Sacrificiu stiʼ Jesús: biáʼsipeʼ ni caquiiñeʼ gusigaʼdeʼ Bixhózenu laanu
«Irá ni nachaʼhui ne irá ni dxandí sicarú [...] zeeda ni de [Bixhózenu]» (SANTIAGO 1:17).
1. Xi guiráʼ cosa galán ribeendunu pur sacrificiu stiʼ Jesús.
PUR sacrificiu stiʼ Jesús zanda guicaanu stale ndaayaʼ. Pur laani, ca xiiñiʼ Adán ni guni ni jneza zanda gueeda gácacaʼ de familia stiʼ Dios. Sacrificiu stiʼ Jesús ca racané ni laanu gápanu oportunidad para qué chuʼ dxi gusaana de guibáninu nayecheʼ. Peru cadi ca nga si nga zanda gaca pur laani. Laaca racané ni guiénenu xcaadxi cosa jma risaca para guiráʼ ni nuu guibáʼ ne cani nuu lu Guidxilayú (Hebreos 1:8, 9).
2. a) Xii nga ca cosa risaca bizeeteʼ Jesús lu oración de padrenuestro. (Biiyaʼ dibuju ni zeeda ra ruzulú tema riʼ). b) Xi zadúʼyanu lu tema riʼ.
2 Chupa iza ante gatiʼ Jesús, bisiidiʼ ca discípulo stiʼ ximodo guni orarcaʼ: «Bixhózedu ni nuu guibáʼ, guisácapeʼ laluʼ. Gueeda Reinu stiluʼ. Gaca ni naluʼ ndaaniʼ guidxilayú, cásica raca ni guibáʼ» (Mateo 6:9, 10, TNM). Lu tema riʼ zadúʼyanu xi chonna cosa zanda gaca pur sacrificiu stiʼ Jesús: 1) guisaca lá Jiobá, 2) gueeda Reinu stiʼ Dios ne 3) gaca ni ná Dios.
«GUISÁCAPEʼ LALUʼ»
3. a) Xiñee biáʼsipeʼ lá ni napa Dios. b) Ximodo biʼniʼ biidiʼ Binidxabaʼ lá Jiobá.
3 Primeca ni gunabaʼ Jesús lu oración de padrenuestro que nga guisaca lá Dios. Ni canábabe nga gaca respetar lá Dios purtiʼ nayá ni. Ne biáʼsipeʼ lá ni napa Jiobá purtiʼ laani rusihuinni ni ximodo laabe. Laabe nga jma nandxoʼbe ne jma nacháʼhuibe lu guidubi naca universu. Ne Jesús gudxi Jiobá «Bixhozeʼ, lii nayaluʼ» (Juan 17:11, TNM). Cumu nayá Jiobá la? nayá guiráʼ ni rúnibe dede né ca ley stibe. Ndaaniʼ jardín ni guyuu Edén que bihuinni nabé nexhená Binidxabaʼ ra bicaa binni guiníʼ ique pa napa Dios derechu quixheʼ ley para binni. Guniʼbe ni cadi dxandíʼ de Jiobá ne biʼniʼ biidibe lá (Génesis 3:1-5).
4. Ximodo bisisaca Jesús lá Dios.
4 Maʼ gadxepeʼ guca Jesús de Binidxabaʼ purtiʼ laa gunnaxhii lá Jiobá. Nga runi biʼniʼ guiráʼ ni gunda para gusisaca lá Dios (Juan 17:25, 26). Ximodo bisisácabe ni yaʼ. Pur cani bíʼnibe ne cani bisiidibe. Zacá nga gucané Jesús xcaadxi binni gúʼyacaʼ jneza ca ley stiʼ Jiobá ne guiráʼ ni guinabaʼ Dios laanu gúninu rúnibe ni para cueendunu ni galán. Biblia ná: «Riecheʼ ora guneʼ ni naluʼ, Dios stinneʼ, ne nuu ca ley stiluʼ ca lugar jma nagaʼchiʼ napaʼ dentru de naa. Riniéʼ galán de ca cosa jneza ni huayúniluʼ lade stale binni ni dagulisaa. ¡Biaa! Qué rucueeza diáʼ ruaaʼ de guneʼ ni. Jiobá, ne lii nanna dxíchiluʼ ni. Ne cani jneza ni rúniluʼ qué riaananiáʼ cani ndaaniʼ ladxiduáʼ. Riniéʼ qué rucheeneluʼ guirutiʼ ne modo rulaluʼ binni. Ora guiniéʼ lade stale binni dagulisaa qué rusaanaluʼ de gannaxhiiluʼ ne riniʼluʼ ni dxandíʼ, gastiʼ qué rucaacheʼ» (Salmo 40:8-10). Qué nucheené Jesús Jiobá neca nabé naná guiráʼ ni bitiidiʼ Binidxabaʼ laabe para gútibe. Jesús bisihuinni zanda guzuubaʼ ti binni qué gapa donda stiidxaʼ Jiobá módopeʼ guinábabe ni laa.
5. Ximodo zanda gusihuínninu rusisácanu lá Jiobá.
5 Laanu yaʼ. Ximodo zanda gusihuínninu nadxiinu lá Jiobá. Pur cani gúninu. Ribeza Jiobá gácanu nayá (biindaʼ 1 Pedro 1:15, 16). Nga runi, laasibe nga runi adorarnu ne ruzúʼbanu stiidxabe de guidubi ladxidoʼno. Ne rúninu stipa pur gúninu casi maʼ bisiidiʼ Jiobá laanu dede né ora sanándacabe laanu. Ora rinándanu ni ná ca ley stibe rusisácanu labe (Mateo 5:14-16). Ne rusihuínninu jneza ca ley stibe ne cusiguii Binidxabaʼ. Dxandíʼ, rucheʼnu purtiʼ imperfectu laanu. Peru raca arrepentirnu ne rúninu stipa pur cadi gúninu xiixa ni guni biidiʼ lá Jiobá (Salmo 79:9).
6. Xiñee zanda guʼyaʼ Dios laanu casi binni sin donda neca nácanu binni ruchee.
6 Pa nácanu de ca xpinni Cristu ni bibí o pa nuunu lade cani zeeda gaca «xcaadxi dendxu», runi perdonar Jiobá ni guchéʼnenu laa pa nápanu fe lu sacrificiu stiʼ Jesús. Cani gudii xquendanabani laabe la? rudiibe lugar guni adorarcaʼ laabe. Ruuyabe ca xpinni Cristu ni bibí casi binni sin donda ne ricaabe laacaʼ casi xiiñibe. Laaca sin donda ruuyabe ca binni ni zeeda gaca «xcaadxi dendxu» ne ricaabe laacaʼ casi xhamígube (Juan 10:16; Romanos 5:1, 2; Santiago 2:21-25). Pur sacrificiu stiʼ Jesús zanda gaca xhamígunu Bixhózenu ne gusisácanu labe.
«GUEEDA REINU STILUʼ»
7. Xi ndaayaʼ zanda guedané Reinu stiʼ Dios pur sacrificiu stiʼ Jesús.
7 Lu oración de padrenuestro que guníʼ Jesús sicaríʼ: «Gueeda reinu stiluʼ». Xiñee caquiiñeʼ Reinu stiʼ Dios sacrificiu stiʼ Jesús. Nánnanu Jesús ne 144,000 binni ni bibí lu Guidxilayú nga nuu lu Reinu stiʼ Dios. Pur sacrificiu stiʼ Jesús randa riasa ca binni riʼ de lade gueʼtuʼ para guibánicaʼ guibáʼ (Apocalipsis 5:9, 10; 14:1). Racá zácacabe rey ne sacerdote ne zuni mandarnécabe Jesús lu Guidxilayú riʼ pur 1,000 iza. Lu tiempu ca, zaquiiñeʼ Dios Reinu stiʼ para guni Guidxilayú riʼ ti paraísu ne zacanebe guiráʼ binni gácacaʼ perfectu. Dxicaruʼ nga maʼ zaca ca xpinni Jiobá ni nuu guibáʼ ne lu Guidxilayú ti familia si (Apocalipsis 5:13; 20:6). Zunitilú Jesús Binidxabaʼ ne zabeebe guiráʼ guendanagana ni maʼ guca pur laa (Génesis 3:15).
8. a) Ximodo gucané Jesús ca discípulo stiʼ guiénecaʼ risaca Reinu stiʼ Dios. b) Ximodo rusihuínninu nuunu pur Reinu.
8 Gucané Jesús ca discípulo stiʼ guiénecaʼ risaca Reinu stiʼ Dios. Ximodo bíʼnibe ni yaʼ. Cásipeʼ guyuunísabe bizulube guniʼbe de ca diidxaʼ nacubi ne galán stiʼ Reinu stiʼ Dios guiráʼ ladu (Lucas 4:43). Ne laaca gúdxibe ca discípulo stibe naquiiñeʼ chigusiidicaʼ binni de laabe dede ca lugar ni nuu jma zitu lu Guidxilayú (Hechos 1:6-8). Yanna riʼ, ora chuʼ tu guni predicar binni rudii ni laacaʼ oportunidad para guiziidicaʼ de sacrificiu stiʼ Jesús ne guibánicaʼ dxi guni mandar Reinu stiʼ Dios. Rusihuínninu qué rusaananu Reinu ca ora racanenu ca xpinni Cristu ni bibí guireeche diidxaʼ lu guidubi Guidxilayú (Mateo 24:14; 25:40).
«GACA NI NALUʼ»
9. Xiñee nuunu seguru zaca cumplir ni gudixhe ique Dios para binni.
9 Lu oración de padrenuestro que laaca guníʼ Jesús: «Gaca ni naluʼ». Xii ngue nuube guiniʼbe yaʼ. Ora guiníʼ Jiobá chiguizaaca xiixa, raca ni cásipeʼ nabe (Isaías 55:11). Neca maʼ qué niná Binidxabaʼ nuzuubaʼ diidxaʼ peru qué huacueeza ni de guni Jiobá ni gudixhe ique. Xii ngue gudixhe ique Dios ñaca lu Guidxilayú yaʼ. Gúpabe gana nuchá ca xiiñiʼ Adán ne Eva, ni qué gapa donda, Guidxilayú riʼ de xiiñicaʼ (Génesis 1:28). Pa ñati Adán ne Eva sin ñápacaʼ xiiñicaʼ la? qué ñaca cumplir diʼ ni gudixhe ique Dios ora guníʼ guchabe Guidxilayú riʼ de xiiñibe. Nga runi bidii Jiobá lugar gápacabe xiiñicabe. Guiráʼ binni gusihuinni napa fe rudii sacrificiu stiʼ Jesús laacaʼ ti oportunidad de gácacaʼ perfectu ne guibánicaʼ sin gáticaʼ pa gápacaʼ fe. Nadxii Jiobá binni ne racaláʼdxibe guibáninu galán casi gudixhe íquebe ñaca ni.
10. Ximodo zacané sacrificiu stiʼ Jesús ca binni ni maʼ guti.
10 Mil millón binni maʼ guti sin ñunibiáʼ Jiobá. Xi zazaaca né laacabe yaʼ. Cumu racalaʼdxiʼ Dios guibani binni la? zándísabe cani maʼ guti de lade gueʼtuʼ. Ne zanda guiasa ca binni ca de lade gueʼtuʼ pur sacrificiu stiʼ Jesús. Ora maʼ guiásacabe ca zápacabe oportunidad de guiziidicabe de Jiobá ne guibánicabe sin gáticabe (Hechos 24:15). Cumu ra nuu Jiobá nga cadá guendanabani la? zácabe Bixhoze guiráʼ binni ni guiasa de lade gueʼtuʼ (Salmo 36:9). Nga runi napa Jesús razón ora guníʼ lu oración de padrenuestro que Jiobá nga Bixhózenu «ni nuu guibáʼ» (Mateo 6:9, TNM). Maʼ bisaana Jiobá ti dxiiñaʼ risaca lu náʼ Jesús: guindisaʼ ca binni ni maʼ guti de lade gueʼtuʼ. Nga runi, guníʼ Jesús: «Naa nga rusibane gueʼtuʼ, ne naa nga rudiee enda nabani» (Juan 6:40, 44; 11:25).
11. Xi maca guníʼ Jiobá zazaaca né gran muchedumbre.
11 Laaca guníʼ Jesús: «Purti irá tu guni ni na Dios la? ca ngue nga biche ne bizana ne jñaaʼ» (Marcos 3:35). Ni racalaʼdxiʼ Dios nga guni adorar binni de guiráʼ guidxi, de guiráʼ raza ne de guiráʼ diidxaʼ laa. Biblia ná naca ca binni riʼ ti gran muchedumbre ni guirutiʼ zanda ugabaʼ. Laacabe nápacabe fe lu sacrificiu stiʼ Jesús ne racaláʼdxicabe guzuubacabe stiidxaʼ Dios. Laaca rusisácacabe laabe ne riníʼcabe: «Dios stinu ni zuba lu trono bilá laanu, laa ne Dendxu huiiniʼ» (Apocalipsis 7:9, 10).
12. Xi rusiidiʼ oración de padrenuestro laanu de cani naguixhe ique Jiobá para binni.
12 Oración de padrenuestro ca rusiidiʼ ni laanu stale cosa de Jiobá ne de cani naguixhe íquebe para binni. Primeru, rizíʼdinu naquiiñeʼ gúninu guiráʼ ni gándatiʼ pur gusisácanu lá Dios ne zaqueca laabe (Isaías 8:13). Pur sacrificiu stiʼ Jesús zanda guilanu ne gusisácanu lá Dios. Lá Jesús riníʼ ni «Jiobá nga ni rulá». Guiropa, rizíʼdinu zaquiiñeʼ Jiobá Reinu stiʼ para ganda guicaa binni ni guzuubaʼ diidxaʼ guiráʼ ndaayaʼ ni guedané sacrificiu stiʼ Jesús. Ne guionna, rizíʼdinu gastiʼ qué zanda gucueeza de gaca ni ná Jiobá (Salmo 135:6; Isaías 46:9, 10).
GUDIʼNU XQUÍXEPEʼ PUR SACRIFICIU STIʼ JESÚS
13. Xiñee riuʼnísanu.
13 Ti modo risaca gusihuínninu rudiʼnu xquíxepeʼ pur sacrificiu stiʼ Jesús nga gudiʼnu xquendanabáninu Jiobá ne chuʼnísanu. Zacá nga zusihuínninu nápanu fe sacrificiu stiʼ Jesús ne maʼ «sti [Jiobá] laanu» (Romanos 14:8). Ne ra chuʼnísanu ca rinábanu Jiobá gacané laanu guiá «ladxidóʼ no», o conciencia stinu (1 Pedro 3:21). Ne ricabi Dios laanu ra rudii laanu ca ndaayaʼ ni redané sacrificiu stiʼ Jesús. Nga runi, nuunu seguru zudiibe laanu guiráʼ ni maʼ bidii stiidxabe (Romanos 8:32).
Ximodo rusihuínninu rudiʼnu xquíxepeʼ pur sacrificiu stiʼ Jesús. (Biiyaʼ párrafo 13 ne 14).
14. Xiñee cayuni mandar Dios gannaxhiinu xcaadxi binni.
14 Guiráʼ xixé ni runi Jiobá runi ni purtiʼ nadxii laanu. Racaláʼdxibe guiráʼ ni guni adorar laabe chinanda ejemplu stibe ne gannaxhiisaacaʼ (1 Juan 4:8-11). Ora rannaxhiinu binni rusihuínninu racaláʼdxinu gácanu xiiñiʼ Bixhózenu ni nuu guibáʼ (Mateo 5:43-48). Biblia ná mandamientu ni jma risaca nga gannaxhiinu Jiobá. Peru guiropa mandamientu jma risaca nga gannaxhiinu xcaadxi binni (Mateo 22:37-40). Ti modo gusihuínninu nadxiinu binni nga guinínenu laacaʼ de ca noticia galán stiʼ Reinu. Pa guzúʼbanu stiidxaʼ Dios ra gannaxhiinu xcaadxi binni, ne jmaruʼ si ca hermanu stinu la? zusihuínninu «dxandí nadxii nu laabe» (1 Juan 4:12, 20).
CA NDAAYAʼ RICAANU PUR SACRIFICIU STIʼ JESÚS
15. a) Xi ndaayaʼ rudii Jiobá laanu ca dxi riʼ. b) Xi ndaayaʼ zacaanu lu ca dxi ni zeeda ca.
15 Maʼ bidii stiidxaʼ Jiobá laanu zanda guxhiá stóndanu pa gápanu fe lu sacrificiu stiʼ Jesús. Ndiʼ riníʼ zanda guni perdonarbe guiráʼ stóndanu (biindaʼ Hechos 3:19-21). Casi maʼ bidúʼyanu, pur sacrificiu stiʼ Jesús randa ricaa Jiobá caadxi binni casi xiiñiʼ para guibánicaʼ guibáʼ. Laacabe nga ca xpinni Cristu ni bibí (Romanos 8:15-17). Sti cosa ni maʼ bidúʼyanu nga cayuni invitar Jiobá ca xpinni Cristu ni zeeda gaca «xcaadxi dendxu» gácacaʼ parte de familia stibe lu Guidxilayú. Gacasícabe perfectu, zadíʼdicabe últimu prueba. Pa qué gusaanacabe Jiobá la? laa zacaa laacabe ne laaca zácacabe xiiñiʼ (Romanos 8:20, 21; Apocalipsis 20:7-9). Qué zusaana Jiobá de gannaxhii ca xiiñiʼ. Ne pur sacrificiu stiʼ Jesús, qué zusaana de guicaanu ndaayaʼ (Hebreos 9:12). Maʼ bidii Jiobá laanu regalu riʼ ne guirutiʼ zaxha ni laanu.
16. Ximodo rulá sacrificiu stiʼ Jesús laanu.
16 Pa gaca arrepentirnu de ca pecadu stinu, gastiʼ zanda guni Binidxabaʼ para gucueeza de gácanu parte de familia stiʼ Jiobá. Bidii Jesús xquendanabani «ne ma qué ziuu ru dxi guni be ni». Ndiʼ riníʼ maʼ qué ziaxa diʼ pur laanu sti biaje (Hebreos 9:24-26). Bisaanané Adán laanu guendaguti, peru ra gutiʼ Jesús pur laanu zanda guibáninu sin gátinu. Sacrificiu stiʼ Jesús zanda gulá laanu de guidxilayú stiʼ Binidxabaʼ riʼ ne maʼ qué zadxíbinu guendaguti (Hebreos 2:14, 15).
17. Xi runi sentirnu ora guiníʼ íquenu pabiáʼ nadxii Jiobá laanu.
17 Zanda chuʼnu seguru zaca guiráʼ ni maʼ bidii stiidxaʼ Jiobá. Ne cásica qué ruchaa ca ley stiʼ naturaleza, laabe laaca qué ziuu dxi guchaabe. Qué ziuu dxi gucheenebe laanu (Malaquías 3:6). Cadi guendanabani si stinu nga bidii Jiobá laanu, sínuque laaca rusihuínnibe nadxiibe laanu. «Nanna nu ne runi cre nu nadxii Dios laanu. De Dios nga reeda enda ranaxhii» (1 Juan 4:16). Cumu runi Jiobá guiráʼ cani rudii stiidxaʼ la? maʼ cadi candaa zaca Guidxilayú riʼ ti paraísu sicarú. Guiráʼ binni zinándacaʼ ejemplu stiʼ Jiobá ne zannaxhiisaacaʼ. Dxi ca, guiráʼ ca xpinni Dios ni nuu guibáʼ ne lu Guidxilayú zusisaca laabe ne zaniʼcaʼ: «Qué chuʼ dxi guiaana dxí nu de usisaca nu Dios stinu ne udíʼ nu diuxquixe laa. Stibe irá enda nandxóʼ, irá enda biaaniʼ, irá enda risaca ne irá stipa» (Apocalipsis 7:12).