«Cadi guidxíbiluʼ»
1. Cásica Jeremías, xi zándaca gucueeza laanu de gucheechenu diidxaʼ.
1 Dxi gucuaa Jeremías dxiiñaʼ de gaca ti ni riguixhená, guníʼ ique nabé naroʼbaʼ dxiiñaʼ que para laa. Peru Jiobá gudxi laabe ne diidxaʼ nadóʼ: «Cadi guidxíbiluʼ», ne zaqué gudixhedxí ladxidoʼbe. Ne bidii laabe stipa ni caquiiñebe para ganda gúnibe dxiiñaʼ ni gucuaabe que (Jer. 1:6-10). Cásica Jeremías, laanu laaca ziuu ora zaca nagana para laanu gucheechenu diidxaʼ pur nácanu binni natuí o runi sentirnu qué zanda guinínenu binni. Ne pa zacá laanu, ziuu ora zadxíbinu purtiʼ qué gánnanu ximodo guicaa binni cani gábinu laa. Xi zacané laanu para cadi guidxíbinu yaʼ. Xi guiráʼ zabeendunu pa gusaana de guidxíbinu.
2. Xiñee qué zadxíbinu guinínenu binni pa gúʼndanu dede ante.
2 Gúʼndanu dede ante. Ora gúʼndanu dede ante, zacaneni laanu para cadi guidxíbinu. Pa dede ante guiníʼ íquenu xi zándaca gabi binni laanu para guchuuguʼ lu stiidxanu la? zacané nga laanu gánnanu xi guicábinu laacabe (Pro. 15:28). Galán pa iquiiñeluʼ gueelaʼ runi adorarluʼ Dios ne binnilídxiluʼ para guni ensayartu ximodo nicábitu xiixa ni guinabadiidxacabe laatu ra scuela ne ora maʼ canagucheechetu diidxaʼ (1 Ped. 3:15).
3. Xiñee caquiiñeʼ guni crenu zanda gacané Jiobá laanu ti cadi guidxíbinu.
3 Guni crenu zanda gacané Jiobá laanu. Ti cosa ni zacané laanu para cadi guidxíbinu nga guni crenu zanda gacané Jiobá laanu, purtiʼ laa maʼ guníʼ zúnini (Isa. 41:10-13). Ñee cadi laabe nga jma zanda gacanebe laanu la? Ne Jesús cayabi laanu neca guizaaca xiixa ni cadi cabézanu, zanda gacané espíritu santu laanu para guinínenu binni de Dios (Mar. 13:11). Nga runi, cadi naquiiñeʼ gusaana de guinábanu Jiobá gudii laanu espíritu santu (Luc. 11:13).
4. Xi guiráʼ zabeendunu pa qué gusaana de gucheechenu diidxaʼ neca guidxaagalunu guendanagana.
4 Xi guiráʼ zabeendunu. Pa qué gusaana de gucheechenu diidxaʼ neca guidxaagalunu guendanagana la? Zácanu binni nadxibalú ne zanínenu tutiica binni de stiidxaʼ Dios. Ne nga nga ca guenda ni rusihuinni ca binni ni napa espíritu santu (Hech. 4:31). Laaca zacané ni laanu ganda gudxíʼlunu ca guendanagana ni gueeda despué. Zacané Jiobá laanu para gusaana de guidxíbinu, zaguidxi fe stinu ne jmaruʼ si zuni crenu zanda gacané Jiobá laanu (Isa. 33:2). Ne zadxá tipa ladxidoʼno gánnanu cayúninu ni riuulaʼdxiʼ Bixhózenu ni nuu guibáʼ (1 Ped. 4:13, 14). Nga runi, cadi guidxíbinu ora guinínenu tutiica binni de stiidxaʼ Reinu, purtiʼ nánnanu qué zusaana Jiobá de gacané laanu.