Chinándanu ejemplu stiʼ Jesús ne guni predicarnu né stale gana

1. ¿Xiñee maʼ gadxé nga ca testigu stiʼ Jehová de xcaadxi binni ni ná naca xpinni Cristu?

LAANU, ca testigu stiʼ Jehová, maʼ gadxé laanu de ca binni ni ná naca xpinni Cristu purtiʼ rusihuínninu riuuláʼdxinu guni predicarnu (Tito 2:14). Neca zacá, zándaca nuu de laanu huayuni sentir huaxiéʼ riuulaʼdxiʼ guni predicar. Zándaca guizaacanu ni bizaaca ti ancianu ni guizáʼ runi xhiiñaʼ Jehová, laabe guniʼbe: «Nuu biaje qué gapaʼ gana chiguneʼ predicar».

2. ¿Xiñee nuu biaje raca nagana para laanu guni predicarnu né stale gana?

² Zándaca nuu sti cosa ni jma riuuláʼdxinu gúninu ndaaniʼ xquidxi Dios que guni predicarnu. ¿Xiñee yaʼ? Purtiʼ zándaca jma nagueenda ridúʼyanu dxiiñaʼ ni rúninu o runi sentirnu galán ora rucuinu Yoo stiʼ Reinu ne racanenu para gaca chaahuiʼ cani, ora racanenu lu labor de socorro o riguʼnu gana ca hermanu. Ne ora runinenu laacabe dxiiñaʼ laaca runi sentirnu nadxiicabe laanu ne ratadxí ladxidoʼno ne nánnanu rudiicabe xquixe peʼ pur dxiiñaʼ ni rúninu ne rusisácacabe ni. Ne zándaca maʼ zinenu stale iza de runi predicarnu ngueca territorio ne huaxiéʼ binni rucaadiaga laanu. O dede nuu de laacaʼ ridxiichicaʼ ora runi predicarnu laacaʼ. Ne laaca nánnanu ra jma maʼ gaxha nuu fin stiʼ guidxilayú riʼ, zándaca jma zucaalúcabe laanu (Mat. 10:22). Yanna, ¿xi zacané laanu cadi gusaana de guni predicarnu né stale gana yaʼ?

3. ¿Xi rusiidiʼ Lucas 13:​6-9 laanu de Jesús?

³ Ti cosa ni zacané laanu guni predicarnu né stale gana nga guidúʼndanu ejemplu stiʼ Jesús. Dxi guyuube lu guidxilayú, qué nireebe gana ne ra zidiʼdiʼ tiempu bíʼnibe jma lu xhiiñaʼ Jehová (biindaʼ Lucas 13:​6-9). Bichaaga Jesús laa casi ti hombre ni gupa ti yaga duʼgaʼ chonna iza, peru qué nudii yaga que cuananaxhi stiʼ. Laabe laaca chonna iza biʼniʼ predicarbe ca judíu, peru huaxiéʼ si de laaca gunacaʼ gácacaʼ discípulo stibe. Peru cásica qué niree hombre que gana ne guleza gudii yaga que cuananaxhi, Jesús laaca qué niree gana ne qué nusaana de ñuni predicar, sínuque bíʼnibe xhiiñaʼ Dios né stale gana para chindabe ndaaniʼ ladxidóʼ ca binni que.

4. ¿Xi tapa cosa zadúʼyanu lu artículo riʼ?

⁴ Lu artículo riʼ zadúʼyanu ximodo biʼniʼ predicar Jesús né stale gana jmaruʼ si lu xhoopaʼ beeu ante gatiʼ (biiyaʼ nota de estudiu «Después de estas cosas», stiʼ Lucas 10:1). Zadúʼyanu tapa modo gudíxhebe ti ejemplu galán para laanu: primé, gudixhe íquebe gúnibe ni ná Jehová, guiropa, binibiáʼ chaahuibe ni ná ca profecía que, guionna, gúpabe confianza zacané Jehová laabe ne guidapa, gúnnabe zabeendube ni galán ne gúpabe esperanza ziuu binni zucaadiaga laabe.

GUDIXHE ÍQUEBE GÚNIBE NI NÁ JEHOVÁ

5. ¿Ximodo bisihuinni Jesús ni jma risaca para laa nga guni ni ná Dios?

⁵ Biʼniʼ predicar Jesús «ca noticia galán stiʼ Reinu» né stale gana purtiʼ nánnabe ngue nga ni racalaʼdxiʼ Dios gúnibe (Luc. 4:43). Para laabe dxiiñaʼ que nga ni jma risaca gúnibe lu xquendanabánibe. Dede lu ca últimu beeu biʼniʼ predicarbe guyebe «ndaaniʼ guiráʼ ca guidxi ne ndaaniʼ ca guidxihuiiniʼ», canagusiidibe binni (Luc. 13:22). Ne laaca bisiidibe ca discípulo que guni predicarcaʼ cásica bíʼnibe ni (Luc. 10:1).

6. ¿Ximodo racané xcaadxi dxiiñaʼ ni raca ndaaniʼ xquidxi Jehová para ganda gaca predicar? (Laaca zanda gúʼyaluʼ ca imagen ca).

⁶ Ca dxi stinu riʼ racalaʼdxiʼ Jehová ne Jesús guni predicarnu ca noticia galán, dxiiñaʼ jma risaca bisaananécabe laanu (Mat. 24:14; 28:​19, 20). Guiráʼ xixé dxiiñaʼ ni gúninu para Jehová racaneni para gaca predicar. Guzéʼtenu chupa chonna ejemplu, rucuinu Yoo stiʼ Reinu para cheʼ ca binni ni runi predicarnu ne guni adorarcaʼ Jehová. Ne guiráʼ ca dxiiñaʼ ni raca Betel ne xcaadxi lugar racanécani para gaca predicar. Ne laaca racanenu lu labor de socorro para gapa ca hermanu ni iquiiñecaʼ ti guibiguetaʼ gúnicaʼ ca cosa ni ruchiña laacaʼ gaxha de Jehová casi guni predicarcaʼ. Cadi guiaandaʼ laanu dxiiñaʼ ni jma risaca ni racalaʼdxiʼ Jehová gúninu nga guni predicarnu. Zacá jma ziuuláʼdxinu guni predicarnu. Ti ancianu de guidxi Hungría láʼ János, guníʼ: «Qué riaandaʼ naa gástiruʼ sti dxiiñaʼ ni rúninu ndaaniʼ xquidxi Jehová ni zanda chuʼ lugar stiʼ dxiiñaʼ de guni predicarnu, laani nga dxiiñaʼ ni jma risaca nápanu».

7. ¿Xiñee racalaʼdxiʼ Jehová cadi gusaana de guni predicarnu? (1 Timoteo 2:​3, 4).

⁷ Ti cosa ni zacané laanu guni predicarnu né stale gana nga guidúʼyanu ca binni ca modo ruuyaʼ Jehová laacabe. Racalaʼdxiʼ Jehová pa ñanda guiráʼ binni ñunadiaga ne niziidiʼ ca noticia galán (biindaʼ 1 Timoteo 2:​3, 4). Ra gunadiaga binni ca noticia galán riʼ zanda gulani xquendanabánicaʼ, nga runi racalaʼdxiʼ Jehová gacané laanu guizíʼdinu guni predicarnu jma jneza. Ne lu folletu ni láʼ Gunnaxhii binni: Bisiidiʼ laacabe zeeda caadxi conseju ni zacané laanu para guzulú guinínenu binni ti guicaacaʼ estudiu ne gácacaʼ xpinni Cristu. Neca qué naʼ binni guicaa ca noticia galán ca yanna, zándaca zápacabe oportunidad de guiziidicabe ante guiluxe gran tribulación. Ni gábinu laacabe yanna zándaca nga gucaa laacabe despué chuuláʼdxicabe guiziidicabe. Peru para nga la? nabé risaca cadi gusaana de guni predicarnu.

BINIBIÁʼ CHAAHUIBE NI NÁ CA PROFECÍA QUE

8. Ra binibiáʼ chaahuiʼ Jesús ni ná ca profecía, ¿ximodo gucanécani laabe?

⁸ Nanna Jesús ximodo chigaca cumplir caadxi de ca profecía ni zeeda lu Biblia, nga runi nánnabe chonna iza arondaʼ si nga zuni predicarbe ndaaniʼ guidxilayú riʼ (Dan. 9:​26, 27). Ne laaca nánnabe zedandá dxi zátibe ne ximodo chigácani purtiʼ maca cá ni lu Biblia (Luc. 18:​31-34). Cumu binibiáʼ chaahuiʼ Jesús ca profecía que la? ngue gucané laabe iquiiñebe tiempu stibe jneza ne guni predicarbe né stale gana para gunduuxebe dxiiñaʼ ni bidii Dios laabe gúnibe.

9. ¿Xiñee rucaa ca profecía ca laanu guni predicarnu né stale gana?

⁹ Ra guiénenu ni ná ca profecía ca zacanécani laanu guni predicarnu né stale gana. Nánnanu mayaca guinitilú guidxilayú riʼ. Cadúʼyanu guiráʼ ni cazaaca, modo cuchaa xpiaʼ binni ne rudiʼnu cuenta nga peʼ nga ná Biblia zazaaca lu ca últimu dxi. Riénenu ximodo cayaca cumplir profecía ni caníʼ zadinde rey del sur (ni caninu raríʼ nga Reino Unido ne Estados Unidos) ne rey del norte (ni caninu raríʼ nga Rusia ne ca guidxi ni runi apoyar laa) lu tiempu ra mayaca gueeda fin (Dan. 11:40). Laaca riénenu ñee estatua ni riete lu profecía stiʼ Daniel 2:​43-45 runi representarni potencia mundial stiʼ Reino Unido ne Estados Unidos. Ora runi estudiarnu ca profecía ni zeeda lu Biblia riuʼnu seguru maʼ xcaadxi si cayaadxaʼ para gunitilú Reinu stiʼ Dios guiráʼ ca gobiernu nuu lu guidxilayú. Racané ca profecía riʼ laanu gánnanu xi tiempu nabáninu ne rucaacani laanu cadi gusaana de guni predicarnu né stale gana.

10. ¿Gunáʼ nga caadxi modo zanda gacané ca profecía ni zeeda lu Biblia laanu guni predicarnu né stale gana?

¹⁰ Lu ca profecía ni zeeda lu Biblia laaca riete caadxi cosa galán ni nabé riuuláʼdxinu gábinu binni. Ti hermana ni láʼ Carrie ni cayuni servir República Dominicana guníʼ: «Ora riníʼ iqueʼ ca promesa sicarú ni cayabi Jehová laanu, runeʼ sentir caquiiñeʼ gabeʼ ni xcaadxi binni. Ora ruuyaʼ guiráʼ guendanagana nápacabe, riníʼ iqueʼ cadi para naa siaʼ nga cayuni Jehová ca promesa riʼ, sínuque ne para laacabe». Riguu ca profecía ca gana laanu cadi gusaana de guni predicarnu purtiʼ rusietenaláʼdxicani laanu nuu Jehová para gacané laanu lu dxiiñaʼ riʼ. Ti hermana de Hungría ni láʼ Leila guníʼ: «Rusiidiʼ Isaías 11:​6-9 naa zanda gacané Jehová tutiica binni para guchaa. Ne nga riguuni gana naa guneʼ predicar tutiica binni dede né ca ni ruluíʼ qué zaná gucaadiaga». Ne ti hermanu de Zambia ni láʼ Christopher bizeeteʼ: «Casi maca cá lu Marcos 13:​10, cayaca predicar ca noticia galán lu guidubi guidxilayú, ne para naa ti ndaayaʼ nga gacaniáʼ gaca cumplir profecía riʼ». ¿Lii yaʼ? ¿Xi profecía racané lii para cadi gusaana de guni predicarluʼ?

GÚPABE CONFIANZA ZACANÉ JEHOVÁ LAABE

11. ¿Xiñee caquiiñeʼ gapa Jesús confianza Jehová para cadi gusaana de guni predicar né stale gana? (Lucas 12:​49, 53).

¹¹ Gupa Jesús confianza zacané Jehová laa para cadi gusaana de guni predicar né stale gana. Neca né stale respetu nga biʼniʼ predicar Jesús ca noticia galán stiʼ Reinu, nánnabe ziuu binni ni zadxiichi ne zucaalú laacabe (biindaʼ Lucas 12:​49, 53). Ne ca xaíque stiʼ ca religión que nabé guca nanaláʼdxicaʼ laabe pur ni cusiidibe ne stale biaje biyúbicaʼ modo guuticaʼ laabe (Juan 8:59; 10:​31, 39). Neca zaqué, qué nusaana Jesús de ñuni predicar purtiʼ nanna nuu Jehová gaxha de laa ne cadi stubi cayuni dxiiñaʼ que. Laabe guniʼbe: «Purtiʼ cadi naa siaʼ [cayuneʼ] ni, sínuque naa ne Bixhozeʼ ni biseendaʼ naa» (Juan 8:16). Ne laaca guniʼbe: «Qué huasaanabe naa stubeʼ, purtiʼ siempre runeʼ ca cosa ni riuuláʼdxibe» (Juan 8:29).

12. ¿Ximodo gucané Jesús ca discípulo stiʼ para cadi gusaana de guni predicarcaʼ neca gucaalúcabe laacaʼ?

¹² Bisietenalaʼdxiʼ Jesús ca discípulo stiʼ zanda gápacaʼ confianza zacané Jehová laacaʼ. Cumu nánnabe zazananda binni laacaʼ la? stale biaje gúdxibe laacaʼ qué zusaana Jehová de gacané laacaʼ (Mat. 10:​18-20; Luc. 12:​11, 12). Laaca gúdxibe laacaʼ gatanacaʼ (Mat. 10:16; Luc. 10:3). Ne laaca gúdxibe laacaʼ pa qué naʼ binni gucaadiaga laacaʼ cadi naquiiñeʼ guni obligárcabe laacaʼ (Luc. 10:​10, 11). Ne bidiibe laacaʼ ti conseju: guxooñelucaʼ ora sananda binni laacaʼ (Mat. 10:23). Neca gupa Jesús confianza Jehová ne biʼniʼ predicar né stale gana, qué nuyúbibe ñuu xquendanabánibe ra naxoo (Juan 11:​53, 54).

13. ¿Xiñee zanda chuʼluʼ seguru zacané Jehová lii?

¹³ Ca dxi stinu riʼ laaca rucaalú binni laanu nga runi caquiiñeʼ gacané Jehová laanu para cadi gusaana de guni predicarnu né stale gana (Apoc. 12:17). ¿Xiñee zanda chuʼnu seguru zacané Jehová laanu yaʼ? Pur oración ni biʼniʼ Jesús ni zeeda lu Juan capítulo 17. Gunábabe Bixhózebe gapa ca apóstol que ne bicaadiaga Jehová laabe. Lu libru stiʼ Hechos riete ximodo gucané Jehová ca apóstol para guni predicarcaʼ né stale gana neca canazanándacabe laacaʼ. Laaca lu oración que gunabaʼ Jesús Jehová gapa ca binni ni guni cré ca noticia galán ni cusiidiʼ ca apóstol que ne lade ca binni ca nga nuunu laanu. Nga runi, zanda chuʼnu seguru qué zusaana Jehová de guicabi oración ni biʼniʼ Jesús ne zacané laanu cásica gucanebe ca apóstol que (Juan 17:​11, 15, 20).

14. ¿Xiñee nuunu seguru zanda guni predicarnu né stale gana? (Laaca zanda gúʼyaluʼ imagen ca).

¹⁴ Zándaca ra jma maʼ gaxha zedadxiña fin zaca nagana para laanu guni predicarnu né stale gana. Peru Jesús gudxi laanu zápanu ni zacané laanu para gúninu ni (Luc. 21:​12-15). Cásica biʼniʼ Jesús ne ca discípulo stiʼ, gudiʼnu lugar binni nga cuí pa zucaadiaga laanu o pa coʼ, ne cadi guyúbinu tindenenu laacaʼ. Dede ndaaniʼ ca guidxi ra rucueezacabe ca hermanu para guni predicarcaʼ, qué huasaana de guni predicarcaʼ ca noticia galán purtiʼ nápacaʼ confianza Jehová ne cadi laca laacaʼ. Cásica lu primé siglu que bidii Jehová poder ca xpinni para gábicaʼ binni «guiráʼ ni cá lu Stiidxaʼ Dios», zaqueca tiempu riʼ laaca rudii Jehová laanu poder para guni predicarnu dede ra guiniʼbe maʼ de racá si (2 Tim. 4:17). Naquiiñeʼ chuʼnu seguru: pa gápanu confianza Jehová la? qué zusaana de guni predicarnu né stale gana.

GÚNNABE ZABEENDUBE NI GALÁN

15. ¿Ximodo nánnanu gupa Jesús confianza ziuu binni ni zucaadiaga ca noticia galán?

¹⁵ Gupa Jesús confianza ziuu binni ni zucaadiaga ca noticia galán ne ngue gucané laabe cadi gusaana de guni predicarbe né stale gana. Ra ziluxe iza 30, biiyaʼ Jesús nuu stale binni ni racalaʼdxiʼ gucaadiaga ca noticia galán, ngue runi bichaagabe laacaʼ casi layú ni maʼ nuu listu para guiasa cosecha (Juan 4:35). Biaʼ ti iza despué gúdxibe ca discípulo stibe: «Naroʼbaʼ cosecha riʼ» (Mat. 9:​37, 38). Ne despué laaca gúdxibe laacaʼ: «Naroʼbaʼ cosecha riʼ, […] laguinabaʼ Dueñu stiʼ cosecha guseendaʼ trabajador ra cayasa cosecha stiʼ» (Luc. 10:2). Gunna Jesús ziuu stale binni ni zaná gucaadiaga mensaje stiʼ Reinu ne nabé nayecheʼ guyuube ora bicaadiaga binni ca noticia que (Luc. 10:21).

16. ¿Xi ejemplu biquiiñeʼ Jesús para gucané ca discípulo stiʼ guiníʼ íquecaʼ zabeenducaʼ ni galán ora guni predicarcaʼ? (Lucas 13:​18-21; laaca zanda gúʼyaluʼ imagen ca).

¹⁶ Bisiidiʼ Jesús ca discípulo stiʼ guiníʼ íquecaʼ zabeenducaʼ ni galán ra guni predicarcaʼ ne zaqué gucané Jesús laacaʼ cadi guireecaʼ gana. Guidúʼyanu chupa ejemplu ni guníʼ Jesús (biindaʼ Lucas 13:​18-21). Guniʼbe zeeda gaca ca noticia galán stiʼ Reinu casi ti biidxiʼ mostaza ni rindani ne reeda gaca ti yaga naroʼbaʼ. Né ejemplu riʼ guníʼ Jesús stale binni nga zaná gunadiaga ca noticia galán ne gastiʼ zucueeza laacaʼ para guiziidicaʼ. Laaca guniʼbe zeeda gaca ca noticia galán stiʼ Reinu casi levadura. Zaqué bisiidibe zaca predicar ca noticia galán lu guidxilayú ne zacaneni stale binni guchaa modo nabani, neca tiempu que huaxiéʼ si binni gucuaa mensaje que. Né ca ejemplu riʼ gucané Jesús ca discípulo stiʼ gánnacaʼ stale nga ni zabeenducaʼ ora guni predicarcaʼ.

17. ¿Xi racané laanu para cadi gusaana de guni predicarnu né stale gana?

¹⁷ Ti cosa ni zacané laanu cadi gusaana de guni predicarnu né stale gana nga guidúʼyanu guiráʼ ni maʼ bireendú pur dxiiñaʼ riʼ. Guiráʼ iza stale binni ni riuulaʼdxiʼ guiziidiʼ riecaʼ Conmemoración ne rinacaʼ guicaacaʼ estudiu. Stale binni ruzulú riguni predicarnecaʼ laanu ne riuunísacaʼ. ¿Panda binni cayaadxaʼ gunaadiaga ca noticia galán riʼ yaʼ? Qué gánnanu ni. Peru ni nánnanu nga cutagulisaa Jehová stale binni ni zalá lu gran tribulación (Apoc. 7:​9, 14). Jehová nga Xpixuaanaʼ cosecha riʼ, ne laabe nánnabe nuuruʼ binni ni zaná gucaadiaga ca noticia galán. Nga runi, nápanu stale razón para cadi gusaana de guni predicarnu.

18. ¿Xi racaláʼdxinu gudii binni cuenta de laanu?

¹⁸ Runibiáʼ binni ca ni dxandíʼ xpinni Jesús purtiʼ runi predicarcaʼ né stale gana. Ora biʼyaʼ ca binni que pabiáʼ nadxibalú ca apóstol que ne runi predicarcaʼ né stale gana «bidiicabe cuenta guzané ca hombre riʼ Jesús» (Hech. 4:13). Laanu laaca racaláʼdxinu guʼyaʼ binni runi predicarnu né stale gana cásica biʼniʼ Jesús ni.