Ximodo zanda gacaneluʼ xheelaʼ ti xpinni Cristu ni cadi naca Testigu
1. Xiñee zanda guininu cadi xpinni Cristu si ni napa xheelaʼ ni cadi Testigu ca nga racalaʼdxiʼ gacané laabe.
1 Panda xpinni Cristu ni nuu lade ca binni ridagulisaa ra rieluʼ cadi Testigu xheelacaʼ. Zándaca ñuuláʼdxicabe nidxiña dxi ñuni adorar xheelacabe Dios cásica cayúnicabe ni. Peru cadi laasicabe nga ñuuláʼdxicabe ñácani zacá. Guiráʼ ca binni ridagulisaa laaca ñuuláʼdxicaʼ ñácacabe Testigu, zacá rusihuínnicaʼ riníʼ íquecaʼ casi riníʼ ique Dios, purtiʼ laa «racalaʼdxi ulá irá binni, ne ganna ca ni dxandíʼ» (1 Tim. 2:4). Ximodo zanda gacanenu xheelaʼ ca xpinni Cristu ni cadi naca Testigu yaʼ.
2. Xi zabeendunu pa guiénenu binni.
2 Primé la? caquiiñeʼ gúʼyanu ca cosa ca cásica modo ruuyaʼ binni ni cadi Testigu ca ni. Stale de ca binni riʼ nadxiicaʼ familia sticaʼ ne rúnicaʼ stipa pur gudiicaʼ ni caquiiñeʼ xheelacaʼ ne gusiniisicaʼ xiiñicaʼ jneza, xisi la? gadxé ni runi crécabe de ni runi crenu. Ne zándaca huaxiéʼ nga ni nánnacabe de ca Testigu, nuu biaje ni nannasícabe nga ni huayabi ca xhamígucabe laacabe ne stale biaje riniʼcaʼ sin gánnacaʼ pa dxandíʼ ni. Nuu tu laa qué riuulaʼdxiʼ guʼyaʼ xheelaʼ iquiiñeʼ tiempu stiʼ para «religión» ra rié, lugar de niquiiñeʼ tiempu ca para ñuuné familia stiʼ. Pa gúninu stipa pur guiénenu modo riníʼ íquebe la? zacané nga laanu para gácanu nachaʼhuiʼ, gápanu respetu laabe ne laaca zacaneni laanu para cadi guidxíbinu ora guinínenu laabe (Pro. 16:20-23).
3. Ximodo jma jneza gacanenu xheelaʼ tuuxa xpinni Cristu ni cadi naca Testigu.
3 Gusihuínninu dxandíʼ rizaaláʼdxinu laabe. Nuu biaje ni jma racané binni ni cadi Testigu ca chuulaʼdxiʼ guiziidiʼ de Dios nga gúninu xiixa cosa pur laabe ne cadi pur ni güínenu laabe de lu Biblia (1 Ped. 3:1, 2). Ni jma risaca nga gusihuínninu dxandíʼ rizaaláʼdxinu laabe. Ca gunaa ni naca xpinni Cristu zanda gacanecaʼ ca gunaa ni cadi naca Testigu, ne ca hombre ni naca xpinni Cristu zanda gacanecaʼ xheelaʼ ca gunaa ni naca Testigu. Ximodo zanda gúnicabe ni yaʼ.
4. Ximodo zanda gusihuínninu dxandíʼ rizaaláʼdxinu binni.
4 Pa caʼruʼ gunibiaʼluʼ xheelaʼ xpinni Cristu ca la? primeru gudxi xpinni Cristu ca xi cá íqueluʼ gúniluʼ. Pa primé biaje guiníʼneluʼ laabe gusihuínnibe qué riuuláʼdxibe gucaadiágabe la? cadi guireeluʼ gana. Pa gusihuínniluʼ dxandíʼ rizaaláʼdxiluʼ binni ni cadi naca Testigu ca zándaca gucaa nga laabe guchaabe modo riníʼ íquebe de ca testigu stiʼ Jiobá (Rom. 12:20). Nuu tiru, ca xpinni Cristu ni maʼ xadxí de nuu ndaaniʼ xquidxi Dios, runi invitárcabe binni ni cadi naca Testigu ca né familia stiʼ ti guendaroxhi para gunibiáʼ chaahuicabe ne zacá gudii binni ca cuenta cadi dxandíʼ guiráʼ ni huayunadiaga de ca Testigu. Ca xpinni Cristu ca riniʼcaʼ de xiixa ni riuulaʼdxiʼ binni ca gucaadiaga lugar de guyúbicaʼ modo cuʼcaʼ xiixa tema de lu Biblia ra cayuíʼcabe diidxaʼ. Ora maʼ napa ratu de cayuiʼné xpinni Cristu ca laabe diidxaʼ la? maʼ zanda guiniʼné laabe de xiixa tema de lu Biblia. Zándaca ra maʼ gunibiaʼbe chupa chonna xpinni Cristu la? maʼ ziuuláʼdxibe chebe tobi de ca guendaridagulisaa rápanu ne zacá zudiibe cuenta xi guiráʼ nga caziidiʼ xheelabe. Peru neca caʼruʼ guicá íquebe guiziidibe de Dios, zanda gábinu laabe galán guiráʼ ni rúnibe pur gacanebe xheelabe.
5. Xi zanda guni ca binnigola ca.
5 Ca binnigola ca nga cani jma naquiiñeʼ guyúbicaʼ modo gacanecaʼ xheelaʼ ti xpinni Cristu ni cadi naca Testigu ne naquiiñeʼ chuʼcaʼ listu para guiníʼnecaʼ laabe de Dios ora ganda gúnicaʼ ni. Tuuxa ni gusihuinni huaxiéʼ riuulaʼdxiʼ gucaadiaga stiidxaʼ Dios la? zándaca zaná cuʼnu gana laa né Stiidxaʼ Dios ora gueeda gapa xiixa guendahuará malu o nexheʼ ra hospital. Pa ndaaniʼ familia stiʼ ti xpinni Cristu ni napa xheelaʼ ni cadi naca Testigu cadiʼdiʼ lu xiixa guendanagana, casi gueeda gati ti binnilidxi, ca binnigola ca zanda guni invitárcabe binni ni cadi naca Testigu ca para gucaadiaga cani chiguiníʼcabe para quixhedxícabe ladxidóʼ ca binnilidxi.
6. Xi razón nápanu para gacanenu xheelaʼ ca xpinni Cristu ni cadi naca Testigu.
6 ¡Bixuiʼlú pabiáʼ nayecheʼ ziuu ti xpinni Cristu pa chuʼ dxi chuulaʼdxiʼ xheelaʼ guiziidiʼ de Dios! Jiobá, ca ángel ne guiráʼ ca binni ridagulisaa ca laaca ziuucaʼ nayecheʼ (Luc. 15:7, 10). Peru pa binni ca qué naʼ guiziidiʼ de Dios la? neca zacá zanda chuʼnu nayecheʼ ra gánnanu rusisaca Jiobá stipa ni rúninu pur gacanenu binni ca, purtiʼ laabe «cabeza be inaba irá binni perdón laabe, purti qué racalaʼdxi be initilú nin tobi» (2 Ped. 3:9).
[Ni caníʼ yaza 6]
Nuu biaje ni jma racané binni ni cadi Testigu ca chuulaʼdxiʼ guiziidiʼ de Dios nga gúninu xiixa cosa pur laabe ne cadi pur ni güínenu laabe de lu Biblia