Ximodo zanda ugaandaluʼ ca guenda naguixhe íqueluʼ gúniluʼ ndaaniʼ xquidxi Dios
1. Xi ca guenda ndiʼ naguixhe ique stale hombrehuiiniʼ ne dxaapahuiiniʼ ugaandacaʼ ndaaniʼ xquidxi Dios.
1 Pa xpinni Cristu lii ne nahuiiniluʼ, zándaca pur nadxiiluʼ Jiobá nga cá íqueluʼ ugaandaluʼ xiixa guenda ndaaniʼ xquídxibe ne pur zinándaluʼ conseju ni bidii Jesús iráʼ xpinni ra na: uyúbinu primeru Reinu stiʼ Dios (Mat. 6:33). Zándaca chuláʼdxiluʼ gúniluʼ jma lu xhiiñaʼ Dios ra ácaluʼ precursor o chigacaneluʼ ra jma caquiiñeʼ tu chigucheeche diidxaʼ. Xcaadxi bíchinu ne bizánanu zándaca caníʼ íquecaʼ chigacanecaʼ ra cabí Betel ne Yoo stiʼ Reinu ndaaniʼ sti guidxi, o chécabe de misioneru. ¡Izáʼ sicarú nga gúninu ca ndiʼ!
2. Xi zanda acané lii para ugaandaluʼ ca guenda ni naguixhe íqueluʼ gúniluʼ ndaaniʼ xquidxi Dios.
2 Ni zacané lii para ugaandaluʼ cani naguixhe íqueluʼ nga ucaaluʼ cani lu ti guiʼchiʼ. La Atalaya 15 stiʼ julio 2004 cusiene: «Para gúninu iráʼ ni maʼ udixhe íquenu la? naquiiñeʼ ininu cani. [...] Nga runi, jma jneza nga ucaʼnu lu ti guiʼchiʼ cani racaláʼdxinu gúninu, ne ximodo zanda ugaandanu cani». Laaca jneza nga quixhe íqueluʼ gúniluʼ xiixa ni zanda ugaandaluʼ nagueenda, nga zacané lii gúʼyaluʼ pabiáʼ ziniisiluʼ lu Stiidxaʼ Dios ne zacaneni lii icá íqueluʼ xiixa guenda ni jma zandaa para ugaanduʼ laa.
3. Bizeeteʼ chupa chonna ni zanda quixhe íqueluʼ ugaandaluʼ nagueendaca ni zacané lii chuʼnísaluʼ.
3 Ni zanda ugaandaluʼ nagueendaca. Pa caʼruʼ chuʼnísaluʼ, uníʼ ique xi cayaadxaʼ gúniluʼ para ugaandaluʼ ni. Zándaca caquiiñeʼ guiene chaahuiluʼ cani rusiidiʼ Biblia. Pa zacá ni la? udixhe ique gúʼndaluʼ ne guiene chaahuiluʼ libru Xipeʼ ndiʼ cusiidiʼ Biblia, ra uyúbiluʼ iráʼ ca textu zeeda luni (1 Tim. 4:15). Laaca bicaa ique gúʼndaluʼ idubi naca Biblia, de Génesis dede Apocalipsis cásica runi ca betelita ne cani rié scuela stiʼ Galaad. Ne ora ilúxeluʼ la? bizulú sti biaje ne biʼniʼ stipa pur gúʼndaluʼ ni iráʼ dxi (Sal. 1:2, 3). Uníʼ ique pabiáʼ zacané nga lii iniisiluʼ lu Stiidxaʼ Dios. Biʼniʼ ti oración de idubi ladxidoʼloʼ ora uzululuʼ ne ora maʼ biluxe biindaluʼ ne biene chaahuiluʼ xiixa ni cá lu Biblia, ne biʼniʼ stipa pur guʼnuʼ cani caziidiluʼ ca lu xquendanabániluʼ (Sant. 1:25).
4. Xi ndiʼ zanda quixhe ique ti bíchinu o ti bizánanu ugaanda nagueendaca, pa cá íquebe ácabe betelita o misioneru yaʼ.
4 Xiruʼ ndiʼ zanda quixhe íqueluʼ ugaandaluʼ pa maʼ uyuunísaluʼ yaʼ. Ñee caquiiñeʼ iziidiluʼ ucheecheluʼ diidxaʼ jma jneza la? Ñee zanda iziidiluʼ iquiiñeluʼ Stiidxaʼ Dios jma jneza ora maʼ canaucheecheluʼ diidxaʼ la? (2 Tim. 2:15.) Ximodo zanda gúniluʼ jma lu xhiiñaʼ Dios yaʼ. Udixhe ique ugaandaluʼ xiixa guenda nagueendaca biaʼ iza stiluʼ ne biaʼ zanda guʼnuʼ, nga zacané lii ugaandaluʼ xiixa guenda ni jma zandaa.
5. Ora udixhe ique ti hombrehuiiniʼ ugaanda xiixa guenda nagueendaca, ximodo ucané nga laabe para gunda uyebe Betel yaʼ.
5 Ni uleendú ti hombrehuiiniʼ. Ora uyé ti hombrehuiiniʼ láʼ Tony de 19 iza yegunibiáʼ Betel la? ucaláʼdxibe ñaanabe ñúnibe dxiiñaʼ raqué. Peru laabe huaxiéʼ ruzuubabe diidxaʼ ne caʼruʼ quixhe íquebe gúnibe iráʼ ni na Dios. Tony udixhe ique ibani casi modo rusiidiʼ ca ley stiʼ Dios ne gúnibe iráʼ ni canabaʼ Dios ti ganda chúʼnisabe. Uyuunísasibe la? udixhe íquebe primeru ácabe precursor auxiliar de racá maʼ ácabe precursor regular, ne ni ucané laabe para bigaandabe cani udixhe íquebe nga bicaabe lu ti calendariu padxí maʼ rápabe gana uzulube. Uníʼ ique pabiáʼ biéchebe ora biʼniʼ invitárcabe laabe chebe Betel dxi maʼ zinebe ti tiempu de nácabe precursor.
6. Xi zacané lii ugaandaluʼ ca guenda naguixhe íqueluʼ ndaaniʼ xquidxi Dios.
6 Lii laaca zanda ugaandaluʼ ca guenda naguixhe íqueluʼ ndaaniʼ xquidxi Dios, pa gúniluʼ xhiiñaʼ Reinu primeru lu xquendanabániluʼ. Biʼniʼ orar Jiobá ne gudxi laabe cani racaláʼdxiluʼ guʼnuʼ, ne biʼniʼ stipa pur ugaandaluʼ cani (Pro. 16:3; 21:5).