Ndaa ra rinabadiidxaʼ
◼ Xi conseju stiʼ Biblia zanda gacané laanu gánnanu ximodo iquiiñenu celular ra ridagulisaanu ne ora maʼ cucheechenu diidxaʼ.
«Para guiráʼ cosa nuu tiempu.» (Ecl. 3:1.) Ca teléfono celular ca racanécani laanu guséʼndanu xiixa mensaje o guinínenu tuuxa binni ora tiisi. Peru nuu tiru cadi naquiiñeʼ gudiʼnu lugar guchiiñaʼ cani laanu. Casi ora maʼ dagulisaanu purtiʼ racá runi adorarnu Jiobá, rizíʼdinu de laabe ne rigúʼsaanu gana laanu (Deut. 31:12; Sal. 22:22; Rom. 1:11, 12). Ñee zanda gusuinu teléfono stinu ora maʼ cayaca guendaridagulisaa ne cuézanu dede ora maʼ bireʼnu ra Yoo stiʼ Reinu para guidúʼyanu xi mensaje nápanu la? Pa caquiiñepeʼ guiniʼné tuuxa laanu, ne pur nga qué zanda gusuinu ni la? naquiiñeʼ guyúbinu modo para cadi guchiiñaʼ ni tuuxa.
Naquiiñeʼ gúninu «irá nga tílasi guni cre binni stiidxa Cristu» (1 Cor. 9:23). Nuu tiru zanda iquiiñenu celular ora maʼ cucheechenu diidxaʼ. Casi ti xpinni Cristu ni gulee grupu zanda iquiiñeʼ celular stiʼ para cuidxi ca xcompañeru ni cucheeche diidxaʼ sti lugar. Ne zándaca gacalaʼdxiʼ ti ni rucheeche diidxaʼ guiniʼné tuuxa binni ni ruundané Biblia dede ante o ca binni ni biaanané chiganna sti biaje, ne jmaruʼ si pa zitu ra nabézacabe. Peru naquiiñeʼ chuʼnu cuidadu ti cadi guchiiñaʼ teléfono stinu laanu ora maʼ caninenu binni de stiidxaʼ Dios (2 Cor. 6:3). Ne pa cabézanu xcaadxi xpinni Cristu ni cucheeche diidxaʼ la? cadi galán diʼ cuídxinu tuuxa xhamígunu pur teléfono o guséʼndanu xiixa mensaje ra nuu. Jma galán gucáʼ íquenu dxiiñaʼ cayúninu ca ne guidúʼyanu pa cadi caquiiñeʼ ca xcompañérunu xiixa.
Naquiiñeʼ gápanu respetu xcaadxi (1 Cor. 10:24; Filip. 2:4). Qué chuʼ dxi guiníʼ íquenu cadi caquiiñepeʼ chindanu tempranu ra ridagulisaanu para chigucheechenu diidxaʼ purtiʼ zanda guinínenu tuuxa pur teléfono o guséʼndanu ti mensaje ra nuu para guinabadiidxanu laa paraa cucheechecaʼ diidxaʼ. Ni rizaaca ora chindanu maʼ huadxí nga ribiguetaʼ riguíxhecabe modo gucheeche grupu ca diidxaʼ sti biaje. Dxandíʼ, nuu tiru rizaaca xiixa ni cadi cabézanu ne pur laani maʼ qué zanda chindanu tempranu. Peru pa gúninu stipa pur chindanu tempranu la? zusihuínninu zinándanu ni naguixhe xquidxi Dios gaca, ne laaca zusihuínninu runi respetarnu xpinni Cristu ni cabee grupu ca ne xcaadxi ni chigucheeche diidxaʼ.