Rusihuínninu nadxiinu Dios ora rucheechenu diidxaʼ
1. Xi biʼniʼ Jesús purtiʼ gunnaxhii Dios.
1 Cumu gunnaxhii Jesús Jiobá la? ngue bicaa laabe gúnibe xhiiñaʼ. Lu guiráʼ ni bíʼnibe dxi bicheechebe diidxaʼ bisihuínnibe nadxiibe Bixhózebe. Laapebe guniʼbe sicaríʼ: «Para ganna binni nadxiee Bixhozeʼ, ne rune ni gudxi naa guneʼ» (Juan 14:31). Cumu zinándanu Jesús la? laaca zanda gusihuínninu nadxiinu Dios ora gucheechenu diidxaʼ (Mat. 22:37; Efe. 5:1, 2).
2. Xi rusihuínninu ora rucheechenu diidxaʼ.
2 «Guisácapeʼ laluʼ.» Ora rininu de Jiobá ne de Reinu stiʼ ratiica nuunu la? rusihuínninu nadxiinu Dios ne racanenu para gusisaca binni labe (Sal. 83:18; Eze. 36:23; Mat. 6:9, NM). Cásica biʼniʼ Jesús, ora qué rusaananu de gucheechenu diidxaʼ rusihuínninu dxandipeʼ racaláʼdxinu guisaca lá Jiobá ne gaca ni nabe (Mat. 26:39).
3. Xi zanda gúninu purtiʼ nadxiinu Jiobá.
3 Runi huantarnu intiica guendanagana purtiʼ nadxiinu Dios. Cumu nadxiinu Jiobá la? randa rudxíʼlunu intiica guendanagana ni gápanu (1 Cor. 13:4, 7). Jesús bidxaagalú stale guendanagana ni ñándaca nibee gana laa nucheeche diidxaʼ. Peru neca bizaacabe stale cosa, qué nusaanabe de nucheechebe diidxaʼ purtiʼ gunnaxhiibe Jiobá ne guyuuláʼdxibe gúnibe ni na (Mar. 3:21; 1 Ped. 2:18-23). Laanu laca ridxaagalunu stale guendanagana cásica Jesús, peru zanda gudxíʼlunu cani purtiʼ nadxiinu Dios. Pa guiduʼyaʼ chaahuinu modo biʼniʼ Jesús ne chinándanu ejemplu stiʼ la? zacaneni laanu para cadi gusaana de gucheechenu diidxaʼ. Nuu tiru zándaca chuʼnu triste purtiʼ rucaalú binnilídxinu laanu, huaranu, maʼ huaniisinu o pur qué riná binni gucaadiaga laanu. Peru nin tobi de ca nga qué zucueeza laanu de gucheechenu diidxaʼ biaʼ gándatiʼ ne gusihuínninu nadxiinu Jiobá de guidubi ladxidoʼno.
4. Xi zanda guni binni ni nadxii Jiobá.
4 Stale cosa nga ni zanda gúninu purtiʼ nadxiinu Dios ne ti ndaayaʼ nga gusihuínninu ni de guidubi ladxidoʼno ora rucheechenu diidxaʼ (1 Cor. 13:13). Nga runi, cumu nabé nagueenda cadxiña dxi guisaca lá Jiobá biaʼ qué huayuuyaʼ binni la? riquiiñeʼ gúninu stipa para cadi gusaana de gannaxhiinu laabe (Mat. 22:36-38; Fili. 1:9).