Usisácanu Jiobá ra ridagulisaa stale binni
1, 2. Xi zanda gúninu lu guendaridagulisaa de chonna gubidxa ca, ne ximodo zanda gúninu ni.
1 Ca guendaridagulisaa roʼ ni raca iráʼ iza riquiiñenu cani para usisácanu Jiobá. Runi sentirnu casi biʼniʼ sentir rey David, ora biindaʼ sicaríʼ: «Zusisacaʼ lii ra ridagulisaa stale binni, ndaaniʼ ti guidxi ra nuu stale binni zusisacaʼ lii» (Sal. 35:18). Maʼ zedadxiña dxi aca guendaridagulisaa de chonna gubidxa ni láʼ «Guzúʼbanu Stiidxaʼ Dios», yanna, ximodo zanda gánnanu pa dxandíʼ cusisácanu Jiobá casi tuuxa ni nuu ndaaniʼ xquídxibe yaʼ.
2 Zanda gúninu pur modo aca xpiaʼnu. Caadxi binni ni biquixe ti lugar ra guca ti guendaridagulisaa uniʼcaʼ sicaríʼ: «Maʼ huayábidu xcaadxi religión ni riquiiñeʼ lugar riʼ chiguuyacaʼ modo runi ca testigu stiʼ Jiobá ora chiguidagulisaacaʼ, purtiʼ laacaʼ izáʼ jneza modo rúnicaʼ dxiiñaʼ». Pur modo rihuínninu, pur modo riuláʼdxinu acanenu ne pur modo xpiaʼnu la? cada tobi de laanu zanda acané ti usisácanu Jiobá, purtiʼ laasibe nga Dios ni naquiiñeʼ usisaca iráʼ binni (1 Ped. 2:12).
3, 4. Ximodo zanda gápanu xpiaʼnu para uzuchaahuinu casi xpinni Cristu ora nuunu ra guendaridagulisaa ne ora maʼ bilúxeni.
3 Modo ihuínninu. Para uzuchaahuinu modo ganda usisácanu Dios la? naquiiñeʼ udiʼnu lugar chuʼ tu gabi laanu modo gúninu ni jneza (1 Tim. 2:9). Libru Benefíciese na lu yaza 132: «Binni ni rapa xpiáʼ la? qué runiná stobi ne diidxaʼ ne qué runi xiixa para ucaa binni guyadxí laa». Ndaaniʼ stale guidxi roʼ, maʼ qué rizalaʼdxiʼ binni modo racu lari. Peru, Jiobá rusisaca stipa rúninu pur ibáninu ne sanu casi modo riuláʼdxibe (Hech. 15:14). Neca guendaridagulisaa roʼ ca ácani ra riguítecabe o sti lugar ni riquiiñeʼ binni para chizá la? para laanu reeda ácani ti lugar ra «ridagulisaa stale binni» pur chonna gubidxa. Nga runi, ora idagulisaanu nezalú Jiobá la? naquiiñeʼ uzuchaahuinu modo riulaʼdxiʼ Binni ni jma nandxóʼ nuu lu idubi naca ibáʼ ne Guidxilayú (1 Cró. 29:11).
4 Laaca riquiiñeʼ cadi guiaandaʼ laanu uzuchaahuinu jneza iluxe si cada dxi stiʼ guendaridagulisaa ca. Neca gácunu gadxé lari ora chizanu ti ratu o pacaa ora chidoʼno ndaaniʼ ti restaurán, laaca risaca nga uzuchaahuinu modo ihuinni nácanu binni ni dxandíʼ rusisaca Dios (1 Tim. 2:10). Cadi purtiʼ si rúʼyanu racu binni lari modo tiisi yanna, ininu zacá nga jneza (1 Juan 2:16, 17). Lu ca revista ne libru ni ricaanu reeda stale foto ra cá hombre ne gunaa ni zuchaahuicaʼ jneza neca gadxé gadxé ra nuucaʼ. Chinenu guiʼchiʼ ricá ladxidoʼno ca ndaaniʼ guidxi ra cayaca guendaridagulisaa ca zusietenaláʼdxini laanu de que nácanu xpinni Cristu iráʼ ora (2 Cor. 6:3, 4).
5, 6. Ximodo zanda uluinu runi respetarnu mexaʼ stiʼ Jiobá.
5 Guni respetarnu mexaʼ stiʼ Jiobá. Señor ni jma Nandxóʼ ni nuu lu idubi naca ibáʼ ne Guidxilayú maʼ gudíxhebe xi chigusiidibe laanu (Isa. 25:6; 1 Cor. 10:21). Pa rusisácanu lugar ni nápanu ruaa mexaʼ stiʼ Jiobá la? zaguixhe íquenu chuʼnu guionnaʼ gubidxa stiʼ guendaridagulisaa roʼ ca. Maʼ cayuuyaluʼ xi zanda guʼnuʼ para idxeʼluʼ ra guiaanuʼ, ximodo cheluʼ ne inabuʼ permisu ra ruʼnuʼ dxiiñaʼ la? Maʼ biiyaluʼ pabiáʼ tiempu zaquiiñeluʼ para chuʼluʼ listu ne para cheluʼ ra chigaca guendaridagulisaa ca, ti ganda chindaluʼ tempranu ne uyúbiluʼ ra cuiluʼ, güíneluʼ ca bíchinu ne bizánanu diidxaʼ ne idaaguluʼ laacabe para usisácanu Jiobá ora gúʼndanu diidxaʼ riuundaʼ ne ucaadiáganu oración ruzuluneni la? (Sal. 147:1.)
6 Respetu ni nápanu pur mexaʼ stiʼ Jiobá zucaa laanu ucaadiaga chaahuinu iráʼ ni iníʼcabe ne cadi idoʼnoʼ o güinu diidxaʼ pa cadi caquiiñeʼ gúninu ni, ne cadi maʼ canazanu cheríʼ cheriʼcaʼ. Jiobá caquiiñeʼ mozo ni nuu xpiaaniʼ ne ni runi jneza para usiidiʼ laanu ni caquiiñeʼ gánnanu yanna (Mat. 24:45). Nin tobi de laanu qué riquiiñeʼ guniti nin ti ndaa de iráʼ ni chiguizíʼdinu. Cani napa xiiñiʼ naquiiñeʼ cuinécabe laacaʼ ti ganda cueendúcabe stale lu iráʼ ni chiguizíʼdinu racá (Deu. 31:12).
7. Xi cayábicabe laanu gúninu ora endaró ne xiñee.
7 Rinábacabe laanu chinenu endaró stinu ti cadi ireʼnu para chisinu ni ora riziláʼdxinu galaa dxi. Ne nabé galán nga ininu de que stale de cani guyé guendaridagulisaa iza udiʼdiʼ que zacá bíʼnicaʼ ni. ¡Guizáʼ sicarú pa iranu gúninu zacá iza riʼ! (Heb. 13:17.) Pa chinándanu conseju riʼ la? zanda inínenu ca bíchinu ne ca bizánanu para uguusaanu gana laanu ne zacanenu chuʼ xquidxi Jiobá tobi si ne gápanu guendariuudxi para usisácanu laabe (Sal. 133:1).
8, 9. Ximódoruʼ zanda usisácanu Jiobá lu guendaridagulisaa de chonna gubidxa.
8 Ucheechenu diidxaʼ ora tiica. Ora maʼ ziuunu ne ora ibiguétanu de guendaridagulisaa roʼ ca laaca zanda idxélanu modo usisácanu Jiobá ne ruaʼnu (Heb. 13:15). Pa cayoʼno ndaaniʼ ti restaurán o canínenu tuuxa runi dxiiñaʼ ndaaniʼ ti hotel, uyúbinu modo ganda ucheechenu diidxaʼ. Cumu zadxá xquendabiaaninu ne ladxidoʼno de iráʼ cani risaca ni chigusiidiʼ Jiobá laanu la? ininu cani galán riʼ ne iráʼ binni idxaaganu (1 Ped. 3:15).
9 Cabézanu idxiñaʼ dxi riʼ para usisácanu Jiobá «lade stale binni ridagulisaa» (Sal. 26:12). ¡Iranu usisácanu Jiobá lu Guendaridagulisaa de Chonna Gubidxa «Guzúʼbanu Stiidxaʼ Dios»!
[Box on page 4]
Ni guietenaláʼdxinu para guendaridagulisaa de chonna gubidxa
◼ Pora uzuluni. Zuzuluni a las 9.30 siadóʼ guionnaʼ gubidxa ca. Ca puerta stini zaxaleʼ a las 8.00. Chupa chonna minutu ante uzuluni, bíchinu ni chiguiníʼ tuu ndiʼ cani chigudii ca libana ca zabibe lu plataforma laga caxidxi saa stiʼ Reinu ni rixidxi para uzuluni. Óraca la? iranu maʼ riquiiñeʼ cuinu lu banguʼ stinu ti ganda uzuluni modo naquiiñeʼ ácani. Viernes ne sábadu zaluxe ni a las 5.05 huadxí ne domingu zaluxe ni a las 4.10.
◼ Ra ruzuhuaa carru. Ca lugar ra ruquíxecabe maca ne ra ruzuhuaa carru la? maʼ qué ziaxa diʼ aparte ne zábicabe lii paraa uzuhuaa xcárruluʼ. Ca guiʼchiʼ ricá ladxidoʼno zaquiiñeʼ ni para guiuucabe. Cani huará si nga zanda uzuhuaa xcárrucaʼ ra maca dieʼ para laacani, peru pa nápacabe guiʼchiʼ ni caquiiñeʼ para chúʼcabe raqué. Cumu cadi stálepeʼ carru nga zanda uzuhuaa raqué la? galán cheʼ chupa chonna binni ndaaniʼ ti carru si, ne cadi cheʼ tobi o chupa si ndaaniʼ ni.
◼ Ora cueenu lugar. Zanda cueenu lugar raqué para cani zinésinu ndaaniʼ carru o para ca binnilídxisinu.
◼ Bueltu rudiʼnu. Cumu stale gastu nga raca ora chigaca ti guendaridagulisaa de chonna gubidxa la? zanda uluinu dxandíʼ riuláʼdxinu acanenu ra udiʼnu bueltu para dxiiñaʼ raca lu idubi Guidxilayú, zanda udiʼnu ni ra Yoo stiʼ Reinu o ra cayaca guendaridagulisaa ca. Pa udiicabe cheque ra cayaca guendaridagulisaa roʼ riquiiñeʼ cheni lá «La Torre del Vigía A.R.» ni nuu Méjicu ne para Belice cheni lá «Watch Tower».
◼ Endaró. Yeneca endaró stiluʼ ti cadi ireeluʼ chisiiluʼ ni galaa dxi ora riziláʼdxinu. Zanda chineluʼ ra chuʼ endaró stiluʼ peru ácani nahuiiniʼ biaʼ ganda chuʼ xaʼnaʼ bangu. Qué zanda diʼ chinenu xiixa ni naroʼbaʼ, nin xiixa de vidriu o nisa dxuʼniʼ.
◼ Grabadora. Cadi naquiiñeʼ diʼ ucaʼnu nin ti clase grabadora lu biaaniʼ ni nuu raqué o ra nuu aparatu stiʼ sonidu, zanda iquiiñenu cani, peru uyúbinu modo cadi uchiiñaʼ ni cani cucaadiaga.
◼ Foto. Pa racaláʼdxiluʼ cueeluʼ foto ora cadiʼdiʼ ca libana ca la? uleeni peru sin biaaniʼ.
◼ Aparatu ni ruyubi binni ne teléfono celular. Naquiiñeʼ uyúbitu modo iquiiñeʼ cani, ti cadi uchiiñaʼ ni cani cucaadiaga.
◼ Ora málasi aca xiixa. Pa málasi aca xiixa ni caquiiñeʼ guʼyaʼ ti doctor la? uniʼné ti bíchinu ni ridxagalú laanu, laabe nagueendaca zaníʼnebe cani runi dxiiñaʼ Ra Raca Tender cani Izaaca Xiixa ne maʼ laaca gúʼyacaʼ ximodo acanecaʼ.
◼ Ra restaurán. Stale lugar riquiiñeʼ usaanacabe saca nagaʼndaʼ biaʼ 10% ne 15%, biaʼ dxiiñaʼ ni gúnicabe.
◼ Ra hotel. 1) Cadi inabuʼ stale cuartu ndaaniʼ ca hotel ca pa qué zaquiiñeluʼ iráʼ cani ne cadi uguuluʼ jma binni biaʼ naguíxhecabe. 2) Pa maʼ qué ziaanuʼ ndaaniʼ ni la? uniʼné laacabe nagueendaca. 3) Biquiiñeʼ ca carruhuiiniʼ ra riné binni maleta stiʼ hora si zaquiiñeluʼ ni. 4) Cadi guʼnuʼ endaró ndaaniʼ ca cuartu stini pa zacá nácabe. 5) Iráʼ dxi bisaana saca nagaʼndaʼ stiʼ ni cayuni dxiiñaʼ ra nuuluʼ. 6) Cadi icaaluʼ stale endaréʼ, café o hielu ni rusigáʼdecabe para iquiiñeʼ ca biuuzaʼ laga nuuca ndaaniʼ hotel ca. 7) Bisihuinni guenda ni rudii espíritu santu ora iníʼneluʼ cani runi dxiiñaʼ ndaaniʼ cani, jmaruʼ si ora nápacabe stale dxiiñaʼ casi ora maʼ cucaacabe lá cani chiguiuu o cani chiguiree ndaaniʼ hotel ca.