5 ndaa: Pabiáʼ zanda gúʼndanenu ni caziidiʼ ca
Gúʼndanenu binni modo ganda iniisi jma lu Stiidxaʼ Dios
1 Ora bisiidiʼ Jesús ca discípulo stiʼ la? uníʼ íquebe pabiáʼ zanda iziidicaʼ, ngue runi uníʼnebe laacaʼ «biaʼ ra gunda biene caʼ» (Mar. 4:33; Juan 16:12). Yanna riʼ laaca zacá ni, cani rusiidiʼ Stiidxaʼ Dios ca naquiiñeʼ gúʼyacabe pabiáʼ nagueenda nga guʼndanécabe binni. Biaʼ gúʼndacabe ca zácani biaʼ ganda guiene ni caziidiʼ ca ne biaʼ tiempu nápabe ne biaʼ tiempu napa ni cusiidiʼ ca.
2 Biʼniʼ fe stibe naguidxi. Nuu binni riquiiñeʼ guʼndanécabe laa chupa chonna biaje para guiene ni cusiidicabe laa, ne nuu tu laa ti biaje si maca biene. Qué racaláʼdxinu de que pur gúʼndanenu laabe nagueenda cadi guiénebe ni cusíʼdinu laabe, purtiʼ caquiiñeʼ iguidxi fe ni deruʼ cayápabe lu Stiidxaʼ Dios (Pro. 4:7; Rom. 12:2).
3 Iquiiñenu tiempu biaʼ caquiiñeʼ iráʼ semana para acanenu ni cayúʼndanenu ca guiene ne icaa cani caziidiʼ lu Stiidxaʼ Dios. Cadi gúʼndanenu laabe nagueenda, pacaa maʼ qué zabeendube stale de cani dxandíʼ risaca ni cusíʼdinu laabe. Iquiiñenu tiempu biaʼ caquiiñeʼ para ininu cani jma risaca zeeda luni ne gúʼndanu ne usiénenu ca textu ra cá ni cusíʼdinu laabe (2 Tim. 3:16, 17).
4 Cadi ireecueʼnu de tema stini. Aparte de cadi gúʼndanenu laabe nagueenda la? laaca galán cadi ireecueʼnu de tema ni caninu. Pa ni caziidiʼ ca nabé riulaʼdxiʼ güíʼ diidxaʼ de sti cosa la? galán gábinu laabe de que zanda ininu de laani ora maʼ biluxe bíʼndanu (Ecl. 3:1).
5 Zándaca purtiʼ si nabé riuláʼdxinu ni dxandíʼ ca ucaani laanu ininu stale (Sal. 145:6, 7). Dxandíʼ nga galán uzeetenu de xiixa ni bizaaca o de sti cosa ora maʼ cayúʼndanenu laabe, peru cadi galán diʼ uzeetenu stale, pacaa zucueeza cani laabe de guiene chaahuibe cani jma naquiiñeʼ gánnabe ni zeeda lu Biblia.
6 Gúʼndanenu cani caziidiʼ de lu Biblia ca biaʼ ganda guiénecabe cada biaje chuunu ra nuucabe la? zacané ni laacabe sácabe lu biaaniʼ stiʼ Jiobá (Isa. 2:5).