Guyúbinu modo chuulaʼdxiʼ binni gucaadiaga laanu
1. Xiñee risaca guiníʼ ique chaahuinu xi gábinu binni ora guzulú guinínenu laa.
1 Ora guni invitar tuuxa laanu ti guendaró, cadi dxandíʼ stale biaje primeru rudiibe laanu xiixa ni guxheleʼ ladxidoʼno la? Ngaca nga laanu, para ganda chuulaʼdxiʼ binni gucaadiaga ni chigusíʼdinu laa la? naquiiñeʼ cueenu tiempu para guiníʼ ique chaahuinu xi zanda gábinu laabe cásipeʼ guzulú guinínenu laabe (Prov. 15:28). Cadi ni guinísinu o pabiáʼ tiempu guininu nga ni gusihuinni pa galán modo bizulunu. Yanna, xii nga ni naquiiñeʼ gánnanu hora maʼ cuyúbinu xi gábinu binni yaʼ.
2. Xi zanda gúninu dede ante ti chuulaʼdxiʼ binni gucaadiaga laanu.
2 Xi riuulaʼdxiʼ binni gucaadiaga. Zándaca zuchuuguʼ binni lu stiidxanu pa qué chuulaʼdxiʼ ni guininu cásipeʼ guzulunu. Nga runi, galán guiníʼ íquenu xi riuulaʼdxiʼ ca binni ni nuu neza ra rucheechenu diidxaʼ. Ñee cabézacabe chuʼ ti gobiernu ni gacané laacabe la? Ñee racaláʼdxicabe guibaninécabe binnilídxicabe nayecheʼ la? Ñee cabézacabe guidxiña dxi maʼ qué chuʼ guerra la? Stale binni nabé riuulaʼdxiʼ guiníʼ xi runi sentir, nga runi, galán guiníʼ íquenu xi zanda guinabadiidxanu laacabe. Galán pa guyúbinu ximodo iquiiñenu cani reeda lu Xhiiñaʼ Reinu ni Rúninu. Ñee zanda guni ensayartu cani dxi runi adorartu Dios né binnilídxitu la?
3. Ximodo zanda guinínenu binni ora maʼ runibiaʼnu laacaʼ.
3 Gunibiaʼnu binni ne gánnanu xi runi cré. Zándaca nuu lugar jma riuulaʼdxiʼ binni guininu xi ziuunu nagueendaca. Peru xcaadxi lugar, ribeza binni guinabadiidxacabe laa ximodo nuu ne güinécabe laa diidxaʼ ti ratu, ante gábicabe laa xi zécabe. Ca lugar ra runi respetar binni Biblia la? zanda guzéʼtenu de laani cásipeʼ guzulunu (Hech. 2:14-17). Peru ca lugar ra huaxiéʼ runi cré binni Cristu o ra qué lica runi crécabe laabe la? zándaca jma galán guzéʼtenu xi rusiidiʼ Biblia sti biaje chigánnanu laacabe (Hech. 17:22-31).
4. Xi cadi naquiiñeʼ guiaandaʼ laanu ora guzulú guinínenu binni.
4 Ca diidxaʼ guzulunenu. Naquiiñeʼ guiníʼ ique chaahuinu gunáʼ nga ca diidxaʼ ni guzulunenu. Naquiiñeʼ guininu xiixa ni guiene binni ne cadi gutálenu diidxaʼ. Peru cadi guidúʼyasinu xi guininu, sínuque ximodo guininu ni. Bisihuinni nuuluʼ nayecheʼ ne dxandíʼ ni caniʼluʼ. Bietenalaʼdxiʼ jma zaná binni gucaadiaga lii pa dede cuxidxi huiiniluʼ ora maʼ caniʼluʼ. Pa chinándanu ca conseju riʼ la? zacanécani laanu gánnanu xi guininu ti ganda chuulaʼdxiʼ binni guiráʼ ni nuu lu «mexa sti [Jiobá]» (1 Cor. 10:21).