Bisihuinni de que riníʼ íqueluʼ casi ti precursor
1. Ximodo nga iníʼ íquenu casi ti precursor.
1 Guiráʼ cani rucheeche diidxaʼ, nácacaʼ precursor o coʼ la? zanda iníʼ íquecaʼ casi ti precursor. Para laacabe nabé risaca nga gúnicabe ni biʼniʼ mandar Jesús laacabe, gucheechecabe diidxaʼ ne guyúbicabe binni chinanda Jesús (Mat. 28:19, 20; Hech. 18:5). Cumu riuucabe xizaa pur stuudxi la? rúnicabe stale stipa pur gucheechecabe diidxaʼ (Mat. 9:36; Hech. 20:24). Ya, ca xpinni Jiobá nuucaʼ listu para gúnicaʼ intiica cosa para acanecaʼ binni iziidiʼ xii nga ni dxandíʼ (1 Cor. 9:19-23). Guidúʼyanu ejemplu stiʼ tobi hombre ni guníʼ ique zacá: Felipe, ni bicheeche diidxaʼ.
2. Ximodo zanda chinanda ca binnigola ne ca sierbu ministerial ca modo bicheeche Felipe diidxaʼ ne stale gana yaʼ.
2 Ora gucheechenu diidxaʼ ne ora gusiidinu. Felipe gupa stale dxiiñaʼ risaca lade ca binni ridagulisaa ni guyuu primé siglu que (Hech. 6:1-6). Peru, lade guiráʼ ni la? laabe bicheechebe diidxaʼ ne stale gana (Hech. 8:40). Zaqueca ni yanna riʼ, ca binnigola ne ca sierbu ministerial zanda gusihuínnicabe de que ríníʼ íquecabe casi ti precursor ra gunicacabe ca dxiiñaʼ nápacabe ne sanírucabe lu guendarucheeche diidxaʼ ne stale guendanayecheʼ. ¡Pabiáʼ racané ndiʼ modo riníʼ ique ca binni ridagulisaa ca! (Rom. 12:11.)
3. Ximodo zanda gusihuínninu de que riníʼ íquenu casi ti precursor ora idxagalunu guendanagana yaʼ.
3 Guti si Esteban la? biasa stale tu uzánanda ca disípulo que ne gúpacabe stale guendanagana. Peru Felipe, aparte de que qué nusaanabe de nucheechebe diidxaʼ la? bíʼnibe ti dxiiñaʼ risaca, bizulú bicheechebe diidxaʼ ra nuu ca binni de Samaria (Hech. 8:1, 4-6, 12, 14-17). Laanu laaca zanda gúninu casi bíʼnibe ra gucheechenu ca diidxaʼ nacubi ne galán riʼ ra nuu tutiica binni neca gápanu guendanagana (Juan 4:9).
4. Xi ejemplu bidii Felipe laanu casi tobi ni nanna gusiidiʼ.
4 Lu historia ni caníʼ ra guyuunisa eunuco etiope que rihuinni de que Felipe nabé nánnabe iquiiñebe Stiidxaʼ Dios casi ti maestru (Hech. 8:26-38). Sti modo rihuinni de que riníʼ íquenu casi ti precursor nga gánnanu iquiiñenu Biblia jneza ne gusiénenu binni de lu Xquiʼchiʼ Dios (Hech. 17:2, 3). Cásica Felipe la? laaca rúninu stipa pur gucheechenu ca diidxaʼ nacubi ne galán riʼ ratiica nuunu ne ora gúʼyanu zanda guidxélanu binni.
5. Xi zanda guni cani napa xiiñiʼ para acanecaʼ laacabe ti iníʼ íquecabe casi ti precursor yaʼ.
5 Binnilídxinu ne binni ridagulisaanenu. Dxandíʼ, ejemplu ni gulaʼquiʼ Felipe que bicaa ni ca xiiñidxaapabe guni zaqueca (Hech. 21:9). Laaca zaqueca ni yanna riʼ, bixhoze ne jñaa binni ni rúnicaʼ primeru xhiiñaʼ Reinu lu xquendanabánicaʼ la? riguucabe gana xiiñicabe guni zacaca. Bixhoze binni ni rucheeche diidxaʼ ne guendanayecheʼ neca maʼ bidxagacaʼ despué de ti semana dxiiña la? zuniibicabe ladxidóʼ ca xiiñicabe (Pro. 22:6).
6. Ximodo zanda gusihuínninu de que rusisácanu ca precursor ni nuu lade ca binni ridagulisaanenu yaʼ.
6 Felipe la? sicarupeʼ bidxagalube Pablu ne Lucas, cani qué nusaana de ñuni xhiiñaʼ Jiobá ne stale gana (Hech. 21:8, 10). Ca dxi stinu riʼ, ximodo zanda gusihuínninu de que rudiinu xquíxepeʼ ne nuunu acanenu cani rucheeche diidxaʼ ne stale gana riʼ yaʼ. Zanda gábinu ca precursor ca gucheechenenu laaca diidxaʼ siadóʼ o ca huadxí ora irútipeʼ tu riree (Fili. 2:4). Stobi ni zanda gúninu nga guni inbitarnu laacabe ra lídxinu para chúʼnenu laacabe ti ratu nayecheʼ. Neca gadxé gadxé nga modo nabáninu la? gúninu stipa pur gusihuínninu de que riníʼ íquenu casi ti precursor.