¡Chigusaananenu binni ti tratadu cubi! Dede 20 stiʼ octubre hasta 16 stiʼ noviembre
1 Dede lunes 20 stiʼ octubre, ziaaziʼ ti tratadu cubi lu guidubi naca Guidxilayú, tratadu riʼ lani Ñuuláʼdxiluʼ ñánnaluʼ xi riníʼ Biblia de cani huanabadiidxaluʼ la?, zácani tapa semana. Ribézanu gucaa tratadu riʼ binni ganna paraa si nga zanda guiziidiʼ ni dxandíʼ (Juan 17:17).
2 Tratadu riʼ cacabi xhoopaʼ cosa ni nabé rinabadiidxaʼ binni: Ñee rizaalaʼdxiʼ Dios laanu la? Ñee ziuu dxi maʼ qué ziuu guendaridinde ne yuubaʼ la? Xi rácanu ora maʼ gútinu. Ñee ziuu dxi guiasa ca gueʼtuʼ ca la? Ximodo naquiiñeʼ guni orarnu Dios ti gucaadiaga laanu, ne Ximodo zanda guibáninu nayecheʼ. Ca religión ni na zinanda Cristu qué huadxélacaʼ xi guicábicaʼ cani gunabadiidxanu ca. Dede ca binni ni qué runi cré Cristu huanabadiidxacaʼ cani bizéʼtenu ca, peru zándaca qué gánnacabe pa cusiene Biblia cani. Nga runi, ribézanu chuulaʼdxiʼ stale binni ni zeeda lu tratadu ca.
3 Laquiizini guiráʼ ra rucheechetu diidxaʼ. Biʼniʼ stipa pur quiiziluʼ tratadu ca guiráʼ ra rucheecheluʼ diidxaʼ de yoo pur yoo, biaʼ gándatiʼ. Pa xiroobaʼ lugar ra nápatu para gucheechetu diidxaʼ la? ca binnigola ca zanda gábicaʼ laatu gusaanatu ti tratadu ca yoo ra qué guidxélatu guirutiʼ. Bidii tobi ca vecinu stiluʼ, binnilídxiluʼ, cani runineluʼ dxiiñaʼ o cani rineluʼ scuela, ne xcaadxi binni ni nabé riníʼneluʼ. Ñee zanda quixhe íqueluʼ gácaluʼ precursor auxiliar beeu octubre ne noviembre la? Laaca zanda guiníʼneluʼ ca binnigola pa tobi de ca xiiñiluʼ o cani ruundaneluʼ maʼ caniisi lu stiidxaʼ Dios para gaca tobi ni rucheeche diidxaʼ ni caʼruʼ chúʼnisa.
4 Xi guininu. Para ganda gusaananenu tratadu riʼ jma binni la? galán guinínenu laacabe ti ratuhuiiniʼ si. Zanda guinabadiidxaluʼ binni ni caníʼneluʼ ca tobi de cani cá lu primé yaza stini ne biluíʼ laabe modo cusiene tratadu ca ni. Ndiʼ zacané laanu ti guininu de ni riguu xizaa ca binni ni nuu neza ra rucheechenu diidxaʼ. Pa guʼyuʼ chuulaʼdxiʼ tuuxa la? bicaani lu guiʼchiʼ ne yeganna laabe sti biaje. Ca sábadu ne ca domingu ca zusaananenu binni ca revista nápanu ne tratadu ca. Ora maʼ biluxe gudíʼzinu tratadu ca 16 stiʼ noviembre la? zusaananenu binni libru Xipeʼ ndiʼ cusiidiʼ Biblia. Xcaadxi tratadu ni guiaana ca zanda quíʼzinu cani casi rúninu ne xcaadxi tratadu ni nápanu.
5 Bizulú biindané binni de Biblia. Tratadu riʼ gúcani párapeʼ gacaneni laanu guzulú gúʼndanenu binni de Biblia. Ximodo gúninu ni yaʼ. Ora guibiguétanu ra nuu ca binni ca zanda guinabadiidxanu laacabe xi biziidicabe luni ni gudixhedxí ladxidóʼcabe ne gucané laacabe. Biluíʼ binni ca ni zeeda deche tratadu ca ra cá modo rusíʼdinu binni de Biblia ne bidii laabe ti libru Xipeʼ ndiʼ cusiidiʼ Biblia. Pa zanda la? biindané laabe tobi o chupa párrafo stiʼ ti capítulo ni cusiene jma de tema ni gulibe.
6 Jiobá cuseendaʼ laanu para guyúbinu binni ni guni adorar laabe «modo racalaʼdxi be, ne guni ni de idubi ladxidóʼ» (Juan 4:23). Cumu racaláʼdxinu guiziidicabe de Dios la? ¡guiráʼ xixenu quíʼzinu tratadu riʼ!