3 Racané ni laanu gudxíʼlunu ca guendanagana stinu

CA GUENDAHUARÁ NI QUÉ RIANDA

Rosa guníʼ: «Napaʼ ti guendahuará ni raca heredar ni nabé rusiuubaʼ naa, nga runi raca nagana para naa guneʼ caadxi cosa ni bineʼ dxiqué». Tobi de laacani nga maʼ qué ñanda ñaca concentrarbe ora cayuni estudiarbe Biblia ne xcaadxi tema zeeda luni. Peru ca diidxaʼ guníʼ Jesús lu Mateo 19:26, guizáʼ guluu cani gana laabe, racá ná: «Para Dios gasti ni nagana». Guyuu biaje qué ñanda ñuundabe pur ca yuubaʼ stibe, peru bidxélabe xcaadxi forma guni estudiarbe, bizulú bicaadiágabe grabación stiʼ Biblia ne ca publicación.a Laabe guniʼbe: «Pa qué nucaadiaga cani la? qué ñanda ñuaaʼ naguidxi en sentidu espiritual».

Ora riuu Rosa triste pur maʼ qué randa runi stale cosa casi dxiqué, riguixhedxí ca diidxaʼ ni zeeda lu 2 Corintios 8:12 ladxidoʼbe, ná ni: «Pa udii binni de idubi ladxidóʼ, ziulaʼdxi Dios ni biaʼ tiica laani. Nanna be pabiáʼ napa binni, ne qué zanaba be laa ni qué gapa». Ndiʼ rusietenalaʼdxiʼ ni laabe riecheʼ Dios pur ni randa rúnibe, purtiʼ rúnibe stipa neca huarabe.

ORA GATI TI BINNI NI NADXIINU

Diana, gunaa ni maca bizéʼtenu guníʼ: «Guizáʼ gucanaʼyaʼ dxi guti xiiñedxaapaʼ de 18 iza, dede guniʼ iqueʼ maʼ qué zanda guibaneʼ purtiʼ maʼ bichaa guiráʼ ni». Ca diidxaʼ ni cá lu Salmo 94:19, guluu cani gana laabe, sicaríʼ biindaʼ ti salmista: «Ora bidale cani ruchiiñaʼ xquendabiaaneʼ, lii gudixhedxiluʼ xhialmaʼ pur guiráʼ ni gúdxiluʼ naa». Laabe guniʼbe: «Gunabaʼ Jiobá gacané naa guidxelaʼ xiixa guneʼ para cadi guneʼ sentir stale yuubaʼ».

Diana biʼniʼ dxiiñaʼ casi voluntaria ne ngue gudixhedxí ni ladxidoʼbe. Ra gudiʼdiʼ tiempu biʼniʼ sentirbe casi ca crayola ni riquiiñeʼ ca xcuidi para gutieecaʼ: neca guilaa cani zándaruʼ gutiee cani. Biziidibe, neca zeeda gácabe casi ca crayola ni maʼ gulaa ca, zanda gacanérube xcaadxi binni. Laabe guniʼbe: «Bidieeʼ cuenta ora riquiiñeʼ ca principiu ne guiráʼ ni rusiidiʼ Biblia para quixhedxieeʼ ladxidóʼ ca binni rudieeʼ estudiu de lu Biblia, casi ñaca Jiobá peʼ nga caguixhedxí ladxiduáʼ». Bíʼnibe ti lista de caadxi binni zeeda lu Biblia ni gudiʼdiʼ stale yuubaʼ. ¿Xi bisiidibe yaʼ? «Guirácabe guizáʼ biʼniʼ orárcabe Dios». Laaca bisiidibe «pa qué guni estudiarluʼ Biblia, qué zadxeʼluʼ ni gacané lii».

Peru huayacané Stiidxaʼ Dios Diana cadi gucaa ique ca cosa ni maʼ guca, sínuque ca cosa galán ni chigueeda despué. Esperanza ni cá lu Hechos 24:15, guluu ni gana laabe, ra ná: «Zusibani Dios gueʼtuʼ, cásica ni nachaʼhui zaqueca ni cadi nachaʼhuiʼ». ¿Ñee dxandíʼ runi crebe zanda gusibani Jiobá xiiñidxaapabe la? Gudiʼnu lugar guicábibe: «Nannadxicheʼ zuuyaʼ xiiñedxaapaʼ. Bixhozeʼ ni nuu guibáʼ maʼ nanna padxí guuyaʼ laabe sti biaje. Ruxuiʼluaʼ nuaaniáʼ laabe ndaaniʼ jardín stidu ne caguiidxeʼ laabe né stale cariñu cásica primé biaje biiyaʼ laabe dxi gúlebe».