Racané dxiiñaʼ ni runeʼ riʼ Grupu ni Zaniruʼ gucaa ique guni dxiiñaʼ ni biaanané». Sti hermanu ni maʼ ziné 20 iza de cayacané grupu riʼ, guníʼ: «Qué ñuu dxi niníʼ iqueʼ pa nicaaʼ ti dxiiñaʼ casi ndiʼ. Guizáʼ naroʼbaʼ ndaayaʼ riʼ».
Stale dxiiñaʼ nga maʼ bidii Grupu ni Zaniruʼ ca hermanu riʼ ne rusisaca grupu riʼ dxiiñaʼ nadipaʼ rúnicabe. Cadi dxandíʼ laaca nadxiinu ca hombre casi laacabe riʼ la? (Filipenses 2:29.)
a Xhoopaʼ comité nga napa Grupu ni Zaniruʼ, para gánnaluʼ xi dxiiñaʼ runi cada tobi la? biiyaʼ recuadru ra na «Rapa Grupu ni Zaniruʼ guiráʼ ni napa Reinu» ni zeeda lu capítulo 12 stiʼ libru Maʼ cayuni mandar Reinu stiʼ Dios.