Racané endarucheeche diidxaʼ ca laanu guni huantarnu
1 Stiidxaʼ Dios rucaa laanu uxóʼñenu ne guni huantarnu lu neza ni ziuunu (Heb. 12:1). Cásica tuuxa ni ruxooñeʼ naquiiñeʼ guni huantar para guni ganar la? laanu laaca caquiiñeʼ guni huantarnu ti icaanu endanabani ni qué zaluxe (Heb. 10:36). Ximodo racané endarucheeche diidxaʼ ca laanu para cadi ucheʼnu laga cabézanu dxi initilú guidxilayú riʼ yaʼ. (Mat. 24:13.)
2 Ruquidxi ni laanu lu Stiidxaʼ Dios. Ininu ni maʼ bizabiruaa Dios ni cá lu Biblia de ti guidxilayú cubi ra chigaca puru si ni jneza, racaneni laanu uzuhuaa dxiichinu lu ni runi crenu (1 Tes. 5:8). Ora ucheechenu diidxaʼ la? jma racané ni laanu usíʼdinu binni ca dxandíʼ ni maʼ bizíʼdinu zeeda lu Biblia. Ne ruzuhuaʼnu jma naguidxi lu Stiidxaʼ Dios ora gábinu binni dxandíʼ nga cani runi crenu.
3 Para usíʼdinu jneza la? naquiiñeʼ guiene chaahuinu ca dxandíʼ ni rusiidiʼ Biblia, para nga naquiiñeʼ idúʼndanu ne iníʼ íquenu lu ni nápanu gana guiénenu. Pa gúninu zacá la? zánnanu jma, zaguidxi fe stinu ne zápanu jma stipa para gúninu ni na Stiidxabe (Pro. 2:3-5). Ne zacá, laga cayacanenu xcaadxi binni laaca zaguidxi fe stinu (1 Tim. 4:15, 16).
4 Endarucheeche diidxaʼ ca zeeda ácani casi ora «iquiiñe[nu] irá ni maʼ bidii Dios laa[nu]», ni caquiiñenu para ucaalunu Binidxabaʼ ne ca demonio stiʼ (Efe. 6:10-13, 15). Ora nuuca ni cayúninu lu xhiiñaʼ Jiobá la? nga racané laanu iníʼ íquenu lu cani jma zuni laanu naguidxi, ne zacá qué zudiʼnu lugar guni biidiʼ guidxilayú stiʼ Binidxabaʼ xquendabiaaninu (Col. 3:2). Ora usíʼdinu binni sáʼ modo na Jiobá, rusietenaláʼdxini laanu naquiiñeʼ ácanu nayá nezalube (1 Ped. 2:12).
5 Rudiini laanu stipa stiʼ Dios. Endarucheeche diidxaʼ ca laaca racaneni laanu guni crenu Jiobá ne idubi ladxidoʼno (2 Cor. 4:1, 7). ¡Izáʼ sicarú ndaayaʼ riʼ! Guni crenu laabe ne idubi ladxidoʼno cadi racané si ni laanu ucheechenu diidxaʼ, sínuque laaca racaneni laanu para udxiilunu intiica endanagana lu endanabani stinu (Fili. 4:11-13). Dxandipeʼ, ni caquiiñeʼ para guni huantarnu nga izíʼdinu guni crenu Jiobá ne idubi ladxidoʼno (Sal. 55:22). De iráʼ modo racané endarucheeche diidxaʼ ca laanu guni huantarnu.