3 ndaa: Modo iquiiñenu Biblia jneza

Gúʼndanenu binni modo ganda iniisi jma lu Stiidxaʼ Dios

1. Ora maʼ cayúʼndanenu binni, xiñee nga naquiiñeʼ usihuínninu de que ndaaniʼ Biblia nga zeeda cani cusíʼdinu.

¹ Rúʼndanenu binni Biblia purtiʼ ni racaláʼdxinu nga chinándacabe Cristu, ne nga nga ni ribeendunu ora racanenu laacabe guiénecabe ne icaacabe cani riziidicabe de lu Stiidxaʼ Dios ne gúnicabe cani (Mat. 28:19, 20; 1 Tes. 2:13). Nga runi, ora usíʼdinu laacabe naquiiñeʼ usihuínninu de que ndaaniʼ Biblia nga zeeda cani cayábinu laacabe. Primé la? galán nga usíʼdinu cani cayúʼndanenu ca gánnacaʼ uyúbicaʼ xiixa textu ndaaniʼ Biblia sticaʼ. Yanna, ximodo zanda iquiiñenu Biblia ca para acanenu laacabe iniisicabe lu Stiidxaʼ Dios yaʼ.

2. Ximodo gánnanu unáʼ nga textu ni gúʼndanu ne ni usiénenu.

² Gulí textu ni gúʼndatu. Ora maʼ cayuuluʼ listu para chiguundaneluʼ laabe la? biiyaʼ xiná ca textu ca ne ni cayeeteʼ lu ca párrafo ca ne biiyaʼ unáʼ nga ni uyúbitu ne ni usiéneluʼ ora maʼ cayuundatu. Jma nga galán gúʼndaneluʼ laabe ca textu ni rusiene ni runi crenu. Zándaca cadi naquiiñeʼ diʼ gúʼndatu cani maca runibiaʼbe. Biiyaʼ xii ndiʼ ni caquiiñeʼ binni cayuundaneluʼ ca ne ximodo nabánibe.

3. Xii nga ni ribeendunu ora rinabadiidxanu, ne ximodo zanda gúninu ni.

³ Unabadiidxaʼ. Lugar de usiéneluʼ ni na ca textu ca la? gudxi laabe usiénebe cani lii. Zanda gúnibe ni pa inabadiidxaluʼ laabe. Pa cadi tan nagana de guiénebe ni la? unabadiidxaʼ si laabe ximodo riníʼ textu ca de ni cá lu párrafo ca. Nuu biaje zuuyuʼ de que naquiiñepeʼ uyúbiluʼ xipeʼ nga inabadiidxaluʼ laabe o zuyúbiluʼ xhupa xhonna ni inabadiidxaluʼ para guiénebe ni cayuundatu ca jneza. Pa nuuruluʼ iniʼluʼ xiixa la? uleza icábisibe ti iniʼluʼ ni.

4. Xi iráʼ ndiʼ naquiiñeʼ usiénenu de ti textu ni gúʼndanu yaʼ.

⁴ Cadi guʼnuʼ ni nagana. Tobi ni nanna ulaa flecha la? zaquiiñebe ti flecha si para ucaabe ra racaláʼdxibe. Zaqueca nga ne ti maestru ni nanna usiidiʼ, qué zaquiiñedibe stale diidxaʼ para usiénebe ni racaláʼdxibe. Zanda usieʼnuʼ laabe ne diidxaʼ ni cadi nagana ni guiénebe, ne cani cusiiduʼ ca aca cani jneza. Nuu biaje la? naquiiñeʼ uyúbiluʼ xiná ca libru ne ca revista stinu ca para guieʼnuʼ ti textu ne ganda usieʼnuʼ ni jneza (2 Tim. 2:15). Peru cadi acaláʼdxiluʼ usiéneluʼ idubi ti textu ora maʼ cayuundatu. Bizeeteʼ ni caquiiñeʼ si para usiéneluʼ ni caniʼtu ca.

5, 6. Ximodo zanda acanenu cani cayúʼndanenu ca gúnicaʼ ni caziidicaʼ, ne xii nga ni cadi naquiiñeʼ gúninu.

⁵ Ximodo acaneluʼ laabe gúnibe ni caziidibe. Ora guʼyuʼ zanda la? ucané ni cayuundaneluʼ ca guʼyaʼ ximodo zanda acané ca textu ca laabe lu xquendanabánibe. Casi pa gúʼndaneluʼ laabe Hebreos 10:24, 25 ne caʼruʼ chebe ca endaridagulisaa ca la? zanda gaʼbuʼ laabe de ni rizíʼdinu racá ne guni inbitarluʼ laabe chebe. Peru cadi tan iniʼluʼ de laani stale biaje, bidii lugar Stiidxaʼ Dios ucaa laabe gúnibe ni caquiiñeʼ para usiéchebe Jiobá (Heb. 4:12).

⁶ Ora gúninu dxiiñaʼ ni nápanu de acanenu binni chinanda Cristu la? racanenu laacabe gápacabe fe ti uzuubacabe diidxaʼ ra iquiiñenu Biblia jneza (Rom. 16:26).