Bisiidiʼ binni gannaxhii Jiobá
1. Xi rucaa binni guidxiña Jiobá.
1 Rietenaláʼdxiluʼ primé biaje guniʼnécabe lii de Jiobá la? Xi guyuuláʼdxiluʼ de laabe. Ni rucaa stale binni guidxiña Dios ni bizáʼ laanu nga ca guenda sicarú ni nápabe, biziidicabe riabe laanu ne nadxiibe laanu (1 Juan 4:8).
2, 3. Ximodo zanda iquiiñenu libru Xipeʼ ndiʼ cusiidiʼ Biblia para gacanenu cani cayuundanenu gannaxhiicaʼ Jiobá jma yaʼ.
2 «Ndiʼ nga Dios stinu.» Libru Xipeʼ ndiʼ cusiidiʼ Biblia rusiidini nadxii Jiobá laanu ne rusiéneni caquiiñeʼ guidxíñanu laabe. Ximodo zanda iquiiñenu libru riʼ para gusíʼdinu binni gannaxhii Dios jma yaʼ. Ora gusíʼdinu binni ni cayuundanenu ca xiixa nacubi, zanda guinabadiidxanu laa xiixa ni gucaa laa guiníʼ ique de ni caninu, casi: «Xi rusiidiʼ ndiʼ laanu de Jiobá», o «Ximodo rusihuinni ni bizíʼdinu ca Jiobá si nga ni jma ñuulaʼdxiʼ binni ñaca Bixhoze». Pa gusíʼdinu sicaríʼ la? zanda gacanenu ni cayuundanenu ca chuʼ gaxha de Jiobá ne cadi guixeleʼ de laabe.
3 Ora guiene binni ni cayuundanenu ca pabiáʼ galán nga guiziidiʼ de tobi lucha Dios ni dxandíʼ ca ne gúnibe ni la? zaniʼbe casi guníʼ Isaías riʼ: «Ndiʼ nga Dios stinu» (Isa. 25:9). Ora gusiénenu ni caníʼ Stiidxaʼ Dios la? naquiiñeʼ gábinu laabe xi guiráʼ ndaayaʼ nga zapa binni ora guni mandar Jesucristu ti guni ni gudixhe ique Jiobá (Isa. 9:6, 7).
4, 5. Ximodo zanda gusihuínninu nadxiinu Jiobá.
4 Gusihuínninu nadxiinu Jiobá. Para gannaxhiinu Jiobá de guidubi ladxidoʼno, xhiálmanu ne xquendabiaaninu la? cadi caquiiñeʼ si gannaxhiinu laabe, sínuque laaca caquiiñeʼ guiníʼ íquenu casi riníʼ íquebe ne gúninu ni nabe (Sal. 97:10). Rusihuínninu nadxiinu Dios ora rúninu cásipeʼ na ca mandamientu stibe ne ora qué rusaananu de gúninu ni jneza ne gusihuínninu ridxíbinu laabe, neca tiidinu ra nagana o chuʼ tu gucaalú laanu (2 Ped. 3:11; 2 Juan 6).
5 Ora gúninu ni na Dios purtiʼ nadxiinu laa la? rusiécheni laanu (Sal. 40:8). Peru para ganna binni ni cayuundanenu ca zacá ni la? caquiiñeʼ guiene nuu guiráʼ xixé mandamientu stiʼ Dios para gacaneni guiráʼ xpínnibe biaʼ dxi guibánicaʼ. Para gusihuínninu rudiʼnu xquíxepeʼ Jiobá pur guiráʼ cosa ni bizáʼ la? naquiiñeʼ gúninu guiráʼ ni nabe (Deu. 10:12, 13). Gucané ni cayuundaneluʼ ca guiene huaxiéʼ guendanagana ne yuubaʼ zapa pa chinanda neza chaʼhuiʼ stiʼ Jiobá.
6. Xi ndaayaʼ zanda gápanu purtiʼ nadxiinu Jiobá.
6 Dios riguu ndaayaʼ cani nadxii laa. Cumu Jiobá nabé rizaalaʼdxiʼ ca binni ni nadxii laabe la? nga runi rusiénebe laacaʼ ca cosa «ni jma nagana» (1 Cor. 2:9, 10). Ora maʼ biziidicabe de cani naguixhe ique Jiobá guni la? maʼ nánnacabe xi chigaca despué ne runi crécabe zuni Jiobá guiráʼ ni maʼ guníʼ (Jer. 29:11). Zacá zudiicabe cuenta rusihuinni Jiobá guendanachaʼhuiʼ stiʼ luguiáʼ ca binni ni nadxii laa (Éxo. 20:6). Ne zanda gápacabe ti guendanabani ni qué zaluxe purtiʼ nadxii xhaataʼ Jiobá laacabe (Juan 3:16).
7. Ximodo runi sentirluʼ ora gusiidiluʼ xcaadxi binni gannaxhii Jiobá.
7 Ora jma gunibiaʼnu Bixhózenu ni nuu guibáʼ la? jma zápanu ni guinínenu binni (Mat. 13:52). ¡Guizáʼ sicarú nga xa! Zanda gusíʼdinu xcaadxi binni de laabe, ne jmaruʼ si ora gusíʼdinu ca xiiñinu gannaxhiicaʼ Jiobá (Deu. 6:5-7). Nga runi, laanu ne cani rúʼndanenu, cadi guiaanadxinu de gusisácanu Jiobá purtiʼ nabé nachaʼhuiʼ ne laanu (Sal. 145:7).