Cadi usaananu de ucheechenu diidxaʼ ne stale gana
1 Jesús maca nánnabe de que huaxiéʼ dxi ngue nápabe para gúnibe xhiiñaʼ bixhózebe lu Guidxilayú (Juan 9:4). Pur nga la? bicheechebe diidxaʼ ne stale gana, ne bisiidibe ca discípulo stibe gúnicaʼ zaqueca (Luc. 4:42-44; 8:1; 10:2-4). Qué nisaca diʼ jma para laabe nuyúbibe ximodo ñápabe bidxichi (Mat. 8:20). Nga ucané laabe unduuxebe dxiiñaʼ ni bidii Jiobá laabe gúnibe (Juan 17:4).
2 Huaxiéʼ dxi nápanu. Ca dxi nápanu para ucheechenu diidxaʼ «idubi naca guidxilayú» la? laaca huaxiéʼ cani (Mat. 24:14). Ca diidxaʼ riguixhená ni zeeda ndaaniʼ Biblia culuíʼ cani laanu de que maʼ gáxhapeʼ nuunu de dxi gueeda fin ca. Qué zandaa diʼ, cani qué runibiáʼ Dios ne cani qué ruzuuba stiidxaʼ Señor Jesús la? zanitilucaʼ ne maʼ qué ziuu dxi ibánicaʼ (2 Tes. 1:6-9). Dxi initilúcabe ca málasi guedandani (Luc. 21:34, 35; 1 Tes. 5:2, 3). Ca binni ca naquiiñeʼ udiicaʼ cuenta de ni chigaca ca, ne dxiiñaʼ ni nápanu nga acanenu laacabe uyúbicabe favor stiʼ Jiobá laga zándaruʼ idxélacabe ni (Sof. 2:2, 3).
3 Gúninu biaʼ gándatiʼ. Cumu ca xpinni Dios maʼ nánnacaʼ de que «ma huaxiéʼ dxi riaadxa» la? jma nga rúnicabe xhiiñaʼ Reinu (1 Cor. 7:29-31; Mat. 6:33). Para ganda gúnicabe jma lu xhiiñaʼ Reinu la? nuu bíchinu o bizánanu qué ruyúbicaʼ gápacaʼ jma bidxichi o qué ricá íquecaʼ ugaandacaʼ xiixa para laacaʼ (Mar. 10:29, 30). Xcaadxi la? rúnicaʼ «xhiiña Señor biaʼ ra ganda tiʼ» neca qué tiidigá ca endanagana sticaʼ (1 Cor. 15:58). Xcaadxi la? maʼ xadxí de rucheechecaʼ diidxaʼ ne qué liica huasaana de gúnicaʼ ni (Heb. 10:23). Jiobá rusisácabe stálepeʼ iráʼ stipa ni rúninu pur Reinu stibe (Heb. 6:10).
4 Iquiiñenu endanabani stinu para guni adorarnu Jiobá, casi chigucheechenu diidxaʼ la? racaneni laanu cadi usiaandanu dxi stibe. Racaneni cadi gúʼyadxinu cani nuu ndaaniʼ guidxilayú stiʼ Binidxabaʼ ne rudiini stipa laanu para cadi usaana de aca xpiaʼnu nayá (2 Ped. 3:11-14). Ucheechenu diidxaʼ ne stale gana la? dxandipeʼ zulani laanu ne zulani ca binni ni cusíʼdinu (1 Tim. 4:16).