Gucheechenu diidxaʼ ndaaniʼ ca lugar ra ruquíxecabe yoo
1. Dede paraa nga naquiiñeʼ gucheechenu diidxaʼ pa nuunu guinínenu guiráʼ binni.
1 Apóstol Pablu gucuá ique gucheeche diidxaʼ guiráʼ ra nuu binni (Hech. 20:24). Laanu laaca ngaca nga racaláʼdxinu gúninu. Nga runi, rúninu stipa pur chinenu stiidxaʼ Reinu ra nuu guiráʼ binni ni nabeza neza ra rucheechenu diidxaʼ, dede ndaaniʼ ca lugar ra ruquíxecabe yoo. Nabé galán gucheechenu diidxaʼ ca lugar riʼ purtiʼ nuu stale binni nabeza racá, peru laaca nánnanu nagana nga para chindanu ranuu guirácabe. Xiñee yaʼ.
2. Xiñee caquiiñeʼ guiníʼ ique chaahuinu xi gúninu ora maʼ cucheechenu diidxaʼ ca lugar ra ruquíxecabe yoo.
2 Ti razón nga purtiʼ nabé ridxibi binni chindánacabe ralidxi ne laaca nuu stale guendaquéiquiiñeʼ, nga runi, riguucabe llave ca yoo ca ne riguíxecabe tu gapa raqué o riguucabe cámara para gúʼyacabe guiráʼ tu guiuu (2 Tim. 3:1, 2). Ne zándaca laaca qué zaná binni ni cayapa raqué guiuʼnu purtiʼ qué randa riuu tuuxa ni cadi cabézacabe. O zándaca gábicabe laanu guireʼnu ndaaniʼ yoo que, jmaruʼ si pa tuuxa de ni nabeza raqué guiníʼ cuchiichinu laacaʼ. Nga runi, caquiiñeʼ guiníʼ ique chaahuinu xi gúninu.
3. Pora ndiʼ jma galán gucheechenu diidxaʼ ca lugar ra ruquíxecabe yoo ne xiñee.
3 Pora gucheechenu diidxaʼ. Ndaaniʼ ca yoo riʼ la? jma galán gucheechenu diidxaʼ ora nánnanu zadxélanu binni cásica rúninu xcaadxi lugar. Pa chuunu ora qué guinni stale de laacabe la? zándaca guiníʼ íquecabe mal de laanu. Stale de ca xpinni Cristu jma ridxélacaʼ binni huadxí, zaqueca ca sábadu ne domingu huadxí. Pa gucheechenu diidxaʼ siadoʼpeʼ, ne jmaruʼ si pa sábadu o domingu ni la? zándaca guidxiichicabe ne gábicabe ni cayapa raqué.
4, 5. Ximodo zanda chuʼnu ca lugar ra ruseegucabe ne llave.
4 Ximodo chuʼnu. Cadi guyúbiluʼ guiníʼneluʼ ni cayapa raqué o stobi ni runi dxiiñaʼ raqué ante guzulú gucheecheluʼ diidxaʼ. Pa deʼguʼ tobi de ca lugar ra nuu ca yoo riʼ ne llave peru nápani interfón la? galán iquiiñeluʼ ni ne guyúbiluʼ tuuxa ni gudii lugar chuʼluʼ. Nuu lugar zanda guxhidxinaluʼ sti puertaʼ despué de guiníʼneluʼ binni ni bitiidiʼ lii. Peru pa cadi zacá ni la? jma galán guireeluʼ ne iquiiñeluʼ interfón ca para ganda guiníʼneluʼ sti binni. Lii si zudiiluʼ cuenta panda binni zanda guiníʼneluʼ lugar ca.
5 Zándaca nuu binni jma ziuulaʼdxiʼ guiniʼluʼ lu interfón ca xi para zigánnaluʼ laa. Pa zacá ni la? guníʼ tu lii ne stale respetu. Zanda guiniʼluʼ lá binni ca pa cá ni lu directorio. Guníʼ xi nuuluʼ guiníʼneluʼ laabe ne caadxi si diidxaʼ. Caadxi de ca xpinni Cristu huayuundacaʼ ti ndaa de ni cá lu libru Razonamiento ne nga huayacané laacaʼ.
6. Xi gúninu pa nuu tu cayapa lugar ra chuunu ca.
6 Pa qué riná ni cayapa raqué chuʼ binni para gucheeche diidxaʼ la? zanda guiníʼneluʼ laabe, purtiʼ stale de laacabe riuulaʼdxiʼ guʼndaʼ ca libru ne revista stinu. Dede zanda gúʼndaneluʼ laabe de Biblia ra nuube ca. Pa binni cayapa raqué gudii lugar lii chigánnaluʼ tuuxa ni maʼ runibiaʼluʼ la? cadi galán diʼ guxhidxinaluʼ xcaadxi puerta.
7. Ximodo zanda chinenu cani iquiiñenu.
7 Modo chinenu cani iquiiñenu ne modo gácunu lari. Para cadi guuyadxipeʼ binni laanu, cadi naquiiñeʼ chinenu bolsa o portafolio naroʼbaʼ, jma galán chinenu tobi ni nahuiiniʼ o cadi liica chinenu. Caadxi de cani rucheeche diidxaʼ rinecaʼ ca libru ni gusaananenu binni beeu ca ndaaniʼ ti carpeta ne rinecaʼ Biblia lu nacaʼ o ndaaniʼ bolsa gamixaʼ sticaʼ.
8. Ximodo zanda gucheechecabe diidxaʼ ndaaniʼ ca yoo riʼ.
8 Laaca cadi naquiiñeʼ diʼ chuʼ stale de laanu ti lugar si, casi ra ribézacabe binni ne ra ruzuhuaa carru ti cadi guuyadxipeʼ binni laanu. Sti cosa nga gúʼyanu xi naquiiñeʼ gúninu ca lugar ra nuu stale guendaquéiquiiñeʼ (Pro. 22:3). Zanda gucheeche chupa o chonna pareja diidxaʼ ti pisu si gaxha gaxha, o laga cuxhidxiná tobi la? xcaadxi cueza laacabe.
9. Ximodo gusihuínninu sicarú xpiaʼnu. Xiñee nabé riquiiñeʼ gúninu ni.
9 Ora chuʼluʼ ndaaniʼ cani, bichaa ñeeluʼ ne biseeguʼ puertaʼ. Zacá qué zuchiichiluʼ binni purtiʼ sicarú xpiaʼluʼ. Ora maʼ nuuluʼ ndaaniʼ cani la? guyé ra nuu elevador stini o pisu ra chigucheecheluʼ diidxaʼ lugar de guiaanaluʼ ra puertaʼ si. Zacá qué zaníʼ ique binni mal de lii.
10. Xi zanda gúninu para cadi guchiiñanu cani nabeza lu pisu ra cucheechenu diidxaʼ.
10 Ora maʼ caninenu tuuxa ni nabeza ca lugar riʼ la? cadi galán diʼ guininu nadipaʼ purtiʼ zándaca gueeda gunadiágacabe laanu. Ora guinínenu tuuxa ni cucheechenenu diidxaʼ laacaʼ naquiiñeʼ guininu chaahuiʼ para cadi guiníʼ íquecabe mal de laanu. Caadxi de cani rucheeche diidxaʼ ruxhidxinacaʼ primé puertaʼ ni nuu pisu ra chiguzulucaʼ de racá maʼ guxhidxinacaʼ puertaʼ ni nuu ra rilúxeni, lugar de gúnicabe ni yoo pur yoo para cadi guchiiñacabe cani nabeza raqué. Laaca naquiiñeʼ gánnanu zándaca guidxibi binni pa guxhidxinanu puertaʼ ca nadipaʼ o casi ora laanu ngue runi mandarnu raqué.
11. Xi zanda gúninu ora chindanu ti puertaʼ ni napa ra ruuyacabe binni.
11 Pa napa puertaʼ ca ra ruuyacabe binni la? laguzuhuaa gaxha de laani ti ganda gúʼyacabe laatu. Biiyadxí luni, ne pa gudiiluʼ cuenta guidxiña tuuxa ra nuuni bigapadiuxi laa ne guníʼ xi zeluʼ. Pa guinabadiidxacabe tu lii la? gudxi laacabe tu laluʼ ne tu lá ni zineluʼ ca. Zacá zándaca guxheleʼ binni ca puertaʼ stiʼ. Ne pa qué guxhélebe la? lii guníʼ xi zeluʼ.
12. Xi zanda gúninu para cadi guidxiichi binni pur ca guiʼchiʼ rusaananu ca yoo ra guirutiʼ guinni.
12 Ora guirutiʼ guinni ra yoo. Tobi de ca cosa ni ruchiichi cani rapa ca lugar ca nga gutópacabe ca guiʼchiʼ ni rusaananu ralidxi binni despué de tiidinu. Bietenalaʼdxiʼ, zándaca gueeda guiaba guiʼchiʼ ni uguuluʼ ra puertaʼ ne guiníʼ ique binni guixi ni, nga runi, naquiiñeʼ uguuluʼ ni ti lugar ra cadi guʼyaʼ sti binni ni.
13. Xi naquiiñeʼ gúniluʼ pa guidxiichi ti binni ni nabeza raqué.
13 Binni ni ridxiichi. Pa guiree ti binni ni cadxiichi ne guni pur chitidxi ni cayapa raqué la? jma galán guireeluʼ de pisu que ne guibiguétaluʼ sti dxi. Ne nuu biaje jma jneza guireeluʼ de lugar que ti cadi guchiichiluʼ ni cayapa raqué. Ora guizaacaluʼ sicaríʼ, neca qué guiníʼ binni ca cadi chigánnaluʼ laa, jma galán gucaaluʼ xi númeru yoo stibe ti chuʼ ni bicaaluʼ ca cueʼ tarjeta ra cá paraa rucheechetu diidxaʼ ti maʼ cadi tiidicabe ra yoo ca. Tiidiʼ si ti tiempu la? maʼ zanda chigánnatu laacabe sti biaje cásica raca ne ca yoo ra maʼ guirutiʼ tu ridiʼdiʼ ti gúʼyatu xi racalaʼdxiʼ ca binni ca.
14, 15. Xi gúniluʼ pa gábicabe lii guireeluʼ de lugar ra cucheecheluʼ diidxaʼ.
14 Pa gábicabe lii guireeluʼ. Pa ni cayapa raqué o tuuxa de ni runi dxiiñaʼ raqué gabi lii guireeluʼ de lugar que la? jma jneza guireeluʼ casi gábibe lii. Qué racaláʼdxinu guchiichinu ca binni ca ne guni nga guchíñacabe laanu nezalú juez o gábicabe laanu zábicabe puliciá. Guietenaláʼdxinu cadi guiráʼ diʼ cani rapa ca lugar ca nanaláʼdxicaʼ laanu, sínuque cayúnisicaʼ xhiiñacaʼ.
15 Nuu tiru zanda gusiéneluʼ binni ni cayabi lii guireeluʼ ca xiñee zigánnaluʼ ca binni ca, peru bíʼnini ne respetu (1 Ped. 3:15). Zanda gábiluʼ laabe naroʼbaʼ dxiiñaʼ nga cayúnibe purtiʼ cayápabe ca binni nuu raqué ti cadi guidxiichinecaʼ laabe. Zándaca gudiibe lugar guiaanaluʼ, peru pa coʼ la? biree sin gábiluʼ laabe gastiʼ. Pa ganda la? cada biaje cheluʼ gudxi laabe pa zanda gusaanaluʼ revista o libru ra ribézacabe binni o ra rusaanacabe carta (Col. 4:6). Riquiiñeʼ gábicabe binnigola ni ruuyaʼ modo rireeche diidxaʼ de cani guizaacacabe.
16. Xi naquiiñeʼ gúninu pa qué na binni gucheechenu diidxaʼ ca lugar ra nuu stale yoo.
16 Tiidiʼ si ti tiempuhuiiniʼ la? riquiiñeʼ gúʼyatu pa maʼ zanda guibiguétanu lugar que para gucheechetu diidxaʼ. Peru pa nuuruʼ guendanagana lugar ca la? ca binnigola naquiiñeʼ guiniʼcaʼ Betel para gabi laacabe xi gúnicabe ne cadi gudiicabe lugar gunichaahuiʼ cani rucheeche diidxaʼ ni laasicaʼ. Pa qué ganda gucheechenu diidxaʼ ca lugar ca la? zanda guyúbinu xcaadxi modo casi pur teléfono o pur carta. Caadxi xpinni Cristu rucheechecaʼ diidxaʼ ndaaniʼ calle ra nuu yoo ca o gaxha de laani siadóʼ o huadxí, ora maʼ zeʼ binni dxiiñaʼ ne ora maʼ guibiguetaʼ.
17. Xiñee naquiiñeʼ gucheechenu diidxaʼ ca lugar ra ruquíxecabe yoo.
17 Mayaca guinitilú guiráʼ cosa malu nuu yanna riʼ, ne cani gusisaca si lá Jiobá nga zalá. Peru, ximodo gusisácacabe labe «pa caʼru guni cre ca laabe. Ne qué zanda guni cre cabe tobi ni qué huayuu dxi guna diaga cabe stiidxaʼ» (Rom. 10:13, 14). Stale de cani «maʼ nuu listu para guicaa guendanabani ni qué zaluxe» nabézacaʼ ca lugar ca (Hech. 13:48, NM). Pa guyúbinu ximodo gucheechenu diidxaʼ ca lugar ca la? zanda chinenu ca diidxaʼ nacubi ne galán ca ra nuucabe.