Padxí guibiguétanu ra nuu ca binni ni riuulaʼdxiʼ guiziidiʼ
1. Xi naquiiñeʼ gúninu para gacanenu binni gaca discípulo.
1 Para ganda gacanenu binni gaca discípulo la? naquiiñeʼ guibiguétanu ra nuu cani gusihuinni dxandíʼ riuulaʼdxiʼ guiziidiʼ de gobiernu stiʼ Jiobá (Mat. 28:19, 20). Galán quixe íquenu guibiguétanu ra nuu binni ti hora zanda chuunu ne hora nuucabe, peru cadi naquiiñeʼ diʼ tiidiʼ stale tiempu. Xiñee yaʼ.
2, 3. Xiñee riquiiñeʼ gúninu stipa pur guibiguétanu nagueendaca ra nuu binni.
2 Xiñee naquiiñeʼ guibiguétaluʼ nagueendaca. Dxiiñaʼ ni cayúninu de gusíʼdinu binni de «stiidxa Dios» mayaca guiluxe ni, ne maʼ cadi candaa diʼ para guinitilú guiráʼ ca cosa malu nuu yanna riʼ (Mat. 24:14; 1 Ped. 4:7). Neca zacá, yanna riʼ nga tiempu para guilá cani riuulaʼdxiʼ guiziidiʼ. Nga runi, yanna nga jma caquiiñeʼ gucheechenu diidxaʼ, ne laaca rúninu zacá ora ribiguétanu nagueendaca ra nuu ca binni ni riuulaʼdxiʼ guiziidiʼ jma (2 Cor. 6:1, 2; 2 Tim. 4:2).
3 Nagueendaca ruyubi Binidxabaʼ modo cuee de ndaaniʼ ladxidóʼ binni ni gusíʼdinu laacaʼ de Reinu stiʼ Dios (Mar. 4:14, 15). Laaca qué riaadxaʼ nga tu guni burla laacabe, casi ca binnilídxicabe, cani runinécabe dxiiñaʼ, runi ca binni ca zacá para cueecaʼ gana laacabe ti maʼ cadi gúʼndacabe Biblia. Pa guibiguétanu nagueendaca la? qué zaca nagana para laanu guinínenu laabe de ni guninu primé biaje que, ne zacá zanda gacanenu laabe guiziidibe jma de lu Biblia, ante cuee binni gana laabe.
4. Xi naquiiñeʼ gúninu ora guinínenu binni primé biaje para ganda guibiguétanu ra nuu.
4 Gudixhe ti dxi ne ti hora. Jma galán pa dede primé ca biaje guiníʼneluʼ binni quíxheluʼ padxí ne pora cá íqueluʼ guibiguétaluʼ, ne gunabadiidxaʼ laabe xiixa de lu Biblia ni guicábiluʼ dxi ca. Pa napa binni ca tiempu la? zanda gaʼbuʼ laabe pa zabiguétaluʼ sti dxi queca, o xhupa gubidxa despué. Pa guníʼneluʼ laabe ra ziluxe semana purtiʼ qué riuube xcaadxi dxi la? zándaca zanabe chigannuʼ laabe ra guiluxe sti semana ca. Peru naquiiñeʼ gucaa chaahuiluʼ tu lá binni ca ne paneza ralidxi, purtiʼ pa guʼdxuʼ laabe zabiguétaluʼ la? naquiiñeʼ guʼnuʼ ni (Mat. 5:37).
5. Xi zabeendunu pa guibiguétanu nagueendaca ra nuu binni ni riuulaʼdxiʼ guiziidiʼ.
5 Nápanu stale razón para guibiguétanu nagueendaca ra nuu ca binni ni riuulaʼdxiʼ guiziidiʼ. Tobi de laacani nga purtiʼ «ma huaxiéʼ dxi riaadxa», nga runi naquiiñeʼ quíxhenu ti dxi ne ti hora para cadi guiaandaʼ laanu naquiiñeʼ guibiguétanu nagueendaca (1 Cor. 7:29). Pa guibiguétanu nagueendaca ra nuu ca binni ni riuulaʼdxiʼ guiziidiʼ de stiidxaʼ Reinu la? jma stale tu zanda gacanenu gaca discípulo.