Ca guendaridagulisaa ni raca para gucheechenu diidxaʼ
1. Xiñee risaca nga gatachaahuiʼ modo gucheechenu diidxaʼ.
1 Dxi bicheeche Jesús diidxaʼ la? gudixhe chaahuibe modo gúnibe ni ne bíʼnibe ni jneza. Ngaca nga ejemplu ni naquiiñeʼ chinanda cani ruuyaʼ modo cayaca xhiiñaʼ Reinu lu guidubi Guidxilayú. Nga runi, ante chigucheeche ca xpinni Cristu diidxaʼ raca ti guendaridagulisaa ra rié ca grupu ca para chigucheechecaʼ diidxaʼ (Mat. 24:45-47; 25:21; Luc. 10:1-7).
2. Xi rieeteʼ lu ca guendaridagulisaa ni raca para chigucheechenu diidxaʼ.
2 Racanécani laanu. Ca guendaridagulisaa ni raca para gucheechenu diidxaʼ ca riguucani gana laanu, rusiidicani laanu modo gucheechenu diidxaʼ de yoo pur yoo. Zanda guiuundaʼ textu dxi ca pa cuzeeteni de dxiiñaʼ ni chigúninu ca. Ne nuu biaje rieeteʼ xiixa ni zeeda lu Xhiiñaʼ Reinu ni Rúninu, o ni zeeda lu libru Razonamiento ne Benefíciese. Ne nuu tiru ridiʼdiʼ ximodo gusaananu ti libru o ti revista. Ante gaca oración para guilúxeni la? guirácabe naquiiñeʼ gánnacabe tu chinécabe ne paraa chigucheechecabe diidxaʼ. Ne ora maʼ bilúxeni guirácabe maʼ zanda chécabe ra chigucheechecabe diidxaʼ, guendaridagulisaa ca qué zandaa diʼ ni jma de quince minutu.
3. Tuu nga cani ruuyaʼ gaca ca guendaridagulisaa para guireeche diidxaʼ.
3 Tuu nga cani naquiiñeʼ guʼyaʼ gaca ni. Binnigola ni ruuyaʼ modo rireeche diidxaʼ nga riguixhe modo gaca ca guendaridagulisaa ca. Cada binnigola stiʼ ti grupu o ni racané laabe naquiiñeʼ quíxhecaʼ modo guni grupu sticaʼ dxiiñaʼ ca sábadu ne ca domingu. Naquiiñeʼ guireenécabe grupu stícabe ne gúʼyacabe chuʼ stale lugar ra gúnicabe dxiiñaʼ ca dxi ca ne chinándacabe ni gabi binnigola ni ruuyaʼ modo rireeche diidxaʼ laacabe. Peru ndaaniʼ semana la? binnigola ni ruuyaʼ modo rireeche diidxaʼ ca zanda guyubi xcaadxi binnigola o siervu ministerial para guireené ca grupu ca ne gabi laacabe paraa chigucheechecabe diidxaʼ.
4-6. 1) Xi para nga ruyúbicabe ca lugar ra ridagulisaanu para gucheechenu diidxaʼ. 2) Xi zanda guinabadiidxaʼ ca binnigola ante guiniʼcaʼ paraa ne padxí gácacani.
4 Paraa ne pora gácacani. Para ganda gucheeche ca binni ridagulisaa diidxaʼ guidubi ra raca caber laacaʼ la? ca binnigola ca naquiiñeʼ quíxhecaʼ gaca ca guendaridagulisaa riʼ gadxé gadxé lugar neza ra chigucheechecabe diidxaʼ, ti cadi cheʼ ca binni ridagulisaa ti lugar si. Laaca zanda iquiiñecabe Yoo stiʼ Reinu. Stale neza binni ridagulisaa rúnicaʼ ni ndaaniʼ Yoo stiʼ Reinu chupa chonna minutu despué de tiidiʼ libana ne guiuundaʼ revista Torre stiʼ ni rapa. Pa ganda la? galán gaca guendaridagulisaa ca gaxha de ra chiguireeche diidxaʼ. Naquiiñeʼ gúʼyatu gatigá pa zándaruʼ iquiiñeʼ ca lugar ra ridagulisaatu, ti ganda gucheechetu diidxaʼ biaʼ ra raca caber laatu.
5 Cumu gadxé gadxé nga cada lugar ra rireeche diidxaʼ la? naquiiñeʼ guihuinni padxí ne pora gaca ca guendaridagulisaa ca para guireeche diidxaʼ. Ca guendarinabadiidxaʼ ni zeeda lu sti párrafo ca zanda iquiiñecani para gúʼyatu paraa ne pora jma galán gaca ca guendaridagulisaa ca.
6 Paraa jma caquiiñeʼ guireeche diidxaʼ. Pora jma galán guireeche diidxaʼ de yoo pur yoo. Ñee zanda gucheechetu diidxaʼ de yoo pur yoo ca huadxí ca o chigánnatu binni sti biaje la? Ne ora maʼ nápatu guiʼchiʼ ra cá modo gácacani, zanda gucaatu ni lu tableru. Zacá zanda guininu casi guníʼ Pablu riʼ: «Ma qué gapa ra gune dxiiña ladu riʼ». Guiráʼ ca xpinni Cristu racaláʼdxicaʼ guiníʼnecaʼ guiráʼ binni ni nabeza ladu rucheechecaʼ diidxaʼ (Rom. 15:23).
7. Xi naquiiñeʼ ganna ni chiguni guendaridagulisaa ni raca para guireeche diidxaʼ.
7 Ximodo gácacani. Ni chiguni guendaridagulisaa riʼ naquiiñeʼ gúʼndabe dede ante xi zanda guzeetebe luni, zacá zusihuínnibe runi respetarbe cani raca ndaaniʼ xquidxi Dios. Ni chiguni ni ca naquiiñeʼ ganna paraa chiguireeche diidxaʼ ante guzulú ni. Naquiiñeʼ guzulú ni ora gudíxhecabe gaca ni, gusiidicabe xiixa ne gaca ni biaʼ chii o quince minutu. Ora guiluxe ni guirácabe ziécabe ra chiguireeche diidxaʼ. Cadi naquiiñepeʼ cuézacabe pa gueeda tuuxa maʼ huadxí, peru galán gusaanacabe razón paneza nuucabe. Guirácabe zánnacabe ximodo gucheechecabe diidxaʼ dxi ca pa gaca guendaridagulisaa ca jneza (Pro. 11:14).
8. Ximodo zanda gacanenu cani runi guendaridagulisaa para guireeche diidxaʼ.
8 Cadi naquiiñeʼ guiáʼdxanu. Dxandíʼ nga caquiiñeʼ gacanésaanu (Heb. 13:17). Stale de ca biaje ca, ni guni guendaridagulisaa riʼ zaníʼ tu chiné cada tobi de cani guiree. Ca xpinni Cristu ni maʼ xadxí rucheeche diidxaʼ zanda gacanecaʼ cani nacubi cuzulú pa checaʼ ora gaca ca guendaridagulisaa riʼ. Ne pa chúʼcabe listu para guireenécabe gadxé gadxé xpinni Cristu la? laaca zacaneni laacabe (Pro. 27:17; Rom. 15:1, 2). Nga runi galán gúninu stipa chindanu tempranu. Cumu runi respetarnu modo raca dxiiñaʼ ndaaniʼ xquidxi Dios ne rizaaláʼdxinu ca xpinni Cristu la? zucaa nga laanu guchaʼnu cani rúninu ti ganda chuunu ora gaca ca guendaridagulisaa ca (2 Cor. 6:3, 4; Fili. 2:4).
9. Ximodo racané ca precursor ora raca guendaridagulisaa para guireeche diidxaʼ.
9 Modo racané ca precursor. Cani rucheeche diidxaʼ nabé riéchecaʼ ora rié ca precursor ra raca guendaridagulisaa riʼ, purtiʼ riguucabe gana laacaʼ. Nánnanu stale dxiiñaʼ nga runi ca precursor ca, purtiʼ ribiguétacabe ra nuu binni ni riuulaʼdxiʼ guiziidiʼ, ruundanécabe laacaʼ Biblia, ne laaca racanécabe binnilídxicabe ne rúnicabe dxiiñaʼ. Nga runi, cadi galán diʼ gucaa ca binnigola laacabe gúnicabe guendaridagulisaa para guireeche diidxaʼ, jmaruʼ si pa guidubi semana ca rácacani. Neca zacá zanda gúnicabe chupa chonna guendaridagulisaa riʼ ndaaniʼ semana. Laacani zeeda gácacani casi ti scuela ra zanda gusiidiʼ ca precursor ca xcaadxi xpinni Cristu de ni nánnacaʼ. Ca precursor ca maʼ biziidicaʼ stale purtiʼ nabé rucheechecaʼ diidxaʼ. Ne zanda gusiidicabe ni nánnacabe. Cumu nabé rucheechecabe diidxaʼ ne gana ne nuu tiru rúnicabe ca guendaridagulisaa ca la? nga runi nácacabe ti ejemplu para xcaadxi ne riéchecaʼ ora gúʼyacaʼ laacabe.
10. Xiñee galán cheʼ guiráʼ cani rucheeche stiidxaʼ Reinu ora raca ca guendaridagulisaa para guireeche diidxaʼ.
10 Jma nga rucheechenu diidxaʼ de yoo pur yoo para gusíʼdinu binni de Reinu stiʼ Dios, cásica biʼniʼ Jesús ne ca discípulo stiʼ. Ca guendaridagulisaa ni raca para gucheechenu diidxaʼ ca riguucani gana laanu ne rusiidicani laanu ximodo gúninu dxiiñaʼ ca jma jneza. Nga runi, galán cheʼ guiráʼ cani rucheeche stiidxaʼ Reinu ora gaca ca guendaridagulisaa riʼ (Hech. 5:42; 20:20). Gúninu stale stipa pur quixhe chaahuinu tiempu stinu para ganda chuʼnu ora gácacani. Xi zabeendunu yaʼ. Zaguu Jiobá ndaayaʼ dxiiñaʼ cayúninu ne zusiéchenu Xaíque stinu, Jesucristu (Mat. 25:34-40; 28:19, 20).