Nácacabe ti ejemplu purtiʼ qué nusaanacabe de nucheechecabe diidxaʼ
1 Lu iza 1937 bihuinni sti modo nacubi para ireeche diidxaʼ iráʼ ora: nga nga ácacabe precursor especial. Lu iza que la? stale hombre ne gunaa ni nanna ne maʼ xadxí cucheeche diidxaʼ, ne nabé biéchecabe ora ucuaacabe invitación para chiacanécabe binni ratiica useendaʼ xquidxi Jiobá laacabe. Ne neca maʼ udiʼdiʼ stale iza la? ca precursor especial ca cadi cusaanacabe de gúnicabe dxiiñaʼ riʼ ne pur nga nácacabe ti ejemplu ni zanda chinándanu (Heb. 6:12).
2 Bixhélecabe neza. Ca primé precursor especial que bixhélecabe neza para ireeche diidxaʼ ra biquiiñecabe ti aparatu ni láʼ fonógrafo (ni ruxhidxi discu) ni gunda yenécabe iráʼ ladu ne dede ra puertaʼ lidxi binni. Ne laaca biquiiñecabe caadxi discu ora yegánnacabe binni stiʼ biaje para usiidicabe laacaʼ de Biblia. Nacubi bizulúcabe que la? ndaaniʼ si ca guidxi naroʼbaʼ ra maʼ nuu neza binni ridagulisaa que nga bíʼnicabe ni. De raqué uyécabe xcaadxi lugar ra jma caquiiñeʼ chuʼ tu ucheeche diidxaʼ. Tutiica binni ni uyuulaʼdxiʼ iziidiʼ de stiidxaʼ Dios la? biindanécabe laacaʼ de Biblia. Pur stipa naroʼbaʼ biʼniʼ ca precursor especial que bizulú gayuaa de neza binni ridagulisaa. Ne ra qué nusaanacabe de nucheechecabe diidxaʼ la? ucaneni biniisi xquidxi Jiobá casi ridúʼyanu ni yanna (Isa. 60:22). Yanna riʼ, ca precursor especial ca cayunirúcabe dxiiñaʼ para ireeche ca diidxaʼ nacubi ne galán ca «idubi naca guidxilayú» (Col. 1:23).
3 Zanda chinándanu ejemplu stícabe. Nuu precursor especial maʼ napa stale iza de cucheeche diidxaʼ iráʼ ora. Ne ra zidiʼdiʼ iza, ca hombre ne ca gunaa ni cadi cusaana de guni dxiiñaʼ riʼ huadxaagalúcabe adxé adxé cosa ni huayacané laacabe iguidxi fe stícabe (1 Ped. 1: 6, 7). Laacabe qué ruyúbicabe gápacabe stale cosa ni risaca para ibánicabe galán purtiʼ nga zucueeza laacabe de chiacanécabe ca lugar ra nagana para ireeche diidxaʼ. Nuu de laacabe la? maʼ huaniisi ne maʼ huará o napa xiixa endanagana (2 Cor. 4:16, 17). Peru neca zacá, cayunirúcabe dxiiñaʼ neca maʼ huaniisicabe (Sal. 92:14). Purtiʼ nánnacabe zacané Jiobá laacabe ne ricaacabe ndaayaʼ stibe (Sal. 34:8; Pro. 10:22).
4 Galán gábinu ca precursor especial ca sicarú dxiiñaʼ cayúnicaʼ ne ireeni de ndaaniʼ ladxidoʼno. Pa ra ridagulisaaluʼ nuu precursor especial la? bidxaaga laacabe para iziidiluʼ de cani maʼ huazaacacabe neza ra huacheechecabe diidxaʼ. Bisihuinni rusisácaluʼ dxiiñaʼ rúnicabe purtiʼ qué rusaanacabe de ucheechecabe diidxaʼ. Biiyaʼ ximodo cayuni huantárcabe ne nga zacané lii. Iráʼ cani gapa fe casi nápacabe ca zacaa ndaayaʼ stiʼ Jiobá, purtiʼ cani qué usaana de guni xhiiñabe la? rusiéchecaʼ laabe (Pro. 12:22).