Gusihuínninu nápanu fe pur ca decisión ni guicaanu

1. ¿Xiñee biʼniʼ sentir Pablo dxáʼ tipa ladxidóʼ?

NANNA apóstol Pablo maʼ cadi candaa zuuticabe laa. Peru ra guiníʼ íquebe guiráʼ ni bíʼnibe lu xquendanabánibe ridxá tipa ladxidoʼbe. ¿Xiiñeʼ yaʼ? Laabe guniʼbe: «Qué nixeleʼ de ni runi cré ca xpinni Cristu, maʼ bixooñeʼ lu ti carrera ne yanna maʼ yendayaʼ lu meta» (2 Tim. 4:​6-8). Lu carrera ni bixooñebe riʼ gucuaabe decisión jneza, ngue runi guyuube seguru cayuulaʼdxiʼ Jehová ni bíʼnibe. Cásica Pablo, racaláʼdxinu guicaanu decisión jneza ni gusiecheʼ Jehová. ¿Ximodo zanda gúninu ni yaʼ?

2. ¿Xi riníʼ sanu pur fe?

² Ora guníʼ Pablo ni bizaaca ne ni bizaaca xcaadxi xpinni Cristu, guniʼbe: «Canazanu pur fe ne cadi pur ni ridúʼyanu» (2 Cor. 5:7). ¿Xi gucaláʼdxibe niniʼbe yaʼ? Nuu biaje ora ruzeeteʼ Biblia «canazá ti binni» cadi caniʼni modo rizá tuuxa, sínuque modo nabani. Ne ora riete canazá tuuxa pur ni ruuyaʼ, ni riniʼni nga ricaabe decisión pur ca cosa ni ruuyabe, ni runadiágabe ne ni runi sentirbe. Peru ora riete canazá tuuxa pur fe stiʼ, riniʼni ruuyabe xi riníʼ ique Jehová ante guicaabe xiixa decisión. Ca cosa ni rúnibe rusihuínnicani nápabe confianza Jehová ne nánnabe ra chinándabe ca conseju ni zeeda lu Biblia zabánibe galán ne zudii Jehová laabe premiu huidxegá si (Sal. 119:66; Heb. 11:6).

3. ¿Xi ribeendunu ra sanu pur fe? (2 Corintios 4:18).

³ Nuu biaje ricaanu decisión pur ni ridúʼyanu, runadiáganu ne ni runi sentirnu. Peru pa guicaanu ca decisión ni nabé risaca lu xquendanabáninu pur si ni ridúʼyanu, ni runadiáganu o ni runi sentirnu la? zándaca qué zareecani jneza. ¿Xiñee yaʼ? Purtiʼ stale biaje ni ridúʼyanu o ni runadiáganu zándaca cadi dxandíʼ cani ne qué zanda gacanécani laanu. Ne pa sanu pur ni ridúʼyasinu zándaca maʼ qué zinándanu ca conseju stiʼ Jehová ne maʼ qué zúninu ni nabe (Ecl. 11:9; Mat. 24:​37-39). Peru pa sanu pur fe zándaca zacaanu decisión «ni riuulaʼdxiʼ Señor» (Efes. 5:10). Chinándanu ca conseju stiʼ Dios zacaneni laanu gatadxí ladxidoʼno ne xquendabiaaninu ne dxandíʼ peʼ ziuʼnu nayecheʼ (Sal. 16:​8, 9; Is. 48:​17, 18). Ne pa qué gusaana de sanu pur fe, zabáninu sin qué chuʼ dxi gátinu (biindaʼ 2 Corintios 4:18).

4. ¿Xi modo zanda gánnanu pa canazanu pur fe o pur ni ridúʼyanu?

⁴ ¿Ximodo nánnanu pa canazanu pur fe o pur ni ridúʼyanu yaʼ? Zanda gánnanu ni ra guiníʼ íquenu ca pregunta riʼ: «¿Xi racané naa para guicaaʼ xiixa decisión? ¿Ñee ricaaʼ decisión pur ca ni ruuyasiáʼ la? o purtiʼ napaʼ confianza Jehová ne ca ley stiʼ?». Lu artículo riʼ zadúʼyanu xi zanda gúninu para cadi gusaana de gápanu confianza Jehová lu guionnaʼ cosa riʼ: ora cuinu xi dxiiñaʼ guicaanu, ora guidúʼyanu tu guichagananu ne ora guicaanu xiixa instrucción ndaaniʼ xquidxi Dios. Lu cada tobi de laacani zadúʼyanu caadxi cosa ni zacané laanu guicaanu decisión jneza.

ORA CUINU XI DXIIÑAʼ GUICAANU

5. ¿Ñee jma caquiiñeʼ guicá íquenu pagala chitíxecabe laanu ora guicaanu ti dxiiñaʼ la?

⁵ Gastiʼ naca gacalaʼdxiʼ tuuxa gapa ti dxiiñaʼ ni gacané laa gapa ni caquiiñeʼ ne ni caquiiñeʼ familia stiʼ (Ecl. 7:12; 1 Tim. 5:8). Nuu lugar la? rugaanda biaʼ riguíxecabe tuuxa ni runi dxiiñaʼ para ganda gudii ni caquiiñeʼ familia stiʼ ne ganda guindisaʼ ti ndaa bueltu. Peru nuu lugar la? zándaca jma huaxiéʼ riguíxecabe tuuxa ne rugaandani para si gapa familia sticaʼ ni tidinecaʼ dxi. Dxandíʼ, pa canayúbinu ti dxiiñaʼ ne bidxélanu tobi ni zanda guicaanu la? zándaca zaníʼ íquenu pabiáʼ chitíxecabe laanu. Peru pa jma ca íquenu pagala peʼ chitíxecabe laanu la? nga riníʼ nácanu ti binni ni canazá pur ni ruuyaʼ si.

6. ¿Ximodo rusihuínninu canazanu pur fe ora cuinu xi dxiiñaʼ guicaanu? (Hebreos 13:5).

⁶ Pa canazanu pur fe, laaca zadúʼyanu pa zuxheleʼ dxiiñaʼ ca laanu de Jehová. Guiníʼ íquenu ca pregunta riʼ: «¿Ñee zucaani naa guneʼ xiixa ni nanalaʼdxiʼ Jehová la? ¿Ñee pur laani zusaana de guneʼ ca cosa ni ruchiña naa gaxha de Jehová la? ¿Ñee pur laani xadxí zusaana de guuyaʼ familia stinneʼ la?» (Prov. 6:​16-19; Filip. 1:10). Pa zucaani lii gúniluʼ tobi de ca cosa riʼ, ni jma galán nga cadi guicaaluʼ dxiiñaʼ ca, neca gaca nagana para lii guidxélaluʼ dxiiñaʼ. Pa canazanu pur fe, zusihuinni ca decisión ni guicaanu dxandíʼ nuunu seguru zacané Jehová laanu ne zudii ni caquíʼñenu (Mat. 6:33; biindaʼ Hebreos 13:5).

7, 8. ¿Ximodo bisihuinni Javier canazá pur fe? (Laaca zanda gúʼyaluʼ imagen ca).

⁷ Ti hermanu de Sudamérica lá Javiera qué riaandaʼ laa pabiáʼ risaca nga sanu pur fe. Laabe guniʼbe: «Ra cayuneʼ dxiiñaʼ biree ti puestu risaca ra zanda guneʼ ganar doble de ni runeʼ ganar, ¡aque galán dxiiñaʼ que! Ngue runi guluaaʼ solicitud para guicaaʼ puestu que». Peru guizáʼ racalaʼdxiʼ Javier gaca precursor. Ne guníʼrube: «Ante guiniʼné gerente nacional stiʼ empresa que naa, bineʼ orar Jehová, purtiʼ nuaaʼ seguru laabe nga nánnabe xii nga ni jma galán para naa. Dxandíʼ, racalaʼdxeʼ gapaʼ ti dxiiñaʼ jma galán que ni napaʼ que, peru qué zacaaʼ dxiiñaʼ que pa zucueezani naa para ugaandaʼ ca meta ni naguixhe iqueʼ ndaaniʼ xquidxi Dios».

⁸ Javier bizeeteʼ: «Gudxi gerente que naa stale biaje zuneʼ dxiiñaʼ dede huadxí. Né respetu gudxeʼ laabe qué zanda diʼ purtiʼ zucueezani naa de chaaʼ reunión ne guneʼ predicar». Qué niná Javier nicaa dxiiñaʼ que ne chupa semana despué gúcabe precursor. Iza queca bidxélabe ti dxiiñaʼ ra zúnibe huaxiéʼ hora. Laabe guniʼbe: «Bicaadiaga Jehová ca oración stinneʼ ne gucané naa guidxelaʼ ti dxiiñaʼ ni racané naa gaca precursor. Guizáʼ nayecheʼ nuaaʼ purtiʼ napaʼ ti dxiiñaʼ ni rudii lugar guneʼ jma lu xhiiñaʼ Jehová ne gapaʼ tiempu para gacaniáʼ ca hermanu».

9. ¿Xi riziidiluʼ de ni bizaaca Trésor?

⁹ Yanna, pa gudiʼnu cuenta cucueeza dxiiñaʼ ni nápanu ca laanu para sanu pur fe stinu yaʼ. Guidúʼyanu ni bizaaca ti hermanu de guidxi Congo ni láʼ Trésor. Laabe guniʼbe: «Cayuneʼ dxiiñaʼ ni riuuladxeʼ. Runeʼ ganar chonna biaje jma que biaʼ bineʼ ganar dxiqué ne stale binni runi respetar naa». Peru stale biaje biaadxaʼ Trésor reunión purtiʼ biʼniʼ dxiiñaʼ dede huadxí. Laaca bicaacabe laabe gusiguiibe para cadi guihuinni ca cosa ni cadi jneza runi empresa que. Racaláʼdxibe gusaanabe ni, peru ni riguu xizaa laabe nga guiaanabe sin dxiiñaʼ. ¿Xi gucané laabe yaʼ? Laabe guniʼbe: «Nabé gucané ca diidxaʼ ni zeeda lu Habacuc 3:​17-19 naa guieneʼ neca guiaanaʼ sin bueltu, zapa Jehová naa. Ngue runi bisaanaʼ dxiiñaʼ que». Laabe guníʼrube: «Stale patrón riníʼ ique zusaana tuuxa ca cosa ni riuulaʼdxiʼ guni pa quixécabe laa galán dede zuni dxiiñaʼ lugar de chuʼné familia stiʼ ne guni adorar Dios. Guizáʼ nayecheʼ nuaaʼ purtiʼ qué nixeleʼ de Jehová ne de familia stinneʼ. Ti iza despué, gucané Jehová naa guidxelaʼ ti dxiiñaʼ ni cayacané naa gapaʼ ni caquiiñeʼ ne gapaʼ tiempu para guneʼ xhiiñaʼ Jehová. Ora quixhe íquenu gúninu ni ná Jehová primé lu xquendanabáninu, zándaca ziuu biaje huaxiéʼ bueltu zápanu, peru laabe siempre zudiibe ni caquíʼñenu». Nga runi, pa chinándanu ca conseju stiʼ Jehová ne gápanu confianza ca promesa stibe, qué zusaana de sanu pur fe ne zaguube ndaayaʼ laanu.

ORA CUINU TU GUICHAGANANU

10. ¿Ximodo rusihuinni tuuxa canazá pur ni ruuyaʼ si ora cuí tu guichaganáʼ?

¹⁰ Ti regalu stiʼ Jehová nga guendaxheelaʼ ne cadi malu nga gacaláʼdxinu guichagananu. Ora guiníʼ ique ti hermana guichaganáʼ, zándaca ni gúʼyabe nga modo rihuinni binni ca, ximodo naca, ximodo ruuyaʼ xcaadxi laa, ximodo riquiiñeʼ bueltu stiʼ, pa rapa familia stiʼ ne ximodo runi tratar laabe.b Dxandíʼ risaca ca cosa ca, peru pa ngasi nga ni guʼyaʼ hermana ca la? zándaca canazabe pur ni ruuyasibe.

11. ¿Ximodo zanda gusihuínninu canazanu pur fe ora cuinu tu guichagananu? (1 Corintios 7:39).

¹¹ Guizáʼ riecheʼ Jehová ora rinanda ca hermanu ne ca hermana conseju ni zeeda lu Stiidxaʼ para cuicaʼ tu guichaganacaʼ. Tobi de ca conseju ca nga cuézacabe dede ora maʼ cadi tan nahuiinicabe para guzulú gápacabe novio (1 Cor. 7:36). Sti conseju ni rinándacabe nga gúʼyacabe pa napa binni ca cualidad ni ribeza Jehová gapa ti binni ni maʼ bichaganáʼ (Prov. 31:​10-13, 26-28; Efes. 5:33; 1 Tim. 5:8). Pa gusihuinni tuuxa ni cadi naca Testigu riuulaʼdxiʼ laacabe, rinándacabe conseju riʼ: guichaganácabe «ti xpinni Señor» casi ná 1 Corintios 7:39 (biindaʼ ni). Qué rusaana de sácabe pur fe, purtiʼ nánnacabe Jehová si nga zanda gudii laacabe ni caquiiñecabe ne quixhedxí ladxidóʼcabe ne xquendabiaanicabe (Sal. 55:22).

12. ¿Xi rusiidiʼ ni bizaaca Rosa lii?

¹² Guidúʼyanu ni bizaaca Rosa, ti precursora de guidxi Colombia. Ra bíʼnibe dxiiñaʼ binibiaʼbe ti hombre ni cadi naca Testigu ni bizulú guyuulaʼdxiʼ laabe. Ne Rosa laaca guyuulaʼdxiʼ hombre que. Laabe guniʼbe: «Nachaʼhui hombre que. Rúnibe dxiiñaʼ para gacanebe colonia ra nabézabe ne qué gápabe viciu. Riuuladxeʼ modo runi tratarbe naa. Zacá peʼ nga hombre ni ñuuladxeʼ nichaganaʼyaʼ peru cadi Testigu laabe. Nabé guca nagana para naa gabeʼ laabe qué zácadu novio, peru ni dxandíʼ la? ladxiduáʼ rucaaʼ naa pa ñanda ñácadu novio. Tiempu que bineʼ sentir nuaaʼ stubeʼ ne racalaʼdxeʼ guichaganaʼyaʼ, peru qué huaree nin ti Testigu para guichaganaʼyaʼ». Peru qué nicá ique Rosa ni ruuyaʼ si, sínuque guníʼ íquebe ximodo zanda guxheleʼ decisión que laabe de Jehová. Ngue runi maʼ qué lica niníʼnebe hombre que ne gudixhe íquebe gúnibe jma lu xhiiñaʼ Jehová. Ra gudiʼdiʼ tiempu biʼniʼ invitárcabe laabe chebe Escuela para Evangelizadores del Reino, ne yanna maʼ nácabe precursora especial. Laabe guniʼbe: «Maʼ bichá tipa Jehová ladxiduáʼ de guendanayecheʼ». Dxandíʼ nuu biaje zaca nagana para laanu gúninu ni náʼ Jehová jmaruʼ si ora racalaʼdxiʼ ladxidoʼno xiixa, peru nánnanu siempre zabeendunu ni galán ra gúninu ni ná Jehová.

ORA RICAANU XIIXA INSTRUCCIÓN NDAANIʼ XQUIDXI DIOS

13. ¿Ximodo rusihuinni tuuxa canazá pur ni ruuyaʼ si ora ricaa instrucción ni zeeda de xquidxi Dios?

¹³ Stale biaje ricaanu instrucción ni zeeda de xquidxi Dios ni racané laanu gúninu ni ná Jehová, ne ricaanu ni pur ca ancianu, ca superintendente de circuito, sucursal o Grupu ni Zániru. Zándaca ziuu biaje qué ziénenu xiñee cudiicabe laanu xiixa instrucción. ¿Xi zúninu yaʼ? ¿Ñee riníʼ íquenu jma nagana zaca para laanu gúninu xhiiñaʼ Jehová ra chinándanu instrucción ca la? ¿Ñee qué zacaanu instrucción ca purtiʼ si cadúʼyanu ra cuchee ca hermanu stinu la? Pa gúninu ni maʼ bizéʼtenu riʼ la? zusihuínninu canazanu pur ni ridúʼyasinu.

14. ¿Xi zacané laanu sanu pur fe ora guicaanu xiixa instrucción ni gudii xquidxi Dios laanu? (Hebreos 13:17).

¹⁴ Ora canazanu pur fe, zusihuínninu nápanu confianza Jehová nga cayuni dirigir xquidxi ne nánnabe xi caquíʼñenu. Nga runi, nagueendaca ruzúʼbanu diidxaʼ ne rúninu ni né stale gana (biindaʼ Hebreos 13:17). Nánnanu pa guzúʼbanu diidxaʼ zacanenu chuʼ congregación tobi si (Efes. 4:​2, 3). Qué riaandaʼ laanu, neca naca ca hermanu ni rudii laanu instrucción binni ruchee zaguu Jehová ndaayaʼ laanu pa guzúʼbanu diidxaʼ (1 Sam. 15:22). Ne laabe nánnabe pora zanda guni chaahuibe xiixa cosa ni cadi jneza cayaca (Miq. 7:7).

15, 16. ¿Xi gucané Kevin cadi gusaana de saʼ pur fe? (Laaca zanda gúʼyaluʼ imagen ca).

¹⁵ Guidúʼyanu ti experiencia ni rusihuinni xi ribeendunu ora rizanu pur fe. Neca diidxastiá nga riníʼcabe ndaaniʼ guidxi Perú, stale binni riníʼ xcaadxi diidxaʼ. Ne tobi de ca diidxaʼ ca nga quechua. Pur stale iza, runi ca hermanu que casi ti censu lu ca territorio que para guidxélacaʼ binni ni riníʼ diidxaʼ quechua. Peru despué bichaa modo ruyúbicabe binni pur ca ley ni nuu ndaaniʼ guidxi que (Rom. 13:1). Pur ni bizaaca riʼ caadxi hermanu guníʼ ique ximodo nga guidxélacaʼ binni ni riníʼ quechua. Yenanda ca hermanu que ca instrucción nacubi que ne guluu Jehová ndaayaʼ guiráʼ stipa ni bíʼnicaʼ pur guyúbicaʼ ca binni ni riníʼ diidxaʼ que.

¹⁶ Kevin, ti ancianu de ti congregación ra riníʼcabe quechua, laabe nga tobi de ca hermanu ni guyuu xizaa pur ca instrucción nacubi ni gucuaacabe que. Laabe guniʼbe: «Riníʼ iqueʼ. Yanna, “¿ximodo gúnidu para guidxéladu ca binni ni riníʼ diidxaʼ quechua yaʼ?”». ¿Xi biʼniʼ Kevin? Laabe guniʼbe: «Bietenaladxeʼ ni ná lu Proverbios 3:5. Ne laaca guníʼ iqueʼ ejemplu stiʼ Moisés. Gudxi Jehová laabe cueebe ca israelita que de ndaaniʼ guidxi Egipto ne chinebe laacaʼ ra nuu nisadóʼ Xiñáʼ que, ruluíʼ maʼ qué zanda guilácabe de lu náʼ ca egipciu. Peru cumu bizuubaʼ Moisés diidxaʼ guluu Jehová ndaayaʼ laabe ne biʼniʼ ti milagru ni guizáʼ bidxagayaacabe» (Éx. 14:​1, 2, 9-11, 21, 22). Yenanda Kevin ca instrucción nacubi que, ¿xi guleendube yaʼ? Sicaríʼ guniʼbe: «Guizáʼ bidxagayaadu modo guluu Jehová ndaayaʼ laadu. Dxiqué caquiiñeʼ sadu zitu para guni predicardu ne nuu biaje tobi o chupa si binni ni riníʼ diidxaʼ quechua nga ridxéladu, peru yanna maʼ riuudu ca lugar ra nuu stale binni ni riníʼ diidxaʼ quechua. Jma rinínedu binni, rúnidu revisita ne estudiu. Ne jma stale binni rié reunión». Rihuinni dxíchica ora sanu pur fe que rusaana Jehová de cuʼ ndaayaʼ laanu.

17. ¿Xi maʼ bizíʼdinu lu artículo riʼ?

¹⁷ Maʼ bizéʼtenu chonna cosa ra zanda gusihuínninu canazanu pur fe. Ne cadi naquiiñeʼ gusaana de gúninu ni, casi ora guidúʼyanu xi gúninu para chuʼnu nayecheʼ ti ratu, panda iza ziuunu scuela ne ximodo gusiniisinu ca xiiñinu. Ora guicaanu decisión galán guidúʼyanu xi riníʼ ique Jehová, chinándanu ca conseju stibe ne cadi guiaandaʼ laanu maʼ biʼniʼ prometerbe zápabe laanu. Pa gúninu ni la? qué ziuudxí gusaana de «sanu lu lá Jehová, Dios stinu» (Miq. 4:5).