Ndaa ra rinabadiidxaʼ

◼ Ximodo nga naquiiñeʼ gúninu ca dxiiñaʼ rudiicabe laanu ra ridagulisaanu yaʼ.

Ora ti neza binni ridagulisaa nexhechaahuiʼ iráʼ ni rúnicaʼ la? rihuínnica de que tobi si rúnicaʼ dxiiñaʼ (1 Cor. 14:33, 40). Uníʼ ique xi iráʼ dxiiñaʼ nga ni riquiiñeʼ aca para ti endaridagulisaa si. Aparte de cani ridiʼdiʼ luni la? rácaruʼ stale dxiiñaʼ ante de laani ne ora maʼ biluxe ni, purtiʼ nuu ca bíchinu ne ca bizánanu ni rúnicaʼ xcaadxi dxiiñaʼ stini. Laaca nabé risaca nga ca dxiiñaʼ ni qué raca nezalunu. Ximodo zanda acanenu lu ca dxiiñaʼ riʼ yaʼ.

Uyuu listu para acaneluʼ. Cani riulaʼdxiʼ acané la? qué riaadxaʼ ni gúnicaʼ (Sal. 110:3). Bicaa ique acaneluʼ cani huará ne cani maʼ nagola. Ucané guiá Yoo stiʼ Reinu. Nuu stale cosa galán ni zanda gúninu, ne cadi naquiiñeʼ cuézanu chuʼpeʼ tu gabi laanu gúninu cani. Ni riquiiñeʼ si nga guiale de laanu acaláʼdxinu acanenu.

Biʼniʼ ni zanda si guʼnuʼ. Cani runi biaʼ ganda la? riéchecaʼ acanecaʼ xcaadxi (Luc. 9:48). Pa laanu udiʼnuʼ cuenta de que nuu ni qué zanda gúninu la? nga zacané laanu cadi icaanu dxiiñaʼ ni qué zanda gúninu. Ne laaca racané ni laanu cadi ucaʼnu stobi guni iráʼ ni rábinu purtiʼ si zanda guni mandarnu laa (Pro. 11:2).

Biluíʼ de que zanda guni crécabe lii. Moisés gúdxicabe laa uyubi hombre ni zanda guni xiixa dxiiñaʼ para sanírucaʼ ndaaniʼ guidxi Israel (Éxo. 18:21). Ngaca nga ni caquiiñeʼ yanna. Nga runi intiisi dxiiñaʼ udiicabe lii, biʼniʼ ni jneza ne galán (Luc. 16:10). Pa qué zanda gúniluʼ ni la? biyubi stobi tu guni ni pur lii.

Biʼniʼ ni jma galán. Iráʼ ca xpinni Cristu naquiiñeʼ gúnicaʼ dxiiñaʼ de idubi ladxidoʼcaʼ dede ne ora gúnicaʼ xhiiñaʼ binni (Col. 3:22-24). Peru, jma nga nápanu razón gúninu ni para cadi guiaanadxi de aca adorar Jiobá jneza. Nécaxa nuu dxiiñaʼ ni ruluíʼ qué risácapeʼ, ora raca cani jneza la? racaneni ca binni ridagulisaa ca.

Lu iráʼ dxiiñaʼ ni gúninu, rusihuínninu endarannaxhii ni nápanu Jiobá ne ni nápanu ca bíchinu ne ca bizánanu (Mat. 22:37-39). Nga runi, intiisi dxiiñaʼ udiicabe laanu la? naquiiñeʼ gúninu ni jneza ne galán.