Ñee maʼ nuuluʼ listu para gucheecheluʼ diidxaʼ ratiica la?
1. Bizeeteʼ ti ejemplu stiʼ tuuxa ni bicheeche diidxaʼ ratiica guyuu ne guleendú ni galán.
1 Zanda cueendunu stale cosa galán pa gucheechenu diidxaʼ ratiica nuunu. Lu Biblia rieeteʼ ejemplu stiʼ cani bicheeche diidxaʼ ratiica guyuucaʼ ne guleenducaʼ ni galán (Juan 4:7-15). Ximodo zanda chuʼnu listu para gucheechenu diidxaʼ zacaca yaʼ.
2. Xiñee jma nagueenda zucheechenu diidxaʼ pa gácunu lari jneza ne nayá.
2 Gácunu lari jneza ne nayá. Pa huaxiéʼ galán modo nácunu lari la? zaca nagana para laanu gucheechenu diidxaʼ. Peru zanda guinínenu binni de ni runi crenu pa gácunu lari jneza ne nayá (1 Tim. 2:9, 10). Ne zándaca dede ziuu tu guinabadiidxaʼ laanu xiixa de ni cazíʼdinu ora gúʼyacaʼ nayá ne galán modo rácunu lari. Nga nga ni bizaaca chupa Testigu dxi zecaʼ de viaje. Gurí ti musulmán cuéʼcabe ne gunabadiidxaʼ laacabe pa xpinni Cristu guirópacabe, purtiʼ cadxagayaa modo nácucabe lari. Zaqué gunda guniʼnécabe hombre que biaʼ chonna hora.
3. Ñee huaníʼneluʼ binni casi biʼniʼ Jesús la?
3 Ximodo guzulú guinínenu binni. Para gunda bizulú guniʼné Jesús samaritana que cueʼ bizé stiʼ Jacob la? gunábabe laa caadxi nisa guebe. Laanu laaca zanda guzulú guinínenu binni pa guinabadiidxanu o gábinu laacaʼ xiixa. Zándaca ziuu ora zácani nagana para laanu, peru pa guni crenu zacané Jiobá laanu la? zanda gúninu ni (1 Tes. 2:2).
4. Ximodo zanda chuʼnu listu para gucheechenu diidxaʼ ratiica nuunu.
4 Guyúbinu modo guinínenu binni. Stale de cani rucheeche diidxaʼ maʼ huadxélacaʼ modo guiníʼnecaʼ binni ratiica nuucaʼ. Lii laaca zanda guʼnuʼ zacá. Guníʼ ique ca lugar ra jma riuuluʼ ne biyubi ximodo guiníʼneluʼ ca binni ni zándaca ruuyaluʼ guiráʼ dxi. Yené libru ne revista ni ganda iquiiñeluʼ ne ti Biblia huiiniʼ. Biiyaʼ xi caquiiñeʼ ca binni ca, ne biyubi modo gacaneluʼ laacabe. Cumu maca guníʼ íqueluʼ dede ante tuu nga ca binni ni zándaca guiníʼneluʼ la? zacá zahuinni maʼ nuuluʼ listu para gucheecheluʼ diidxaʼ (Fili. 1:12-14; 1 Ped. 3:15).
5. Xiñee naquiiñeʼ gucheechenu diidxaʼ ratiica nuunu ne cadi ora ganda si.
5 Ndiʼ nga ca razón ni jma risaca nápanu para gucheechenu diidxaʼ ratiica nuunu: nadxiinu Dios ne nadxiinu binni (Mat. 22:37-39). Ne cumu yanna nga jma caquiiñeʼ guireeche diidxaʼ la? nga runi galán guinínenu binni ratiica nuunu ne cadi ora ganda si. Riquiiñeʼ chuʼnu listu para gábinu binni ca diidxaʼ nacubi ne galán stiʼ Reinu ratiica nuunu laga náparunu tiempu (Rom. 10:13, 14; 2 Tim. 4:2).