6 ndaa: Ora ni caziidiʼ ca inabadiidxaʼ xiixa

Gúʼndanenu binni modo ganda iniisi jma lu Stiidxaʼ Dios

¹ Ora maʼ rúʼndanenu tuuxa la? jma jneza nga gúʼndanenu laabe cani rusiidiʼ Biblia casi maca zeeda cani lu libru o folletu ni iquiiñenu ne cadi ichésanu lu sti tema. Zacá zaniisibe lu Stiidxaʼ Dios, purtiʼ caziidibe cani naquiiñeʼ gánnabe primeru (Col. 1:9, 10). Peru, ziuu ora ni caziidiʼ ca zanabadiidxaʼ xiixa ora maʼ cayuundanenu laa. Ximodo zanda icábinu cani laabe yaʼ.

² Uníʼ ique ante icábiluʼ. Ora maʼ cayuundatu ne inabadiidxabe xiixa de ni caniʼtu la? zanda icábiluʼ laabe oraqueca, pa cadi chigusiene sti tema ni chiguundarutu ni, pa zeeda ni racá la? biluíʼ si laabe paraa cá ni. Peru, pa ni canabadiidxabe ca gadxepeʼ ni de ni cayuundatu la? bicabi ni laabe ilúxesitu, o pa caquiiñeʼ gúʼndaluʼ jma de laani la? bicabi ni laabe sti ora. Caadxi ni rucheeche diidxaʼ riuláʼdxicaʼ ucaacaʼ ni inabadiidxacabe laacaʼ, zacá ruluíʼcabe ni caziidiʼ ca qué ziaandaʼ ni laacabe, ne maʼ qué rixélecabe de tema ni cayuundacabe.

³ Ca libru o ca folletu riquiiñenu para usíʼdinu binni cadi nagana diʼ modo rusiene cani stale de ni zeeda lu Biblia. Xi gúninu pa ni caziidiʼ ca raca nagana laa icaa ni cusíʼdinu o qué naʼ usaana xiixa ni cadi jneza ni maca runi cré yaʼ. Óraca la? jma galán iquiiñeluʼ xcaadxi libru o revista stinu para gúʼndaneluʼ laabe xi riníʼ Biblia de laani. Pa neca zacá ni caziidiʼ ca qué naʼ icaani la? zanda usiéneluʼ ni laabe despué ne laguundaʼ ra maca zetu (Juan 16:12). Ra maʼ ziziidibe jma ne ora maʼ ziniisibe jma lu Stiidxaʼ Dios la? zándaca oracaruʼ maʼ guiénebe cani cusiidiʼ Biblia.

⁴ Bicabi ora nannuʼ. Pa qué gannuʼ xi icábiluʼ la? cadi iniʼluʼ ni raʼbuʼ biaʼsiʼ jneza (2 Tim. 2:15; 1 Ped. 4:11). Gudxi laabe chiguundaluʼ jma de laani ti usiéneluʼ ni laabe sti biaje ibiguétaluʼ. Ne laaca zanda uyubineluʼ ni laabe ti usiidiluʼ laabe ximodo uyúbibe laasibe cani racaláʼdxibe gánnabe, ne zanda usiidiluʼ laabe iquiiñebe iráʼ ca libru ne revista ni rudii xquidxi Jiobá laanu para izíʼdinu jma. Chahuidugá maʼ laasibe zanda idxélabe cani racaláʼdxibe gánnabe (Hech. 17:11).