Joven, cadi gusaana de guni progresarluʼ despué de chuʼnísaluʼ

1. ¿Xi maʼ biʼniʼ stale joven?

GUIRÁʼ iza riuunisa stale joven. ¿Ñee lii nga tobi de laacabe la? Pa zacá ni, guizáʼ riecheʼ ca hermanu ne hermana, ni naca casi familia stiluʼ, ne laaca guizáʼ riecheʼ Jehová (Prov. 27:11). Guníʼ ique guiráʼ ni maʼ bíʼniluʼ, zándaca maʼ xadxí de cayuni estudiarluʼ Biblia ne maʼ bidiiluʼ cuenta laani nga Stiidxaʼ Dios. Peru ni jma risaca nga, maʼ runibiaʼluʼ ne nadxiiluʼ binni ni guníʼ xi guicá lu Biblia. Cumu guizáʼ nadxiiluʼ Jehová la? gudixhe íqueluʼ gaca dedicarluʼ ne chuʼnísaluʼ. ¡Ne galán peʼ bíʼniluʼ ni!

2. ¿Xi zadúʼyanu lu artículo riʼ?

² Zándaca ante chuʼnísaluʼ gudíʼdiluʼ lu xiixa guendanagana ni bicaa lii gusihuínniluʼ pa nápaluʼ fe. Peru ra tidiʼ tiempu zadxaagaluluʼ xcaadxi guendanagana. Zuyubi Binidxabaʼ modo gusaana de gannaxhiiluʼ Jehová ne guixéleluʼ de laa (Efes. 4:14). Cadi gudiiluʼ lugar guireenebe xtémabe. Cadi gusaana de guni progresarluʼ, ndiʼ riníʼ naquiiñeʼ gácaluʼ ti binni ni maʼ huaniisi lu Stiidxaʼ Dios (Heb. 6:1). Lu artículo riʼ zadúʼyanu ximodo zanda gúninu ni.

NI ZANDA GÚNILUʼ PARA GUNI PROGRESARLUʼ

3. ¿Xi naquiiñeʼ guni guiráʼ xpinni Cristu despué de chuʼnísacaʼ?

³ Ora riuunisa tuuxa, naquiiñeʼ chinanda conseju ni bidii apóstol Pablo ca xpinni Cristu de Éfeso. Gúdxibe laacaʼ gácacaʼ «casi ti binni huaniisi» (Efes. 4:13). Casi ora ñábibe laacaʼ cadi gusaana de guni progresarcaʼ. Bichaaga Pablo progresu stinu né modo riniisi ti baʼduhuiiniʼ. Riecheʼ binni ora rapa ti baʼduhuiiniʼ, peru napa xidé guiniisibe. Ra tidiʼ tiempu napa xidé gusaana de gúnibe ca cosa «ni runi ti xcuidi» (1 Cor. 13:11). Nga ca nga rizaaca ca xpinni Cristu, neca maʼ guyuʼnísanu cadi naquiiñeʼ gusaana de guni progresarnu. Guzéʼtenu caadxi cosa ni zacané lii gúniluʼ ni.

4. ¿Xi cualidad zacané lii guni progresarluʼ, ne xiñee? (Filipenses 1:9).

⁴ Bisiroobaʼ guendarannaxhii ni nápaluʼ Jehová. Nánnadu guizáʼ nadxiiluʼ Jehová. Peru zándaruʼ gannaxhiiluʼ laabe jma. ¿Ximodo yaʼ? Apóstol Pablo bizeeteʼ ti modo zanda gúniluʼ ni, zeedani lu Filipenses 1:9 (biindaʼ ni). Gunabaʼ Pablo lu oración stiʼ ra tidiʼ tiempu jma gannaxhii ca hermanu de Filipos Jehová. Ndiʼ riníʼ laaca zanda guiroobaʼ guendarannaxhii ni nápanu Dios. Peru para ganda gúninu ni caquiiñeʼ guizíʼdinu jma de Jehová ne guiníʼ íquenu de laa. Ndiʼ riníʼ ra jma gunibiaʼnu Jehová jma zannaxhiinu laa, jma ziuuláʼdxinu modo runi ca cosa ne jma ziuuláʼdxinu modo naca. Laaca racaláʼdxinu gusiéchenu laabe ne qué racaláʼdxinu uguʼnu laabe triste. Rúninu stipa gánnanu xi racaláʼdxibe gúninu ne rúninu ni.

5, 6. ¿Xi sti cosa zacané laanu jma gannaxhiinu Jehová?

⁵ Sti cosa ni zacané laanu gannaxhiinu Jehová nga gunibiaʼnu Xiiñibe, purtiʼ laa rusihuinni ximodo peʼ naca Bixhoze (Heb. 1:3). Ti cosa ni zacané laanu gúninu ni nga ra guni estudiarnu guidapaʼ Evangeliu. ¿Ñee nápaluʼ costumbre gúʼndaluʼ Biblia guiráʼ dxi la? Pa qué ruʼnuʼ ni, ¿ñee zanda guzululuʼ gúniluʼ ni yannadxí ca la? Ora gúʼndaluʼ guiráʼ ni biʼniʼ Jesús ne ni guníʼ, biiyaʼ xi guiráʼ cualidad bisihuínnibe. Cumu nacháʼhuibe la? bidxiña guiráʼ binni laabe, dede ca xcuidihuiiniʼ guluube laacaʼ ndaaniʼ nabe (Mar. 10:13-16). Qué nidxibi ca discípulo stibe ora nuucaʼ ra nuube, ngue runi gúdxicaʼ laabe guiráʼ ni riníʼ íquecaʼ (Mat. 16:22). Guca Jesús zaqué purtiʼ zaqué nga Bixhózebe ni nuu guibáʼ. Nga runi zanda guni orarnu Jehová ne gábinu laa guiráʼ ni nuu ndaaniʼ ladxidoʼno. Ne nánnanu qué zadxiichinebe laanu. Nadxiibe laanu ne rizaaláʼdxibe laanu (1 Ped. 5:7).

⁶ Biá Jesús binni. Sicaríʼ guníʼ apóstol Mateo: «Ora ruuyabe guiráʼ ca binni que, guizáʼ riabe laacaʼ, purtiʼ guizáʼ maʼ gucanacaʼ ne nuucaʼ stúbicaʼ casi dendxuʼ ni qué gapa pastor» (Mat. 9:36). ¿Ximodo ruuyaʼ Jehová binni yaʼ? Sicaríʼ guníʼ Jesús de Bixhoze: «Qué racalaʼdxiʼ guiniti nin tobi de ca ni nahuiiniʼ riʼ» (Mat. 18:14). ¡Guizáʼ riéchenu gánnanu nabé nadxii Jehová laanu! Pa jma gunibiaʼnu Jesús, jma zannaxhiinu Jehová.

7. ¿Xiñee nabé galán gaca xhamíguluʼ ca hermanu ni naca espiritual?

⁷ Nuu sti cosa ni zanda gúniluʼ para jma gannaxhiiluʼ Jehová ne cadi gusaana de guni progresarluʼ. ¿Xii ni yaʼ? Gaca xhamíguluʼ ca hermanu ne ca hermana espiritual ni nuu ndaaniʼ congregación stiluʼ. Biiyaʼ pabiáʼ nayecheʼ ca hermanu ne ca hermana riʼ. Qué raca arrepentírcabe pur gudixhe íquecabe gúnicabe ni ná Jehová. Gunabaʼ laacabe gábicabe lii xiixa experiencia ni nápacabe. Ne ora chiguicaaluʼ xiixa decisión risaca, gunabaʼ laacabe gudiicabe lii xiixa conseju. Biblia ná «ora nuu stale tu gudii conseju» riree ca cosa ca jneza (Prov. 11:14).

8. ¿Xi zacané lii pa gápaluʼ duda de ni rusiidiʼ Biblia?

⁸ Biyubi gánnaluʼ respuesta stiʼ ca duda ni nápaluʼ. Casi bidúʼyanu lu párrafo 2, zuyubi Binidxabaʼ cadi guni progresarluʼ. Ne tobi de cosa ni riquiiñebe nga gápaluʼ duda. Racaláʼdxibe gusaana de guni creluʼ ni rusiidiʼ Biblia. Zándaca zunadiágaluʼ guiníʼ binni de evolución, ti teoría ni runi biidiʼ lá Jehová. Zándaca qué niníʼ íqueluʼ ni dxiqué, peru yanna ra maʼ nácaluʼ joven, zándaca gunadiágaluʼ gusiidiʼ ca maestru stiluʼ ni lii. Ruluíʼ biaʼsi ni caníʼcabe, peru cadi guiaandaʼ lii zándaca caʼruʼ guni estudiar chaahuicabe ca cosa ni rusihuinni dxandíʼ nuu tu bizáʼ guiráʼ cosa. Bietenalaʼdxiʼ ni ná Proverbios 18:17: «Ni guiníʼ primé nezalú justicia xi bizaaca ruluíʼ napa razón, peru ora guiníʼ sti binni ne guinabadiidxaʼ laabe rihuinni xi peʼ nga bizaaca». ¿Xi rizíʼdinu de textu riʼ yaʼ? Rizíʼdinu cadi naquiiñeʼ guni crenu guiráʼ ni gábicabe laanu ra scuela, sínuque naquiiñeʼ guni estudiarluʼ guiráʼ ni zeeda lu Stiidxaʼ Dios. Biyubi información lu ca publicación stinu. Guniʼné ca hermanu ni biʼniʼ cré evolución dxiqué ne gunabadiidxaʼ laacaʼ xi gucané laacaʼ guni crecaʼ dxandíʼ guyuu tu bizáʼ guiráʼ cosa ne guizáʼ nadxii laanu.b Pa guinínenu laacabe zacané ni lii guiníʼ íqueluʼ dxandíʼ ca prueba ni rusihuinni nuu tu bizáʼ laanu.

9. ¿Xi rusiidiʼ experiencia stiʼ Melissa lii?

⁹ Ni gucané ti hermana láʼ Melissa nga biʼniʼ estudiar de creación.c Laa guníʼ: «Ora rusiidiʼ ca maestru de evolución ruluíʼ dxandíʼ ni. Dxiqué guizáʼ bidxibeʼ guyubeʼ respuesta stiʼ ca duda stinneʼ. Bidxibeʼ pa ra cayuneʼ investigar que guirá fe stinneʼ. Peru laaca guníʼ iqueʼ qué racalaʼdxiʼ Jehová gúninu ni ná pa nápanu duda ne qué guyúbinu gánnanu respuesta stiʼ ca ni. Biindaʼ libru ¿Existe un Creador que se interese por nosotros? ne ca folletu ¿Es la vida obra de un Creador? ne El origen de la vida. Cinco cuestiones dignas de análisis. Ra bineʼ estudiar ca publicación riʼ guizáʼ gucané ni naa. Racaʼ arrepentir xiñee qué ñuneʼ ni dede ante».

10, 11. ¿Xi zacané lii gucaanaluʼ ca deseu malu gápaluʼ? (1 Tesalonicenses 4:3, 4).

¹⁰ Bidxiilú ca deseu malu ni nápaluʼ. Ora joven tuuxa, zándaca jma nadipaʼ ca deseu sexual ni napa, ne zándaca chuʼ tu gucaa laacaʼ gápacaʼ relación sexual. Racalaʼdxiʼ Binidxabaʼ gúniluʼ ni ná ca deseu malu stiluʼ. ¿Xi zacané lii cadi guiábaluʼ lu trampa riʼ yaʼ? (Biindaʼ 1 Tesalonicenses 4:3, 4). Ora guni orarluʼ Jehová, gudxi laabe ximodo cayuni sentirluʼ ne gunabaʼ laabe gudiibe lii stipa (Mat. 6:13). Cadi guiaandaʼ lii, zacané Jehová lii ne qué zuni juzgarbe lii (Sal. 103:13, 14). Laaca zanda gacané Biblia lii. Melissa, hermana ni bizéʼtenu lu párrafo ni gudiʼdiʼ que, gupa xidé bidxiilú ca cosa malu ni riníʼ ique. Laa guníʼ: «Qué nireeʼ gana purtiʼ guiráʼ dxi biindaʼ Biblia. Ngue bisietenalaʼdxiʼ naa maʼ stiʼ Jehová xquendanabaneʼ ne qué racaladxeʼ guixélebe de naa» (Sal. 119:9).

¹¹ Cadi gudxiiluluʼ stúbiluʼ ca guendanagana ni gápaluʼ. Gudxi bixhózeluʼ o jñaaluʼ xi cazaacaluʼ. Zándaca gaca nagana para lii guiniʼluʼ xi cazaacaluʼ, peru nabé risaca gúniluʼ ni. Melissa guníʼ: «Gunabaʼ Jehová gacané naa gacaʼ nadxibalú ne despué gudxeʼ bixhozeʼ xi cazaacaʼ. Guizáʼ gutadxí ladxiduáʼ. Nannaʼ riechené Jehová naa».

12. ¿Xi zacané lii guicaaluʼ decisión jneza?

¹² Yenanda ca conseju ni zeeda lu Biblia. Ra maʼ ziniisiluʼ, maʼ lii nga naquiiñeʼ guicaaluʼ ca decisión stiluʼ. Peru cadi naquiiñeʼ guiaandaʼ lii, huaxieʼruʼ experiencia nápaluʼ. ¿Xi zacané lii para cadi gúniluʼ xiixa ni guxheleʼ lii de Jehová yaʼ? (Prov. 22:3). Ti hermana láʼ Kari guníʼ xi gucané laa para guicaa decisión jneza. Bidiibe cuenta cadi caquiiñeʼ ca xpinni Cristu ti ley ni zeeda lu Biblia para cada cosa ni chigúnicaʼ. Kari guníʼ: «Lugar de chinandaʼ xiixa ley, biyubeʼ gannaʼ xi riníʼ ique Jehová primeru». Ora gúʼndaluʼ Biblia, guníʼ ique ndiʼ: «¿Xi rusiidiʼ relatu riʼ naa de modo riníʼ ique Jehová? ¿Ñee nuu xiixa principiu raríʼ ni zacané naa gannaʼ xii nga ni jneza la? Pa guneʼ ni ná principiu ca, ¿xi zabeenduáʼ?» (Sal. 19:7; Is. 48:17, 18). Pa gúʼndaluʼ Biblia ne guiníʼ íqueluʼ ca principiu zeeda luni qué zaca nagana para lii guicaaluʼ decisión ni gusiecheʼ Jehová. Ra jma guiziidiluʼ ximodo riníʼ ique Jehová, zudiiluʼ cuenta cadi caquiiñediouʼ ti ley para cada cosa ni chigúniluʼ. Zacá zahuinni cayuni progresarluʼ ndaaniʼ congregación.

13. ¿Xiñee zanda gacané ca xhamíguluʼ lii? (Proverbios 13:20).

¹³ Biyubi gaca xhamíguluʼ ca binni ni nadxii Jehová. Casi bidúʼyanu lu párrafo 7 que, zanda gacané ca xhamíguluʼ lii para guni progresarluʼ (biindaʼ Proverbios 13:20). Biiyaʼ xi bizaaca ti hermana láʼ Sara. Cayúnibe ni ná Jehová, peru maʼ cadi nayecheʼ diʼ nuube. Peru bizaaca xiixa ni gucané laabe. Sicaríʼ bisiene Sara ni: «Bidxelaʼ tu gacaʼ xhamiguáʼ ora jma peʼ caquiiñeʼ ni. Naa ne sti hermanahuiiniʼ raca preparardu juntu para revista Torre stiʼ ni rapa guiráʼ semana. Ne sti xhamigaʼ guluu gana naa para guneʼ comentar lu ca reunión. Pur gucané ca xhamiguáʼ naa, jma gudixheʼ iqueʼ guneʼ estudiar stubeʼ ne guneʼ orar. Chaahuiʼ chaahuiʼ biguetaʼ gucaʼ xhamiguáʼ Jehová sti biaje, ne guyuaaʼ nayecheʼ».

14. ¿Xi biʼniʼ Julien para gupa xhamigu ni gucané laa?

¹⁴ ¿Xi zanda gúniluʼ para guidxélaluʼ xhamíguluʼ ni gacané lii? Ti ancianu láʼ Julien guníʼ: «Dxi jma joven naa, bidxelaʼ lu predicación tu gacaʼ xhamiguáʼ. Runi predicárcabe né stale gana ne gucanécabe naa guuyaʼ zanda chuaaʼ nayecheʼ ora guneʼ predicar. Gudixheʼ iqueʼ ugaandaʼ meta guneʼ servir de tiempu completu. Cumu puru binni biaʼ naa si biyubeʼ gacaʼ xhamiguáʼ la? bidieeʼ cuenta zándaruʼ gacaʼ xhamiguáʼ binni ni gacané naa neca jma huaniisicaʼ que naa. Ne dxi yendayaʼ Betel, bidxelaʼ xcaadxi binni ni gacaʼ xhamiguáʼ. Gucanécabe naa cueʼ entretenimientu jneza, ne ngue gucané ni naa gacaʼ xhamíguaruaʼ Jehová».

15. ¿Xi gudxi Pablo Timoteo? (2 Timoteo 2:20-22).

¹⁵ Yanna, ¿pa gúʼyaluʼ nuu tuuxa ndaaniʼ congregación stiluʼ ni qué zacané lii guni progresarluʼ yaʼ? Gunna apóstol Pablo guyuu binni ni cadi naca espiritual ndaaniʼ ca congregación ni guyuu lu primé siglu. Ngue runi gúdxibe Timoteo guixeleʼ de ca binni riʼ (biindaʼ 2 Timoteo 2:20-22). Ni jma risaca nga gaca xhamígunu Bixhózenu ni nuu guibáʼ ne riné tiempu para ganda gúninu ni. Nga runi, cadi naquiiñeʼ gudiʼnu lugar chuʼ xiixa ni guxheleʼ laanu de laabe (Sal. 26:4).

PA QUÍXHELUʼ META ZACANÉ NI LII GUNI PROGRESARLUʼ

16. ¿Xi meta zanda quixhe íqueluʼ ugaandaluʼ?

¹⁶ Gudixhe meta ni dxandíʼ zacané lii. Ni guquidxi fe stiluʼ ne ni zacané lii gácaluʼ ti xpinni Cristu ni zuhuaa dxiichiʼ (Efes. 3:16). Ti meta ni zanda gápaluʼ nga cadi gusaana de gápaluʼ estudiu personal stiluʼ ne gúʼndaluʼ Biblia (Sal. 1:2, 3). O zándaca caquiiñeʼ guni orarluʼ jma ne gúniluʼ ni de guidubi ladxidoʼloʼ. Zándaca laaca caquiiñeʼ gápaluʼ jma cuidadu né entretenimientu stiluʼ ne iquiiñeluʼ tiempu stiluʼ jma jneza (Efes. 5:15, 16). Guizáʼ ziecheʼ Jehová ora guʼyaʼ cayúniluʼ stipa pur guni progresarluʼ jma.

17. ¿Xi zabeenduluʼ pa gacaneluʼ xcaadxi?

¹⁷ Ora racaneluʼ xcaadxi, runi progresarluʼ casi xpinni Cristu. Jesús guníʼ: «Jma nayecheʼ riuu binni ora rudii que ora ricaa» (Hech. 20:35). Pa iquiiñeluʼ tiempu stiluʼ ne stipa stilu para gacaneluʼ xcaadxi, zabeenduluʼ ni galán. ¿Ximodo zanda gacaneluʼ xcaadxi yaʼ? Zanda quíxheluʼ meta gacaneluʼ ca hermanu ni huará ne ca hermanu ni maʼ huaniisi de congregación stiluʼ ra gúniluʼ mandadu stícabe o gacaneluʼ laacabe iquiiñecabe ca dispositivu electrónicu stícabe. Pa nácaluʼ ti hermanu joven ni maʼ guyuunisa, gudixhe meta gácaluʼ ti siervu ministerial para gacaneluʼ ca hermanu stiluʼ (Filip. 2:4). Laaca zanda gusihuínniluʼ nadxiiluʼ ca binni ni qué runibiáʼ Jehová ra guiníʼneluʼ laacabe de ca noticia galán stiʼ Reinu (Mat. 9:36, 37). Ne pa ganda la? gudixhe ique guni servirluʼ lu xiixa asignación de tiempu completu.

18. Pa guni servirluʼ de tiempu completu, ¿ximodo zacané ni lii guni progresarluʼ?

¹⁸ Pa guzululuʼ lu serviciu de tiempu completu guizáʼ zacané ni lii guni progresarluʼ. Pa gácaluʼ precursor, zanda cheluʼ Escuela para Evangelizadores del Reino o Betel, o zanda gacaneluʼ lu construcción. Sicaríʼ guníʼ ti precursora joven ni láʼ Kaitlyn: «Ra bineʼ predicarniaʼ ca hermanu ne hermana ni napa experiencia gucané ni naa guneʼ progresar jma despué de guyuaanisaʼ. Gucané ejemplu stícabe naa para guneʼ estudiar chaahueʼ Biblia ne gusiideʼ jma jneza».

19. ¿Xi ndaayaʼ zacaaluʼ pa qué gusaana de guni progresarluʼ?

¹⁹ Pa qué gusaana de guni progresarluʼ, zudii Jehová stale ndaayaʼ lii. Qué zaquiiñeluʼ juventud stiluʼ para ugaandaluʼ xiixa meta ni qué risaca (1 Juan 2:17). Qué zacaaluʼ decisión ni zuniná lii. Zabániluʼ jma nayecheʼ ne zié ni lii galán lu xquendanabániluʼ (Prov. 16:3). Ejemplu stiluʼ zaguu ni gana ca joven ne ca hermanu ni maʼ huaniisi (1 Tim. 4:12). Ne ni jma risaca zuni sentirluʼ galán ne ziuuluʼ nayecheʼ purtiʼ nánnaluʼ cusiécheluʼ Jehová ne xhamíguluʼ laa (Prov. 23:15, 16).