Ñee maʼ nuuluʼ listu para cheluʼ scuela la?
1. Xi zanda gúniluʼ ora maʼ guzulú scuela.
1 Pa deruʼ bizululuʼ scuela o pa maʼ napa iza de canazaluʼ la? naquiiñeʼ gannuʼ zadxaagaluluʼ caadxi guendanagana. Ziuu tu zacalaʼdxiʼ gucaa lii guʼnuʼ xiixa ni cadi jneza, purtiʼ nácaluʼ xpinni Cristu. Peru laaca galán guiníʼ íqueluʼ zanda guyúbiluʼ modo guiníʼneluʼ laacabe «xii nga ni dxandí» (Juan 18:37). Ñee maʼ nuuluʼ listu la?
2. Xiñee zanda guininu maʼ nuuluʼ listu para cheluʼ scuela.
2 Pa guiníʼ ique chaahuiluʼ la? qué gápaluʼ xi pur chuʼluʼ xizaa, purtiʼ maʼ bisiidiʼ Jiobá lii stale cosa, ne laaca maʼ gucané bixhózeluʼ ne jñaaluʼ lii ne mozo ni nuu xpiaaniʼ ne ni runi jneza (Pro. 1:8; 6:20; 23:23-25; Efe. 6:1-4; 2 Tim. 3:16, 17). Zándaca yanna maʼ nannuʼ xi guiráʼ zadxaagaluluʼ ra scuela. Ne pa nannuʼ ximodo ca baʼduscuela ca la? biyubi modo iquiiñeluʼ cani maʼ biziidiluʼ lu Biblia ne guyuu listu para gucheecheluʼ diidxaʼ (Pro. 22:3). Biindaʼ chaahuiʼ ca conseju stiʼ Biblia ni zeeda lu guiropaʼ libru Los jóvenes preguntan, ne zaqueca lu ca tema ni reeda gatigá lu revista ¡Despertad! para cani nahuiiniʼ biaʼ lii.
3. Pora zanda gucheecheluʼ diidxaʼ ra scuela.
3 Bietenalaʼdxiʼ, lii si nga zanda gucheecheluʼ diidxaʼ ra scuela ne zanda gúniluʼ ni gadxé gadxé modo. Xcaadxi baʼduscuela zuuyacaʼ ráculuʼ lari jneza, galán riniʼluʼ ne galán xpiaʼluʼ. Laaca zuuyacabe runi respetarluʼ ca maestru ne ca xcompañéruluʼ, dede zuuyacabe nabé rucaa íqueluʼ scuela. Zudiicabe cuenta galán guiráʼ ni cusiidicabe lii para guibániluʼ jneza. Ñee cadi rábiluʼ zanabadiidxacabe lii xiñee maʼ gadxé lii de xcaadxi la? (Mal. 3:18; Juan 15:19.) Óraca nga zanda gusiéneluʼ laacabe cani runi creluʼ (1 Tim. 2:9, 10). Ne sti cosa ni naquiiñeʼ gannuʼ nga rúnicabe homenaje, desfile ne xcaadxi saa lu guidubi iza. Xi guicábiluʼ ora guinabadiidxacabe lii xiñee qué rúniluʼ guiráʼ nga yaʼ. Ñee zaʼbuʼ laacabe: «Qué riná religión stinneʼ guneʼ cani purtiʼ testigu stiʼ Jiobá naa» la? Ñee cadi jma galán guiníʼneluʼ laacabe de Jiobá, Bixhózeluʼ ni nadxii lii la? Pa chuʼluʼ listu dede ante ne gudiiluʼ lugar gacané Jiobá lii la? zanda guiníʼneluʼ tutiica binni de Dios, dede ne cani canazáneluʼ scuela ne ca maestru (1 Ped. 3:15).
4. Xiñee cadi naquiiñeʼ guidxíbiluʼ ora maʼ cheluʼ scuela sti biaje.
4 Zándaca ridxíbiluʼ ora maʼ chiguzulú scuela sti biaje, peru cadi guiaandaʼ lii nuu stale binni ni zanda gacané lii ti gúniluʼ ca cosa ca jneza. Yanna, ñee cadi galán guiníʼ íqueluʼ ca modo zanda gucheecheluʼ diidxaʼ ra scuela la? Nga runi, ¡Cadi guidxíbiluʼ! ¡Lii maʼ nuuluʼ listu para cheluʼ scuela!