Guyúbinu ximodo «guni cre binni stiidxa Cristu»
1. Xi caquiiñeʼ guni tobi ni rucheeche diidxaʼ pur binni ne xiñee.
1 Cumu nanna Pablu zabeendú binni ni galán pa guiziidicaʼ de stiidxaʼ Cristu la? ngue runi, bicheechebe diidxaʼ ra nuucaʼ (1 Cor. 9:16, 19, 23). Ngaca nga ni rucaa laanu gúninu stipa pur guyúbinu ximodo gucheechenu diidxaʼ ra nuu binni.
2. Xi zanda gúninu para guidxélanu gadxé gadxé binni ni gucaadiaga laanu.
2 Pora ne paraa gúninu ni. Ti binni ni nanna guinaazeʼ benda la? cadi ratiica diʼ nga rulaa tarraya stiʼ, sínuque ra riníʼ íquebe jma zadxélabe benda. Zacaca nga laanu, cumu laaca ruyúbinu ximodo guidxélanu jma binni gucaadiaga stiidxaʼ Cristu la? zándaca caquiiñeʼ guchaʼnu hora riuunu ti guidxélanu gadxé gadxé binni ni gucaadiaga laanu (Mat. 4:19; 13:47). Ñee zanda gucheechenu diidxaʼ lu calle ora maʼ zixhinni o siadoʼroʼ la? Pablu bidii laanu ti ejemplu sicarú purtiʼ bicheeche diidxaʼ ratiica nuu binni (Hech. 17:17; 20:20, 24).
3, 4. Xi zanda gúninu para gucaadiaga binni laanu, ne xi zabeendunu.
3 Guininu ni caquiiñeʼ ganna binni. Cani rinaazeʼ benda ca ruyúbicaʼ modo guinaazecaʼ benda ni racaláʼdxicaʼ. Yanna laanu, xi zanda guininu para chuulaʼdxiʼ binni ni nuu neza ra rucheechenu diidxaʼ gucaadiaga laanu yaʼ. Primeru zanda guininu de ti tema ni ziuuláʼdxibe gánnabe, de racá gucaadiáganu xi gábibe laanu (Sant. 1:19). Peru para ganda guiniʼbe xi nuu ndaaniʼ ladxidoʼbe la? galán guinabadiidxanu laabe xi riníʼ íquebe de ni caninu ca (Pro. 20:5). Óraca maʼ zanda guininu de xiixa ni caquiiñeʼ binni ca ganna. Pablu guca casi binni de guiráʼ ladu para gunda guníʼnebe laacaʼ (1 Cor. 9:22). Biyúbibe ximodo gucaadiaga binni laabe ne guníʼnebe laacaʼ de ni caquiiñeʼ gánnacaʼ, ne ngaca nga ni naquiiñeʼ gúninu para chindá ni cusíʼdinu ndaaniʼ ladxidóʼ binni.
4 ¡Nabé riéchenu nga ora rininu ca «diidxaʼ nacubi ne galán» ca! (Isa. 52:7.) Ne cumu racaláʼdxinu «guni cre binni stiidxa Cristu» la? ruyúbinu modo guinínenu guiráʼ binni (1 Cor. 9:23).