Lii zanda gácaluʼ maestru
1. Xi dxiiñaʼ jma sicarú naquiiñeʼ quixhe ique guiráʼ ni rucheeche stiidxaʼ Reinu guni.
1 Tobi de ca cosa ni jma rusiecheʼ laanu nga gusíʼdinu sti binni ni cá lu Stiidxaʼ Dios. Guizáʼ sicarú runi sentirnu ora guidxélanu ti binni ni rapa gana guiziidiʼ de Dios, gúʼyanu cayuni crebe stiidxaʼ Reinu, gacanenu laabe guidxíñabe Dios ni bizáʼ guibáʼ ne Guidxilayú, ne gúʼyanu modo guchaa xquendanabánibe, modo riníʼ íquebe ne xpiaʼbe (Sant. 4:8). Ndiʼ nga ni naquiiñeʼ quixhe ique guiráʼ ni rucheeche stiidxaʼ Reinu guni (Mat. 28:18, 20).
2. Xiñee raca nagana para caadxi de cani rucheeche diidxaʼ gusiidicaʼ binni de lu Stiidxaʼ Dios, ne ximodo zanda gudxiilucaʼ guendanagana ca.
2 Bidii lugar gacané Jiobá lii. Caadxi xpinni Dios ni guyuu dxiqué biiyacaʼ nagana nga gúnicaʼ dxiiñaʼ biʼniʼ mandar Dios laacaʼ purtiʼ guníʼ íquecaʼ qué zanda gúnicaʼ ni. Peru neca zaqué la? Moisés, Jeremías, Amós ne xcaadxi binni casi laacaʼ, bíʼnicaʼ dxiiñaʼ bidii Jiobá laacaʼ sin nidxíbicaʼ ne bíʼnicaʼ ni jneza purtiʼ bidiicaʼ lugar gucané Jiobá laacaʼ (Éxo. 4:10-12; Jer. 1:6, 7; Amós 7:14, 15). Apóstol Pablu guníʼ sicaríʼ de laa ne de cani guzané: «Byuí né du laatu stiidxa be sin nidxibi du». Ximodo bíʼnicabe ni yaʼ. Pablu guníʼ gunda bíʼnicabe ni purtiʼ «ucané Dios laa[cabe]» (1 Tes. 2:2). Ngaca nga yanna, naquiiñeʼ ganna dxíchinu zacané Jiobá laanu, zusiaanibe xquendabiaaninu ne zudiibe laanu stipa ni caquiiñenu para ganda gusíʼdinu binni ti guiniisi lu stiidxabe (Isa. 41:10; 1 Cor. 1:26, 27; 1 Ped. 4:11).
3, 4. Ximodo racané Jiobá laanu para ganda gusíʼdinu ni cá lu Stiidxaʼ.
3 Bidii lugar gusiidiʼ Jiobá lii. Jiobá nga Dios ni jma nanna gusiidiʼ, ne maʼ gudíxhebe ximodo guizíʼdinu ni cá lu Stiidxabe para ganda gácanu maestru ni nanna gusiidiʼ chaahuiʼ (Isa. 54:13; 2 Tim. 3:16, 17). Bidii lugar gusiidibe lii ne biyubi ximodo guiene chaahuiluʼ Stiidxaʼ Dios ne modo gusiidiluʼ jma jneza cani zeeda lu Biblia. Cani racané laanu gúninu ni nga Scuela stiʼ cani Rucheeche Diidxaʼ ne Guendaridagulisaa stiʼ Dxiiñaʼ Stinu, peru cadi ngasi, sínuque guiráʼ ca guendaridagulisaa ni rápanu laaca racanécani laanu para gusíʼdinu ni cá lu Stiidxaʼ Dios.
4 Biyubi ximodo ganda gusiidiluʼ jma jneza ca cosa nagana ni zeeda lu Biblia. Para gúniluʼ ni la? zanda chinándaluʼ modo na libru Benefíciese, lu yaza 227, ra na: «Pa nuuluʼ guiene binni ni caniʼluʼ la? naquiiñeʼ guieʼnuʼ ni lii primeru». Sti cosa ni racané laanu nga guicábinu ra ridagulisaanu purtiʼ zacá ziaananenu stale cosa ni zanda iquiiñenu despué. Nga runi, biindaʼ chaahuiʼ, ne zacá maʼ qué zadxíbiluʼ ora gusiidiluʼ.
5. Xiruʼ zanda gacané laanu ra ridagulisaanu para gácanu maestru de lu Stiidxaʼ Dios.
5 Dede ora guzulú tuuxa gucheeche diidxaʼ racané ca xpinni Cristu laa para gúnini (Luc. 10:1). Nga runi, galán quixhe íquenu guiréʼnenu cani maʼ xadxí rucheeche diidxaʼ, casi ca precursor, ca binnigola ne cani riganna ca binni ridagulisaa, ti gúʼyanu modo rusiidicaʼ binni ni cá lu Biblia. Biiyaʼ modo rusiénecabe cani zeeda lu Biblia, modo riguíxhecabe ejemplu ne modo riquiiñecabe xcaadxi libru ne revista ni nápanu. Gunabaʼ laacabe gábicabe lii ximodo zanda gusiidiluʼ jma jneza (Pro. 1:5; 27:17). Guiráʼ modo nexheʼ guizíʼdinu ca la? zacá nga rusiidiʼ Jiobá laanu (2 Cor. 3:5).
6. Xi caquiiñenu para gusíʼdinu Stiidxaʼ Dios jneza.
6 Bidii lugar gacané Jiobá lii ne biquiiñeʼ guiráʼ ni cudiibe laanu para guizíʼdinu. Bizeeteʼ lu ca oración stiluʼ racaláʼdxiluʼ guiniisiluʼ jma lu stiidxabe (Sal. 25:4, 5). Zacá zacaneluʼ binni gusiidiʼ Stiidxaʼ Dios jma jneza, casi rúniluʼ ni, ne nga zusiecheʼ lii stale.