Ora redané Dios castigu, ¿ñee riguixhenabe binni dede ante la?

TI LOCUTOR de radiu nanna ximodo nuu clima. Ne nánnabe zeeda ti tormenta ni zuniná ti lugar ra nabeza stale binni. Cumu rizaaláʼdxibe chuʼ binni galán la? riguixhenabe laacaʼ ti gánnacaʼ xi gúnicaʼ para cadi guninani laacaʼ.

Zacaca nga runi Jiobá, caguixhenabe binni purtiʼ zedadxiña ti tormenta jma feu que intiica desastre natural ni huayaca. ¿Ximodo rúnibe ni yaʼ? ¿Ne xiñee nánnanu cudiibe tiempu binni para guni xiixa? Para gánnanu xiñee, guidúʼyanu ximodo gudixhená Jiobá binni dxiqué.

MODO GUDIXHENÁ DIOS BINNI DXIQUÉ

Tiempu bibani ca binni ruzeeteʼ Biblia, stale biaje gudixhená Jiobá binni ne guniʼbe zuni castigarbe ca ni qué naʼ guni ni ná ley stibe neca nánnacaʼ xi ná ni (Prov. 10:25; Jer. 30:23). Dede ante gudixhená Jiobá binni de caadxi tormenta o castigu ni gueeda luguiacaʼ pa qué guzuubacaʼ diidxaʼ ne laaca gúdxibe laacaʼ xi naquiiñeʼ gúnicaʼ para chuuláʼdxibe ni rúnicaʼ (2 Rey. 17:12-15; Neh. 9:29, 30). Ne para cuʼbe gana binni guni ni jneza la? stale biaje biquiiñebe ca xpínnibe ni qué rusaana laabe para gábicaʼ binni xi castigu gueeda luguiacaʼ ne gábicaʼ laacabe naquiiñeʼ guchaacabe nagueendaca (Amós 3:7).

Tobi de ca xpinni Dios ni ruzuubaʼ diidxaʼ que nga Noé. Gúcabe nadxibalú ne stale iza gúdxibe ca binni malu ne ca ni runi cosa dxabaʼ zeeda ti Diluviu ni zunitilú laacaʼ (Gén. 6:9-13, 17). Laaca gúdxibe laacaʼ xi naquiiñeʼ gúnicaʼ para guilacaʼ. Cumu bíʼnibe ni né stale gana la? binibiáʼcabe laabe casi «hombre ni biʼniʼ predicar ni jneza» (2 Ped. 2:5, TNM).

Neca qué nusaana Noé de ñuni predicar, qué ñapa ca binni que fe ne qué nulábicaʼ mensaje stiʼ Dios ne pur nga gúticaʼ ora beeda Diluviu que ne ziné guiracaʼ (Mat. 24:39; Heb. 11:7). Nin para guiníʼcabe qué niguixhená Dios laacabe.

Xcaadxi biaje, gudxi Jiobá binni zeeda ti tormenta o castigu luguiacaʼ ne bidiibe laacaʼ tiempu ni caquiiñecaʼ para gúnicaʼ xiixa. Zacá bíʼnibe ora biseendabe chii plaga Egipto. Guidúʼyanu ni guca ra bizaa gadxe plaga que, dxi biaba granizu ni bininá laacabe. Biseendaʼ Jiobá Moisés ne Aarón para quixhenacaʼ faraón ne ca oficial stiʼ. Cumu sti dxi queca chiguiaba granizu que, ¿ñee nápacabe tiempu para guyúbicabe paraa gucachilúcabe la? Biblia ná: «Guiráʼ ca oficial stiʼ faraón ni biʼniʼ cré stiidxaʼ Jiobá nagueendaca yenecaʼ ca siervu sticaʼ ne ca maniʼ sticaʼ ti lugar para guiaapacaʼ, peru ca ni qué nulabi stiidxaʼ Jiobá la? bisaanacaʼ ca siervu sticaʼ ne ca maniʼ sticaʼ lu layú» (Éx. 9:18-21). Rihuinni dxíchica dede ante gudixhená Dios laacabe. Ca binni ni bizuubaʼ diidxaʼ, qué ñuniná plaga que laacaʼ.

Laaca gudixhená Dios faraón ne ca oficial stiʼ ante gueeda últimu plaga que. Peru qué nulábicaʼ mensaje que ne qué ñúnicaʼ gastiʼ (Éx. 4:22, 23). Nga runi gutiʼ baʼduʼ lugola sticaʼ. ¡Aque triste ndiʼ xa! (Éx. 11:4-10; 12:29). ¿Gúpacabe tiempu para ñúnicabe xiixa la? Gúpacabe pue. Gudxi Moisés ca israelita que maʼ gaxha nuu plaga que ne gúdxibe laacaʼ ximodo gulacaʼ familia sticaʼ (Éx. 12:21-28). ¿Panda binni bizuubaʼ diidxaʼ yaʼ? Chonna millón de israelita biree de Egipto ne qué ñaba castigu stiʼ Dios luguiacaʼ, ládecabe zeeda stale binni ni cadi israelita, ne caadxi binni de Egipto (Éx. 12:38).

Ca ejemplu ni bidúʼyanu riʼ, rusihuínnicani ora quixhená Jiobá binni la? siempre rudiibe laacaʼ tiempu biaʼ caquiiñecaʼ para ganda gúnicaʼ xiixa (Deut. 32:4). ¿Xiñee rúnibe ni yaʼ? Apóstol Pedro bisiene xi racalaʼdxiʼ Jiobá: «Cabeza be inaba irá binni perdón laabe, purti qué racalaʼdxi be initilú nin tobi» (2 Ped. 3:9). Rizaalaʼdxiʼ Dios binni. Ne racaláʼdxibe guinabaʼ binni perdón laabe ne guzuubacaʼ stiidxabe ti cadi gaca castigarcaʼ (Is. 48:17, 18; Rom. 2:4).

GUZÚʼBANU STIIDXAʼ DIOS ORA QUIXHENÁ LAANU

Tiempu riʼ laaca naquiiñeʼ gulabi guiráʼ binni mensaje ni careeche lu guidubi naca Guidxilayú riʼ. Dxi bibani Jesús lu Guidxilayú guníʼ zanitilú binni ni qué ruzuubaʼ diidxaʼ lu gran tribulación (Mat. 24:21). Bisiene chaahuibe lu ti profecía xi zuuyaʼ ca xpínnibe ne xi zadxaagalucaʼ ra maʼ zidxiña dxi guinitilú binni malu. Guniʼbe zaca stale cosa lu guidubi Guidxilayú ne maʼ cadúʼyanu cani ca dxi riʼ (Mat. 24:3-12; Luc. 21:10-13).

Lu profecía ca rihuinni cayabi Jiobá binni guzuuba diidxaʼ. Purtiʼ racaláʼdxibe guibani ca binni ruzuubaʼ diidxaʼ jma galán yanna ne guicaacaʼ ndaayaʼ lu ti guidxilayú cubi «ra zaca puru si ni jneza» (2 Ped. 3:13, TNM). Para gapa binni fe lu ca promesa stiʼ Jiobá, cayábibe laacaʼ «ca noticia galán stiʼ Reinu» para ganda guilacaʼ. Maca guníʼ Jesús zaca predicar «lu guidubi guidxilayú para gunadiaga guiráʼ xixé guidxi» ca noticia galán ca (Mat. 24:14, TNM). Maʼ gudixhe chaahuiʼ Dios modo guni predicar ca xpinni ne maʼ cayúnicabe ni lu 240 guidxi ne territorio. Caguixhenabe binni ne racaláʼdxibe guzuubacaʼ diidxaʼ ti ganda guilacaʼ de tormenta o castigu gueedanebe (Sof. 1:14, 15; 2:2, 3).

Nga runi, lugar de guinabadiidxanu pa rudii Jiobá tiempu binni para ganda guni xiixa ante gueeda castigu luguiáʼ la? ni jma jneza guinabadiidxanu nga pa zulábicabe Dios laga nuuruʼ tiempu. Laanu ca xpinni Dios, cadi gusaana de gacanenu guiráʼ binni ti guilacaʼ dxi guinitilú guiráʼ xixé binni malu.