Cadi nuunu stúbinu

1, 2. a) ¿Xiñee zanda guininu ora cadídinu lu xiixa guendanagana cadi nuunu stúbinu? b) ¿Xi zadúʼyanu lu artículo riʼ?

PA CADÍDINU lu xiixa guendanagana nabé naroʼbaʼ. Zándaca guni sentirnu casi ñaca nuunu stúbinu ndaaniʼ ti lancha galaa nisadóʼ ne cayaca ti tormenta. Peru cadi nuunu stúbinu purtiʼ Bixhózenu ni nuu guibáʼ ni nabé nadxii laanu ruuyaʼ cayacananu ne maʼ guniʼbe qué zaxélebe de laanu. Cayabi Jehová cada tobi de ca xpinni ni qué rixeleʼ de laa: «Zacaniáʼ lii» (Is. 41:10).

² Lu artículo riʼ zadúʼyanu tapa modo racané Jehová laanu: primé, rábibe laanu xi gúninu, guiropa, rudiibe laanu ni caquíʼñenu, guionna, rápabe laanu, ne guidapa, riguixhedxibe ladxidoʼno. Maʼ biʼniʼ prometer Jehová intiica si guendanagana guidxaagalunu, qué ziuu dxi gusiaandabe laanu ne qué ziuu dxi gusaanabe laanu. Nga runi, cadi nuunu stúbinu.

RABI JEHOVÁ LAANU XI GÚNINU

3, 4. ¿Ximodo rabi Jehová laanu xi gúninu? (Salmo 48:14).

³ (Biindaʼ Salmo 48:14). Nanna Jehová stúbinu qué zanda guni mandarnu ra ruzuhuaa ñeenu. Nga runi rudiibe laanu ni caquíʼñenu para gánnanu xi gúninu. ¿Ximodo rúnibe ni yaʼ? Ti modo nga ra bidiibe laanu Biblia (Sal. 119:105). Racané Stiidxabe laanu guicaanu decisión jneza ne gápanu ca cualidad ni racané laanu guibáninu nayecheʼ ne gápanu ti esperanza de guibáninu sin qué chuʼ dxi gátinu.a Guzéʼtenu chupa chonna ejemplu, rusiidibe laanu guni perdonarnu ne cadi guidaʼnu xiana, gácanu honradu ne gannaxhiisaanu de guidubi ladxidoʼno (Sal. 37:8; Heb. 13:18; 1 Ped. 1:22). Zacané ca cualidad riʼ laanu ora guichagananu, ora gápanu xiiñinu ne ora gápanu xhamígunu.

⁴ Bidii Jehová lugar guicá lu Biblia ejemplu stiʼ binni casi laanu ni gupa guendanagana ne ni biʼniʼ sentir ni runi sentirnu (1 Cor. 10:13; Sant. 5:17). Ora ridúʼndanu ca ejemplu riʼ ne rúninu ni rusiidicani laanu, racanécani laanu de stale modo. Peru guininu chupa de laacani. Primé, rudiʼnu cuenta cadi laasinu nga maʼ bidxíʼlunu xiixa guendanagana, huayuuruʼ binni huadxiilú guendanagana cásica ni cudxíʼlunu ne huayuni huantarcaʼ purtiʼ gucané Jehová laacaʼ (1 Ped. 5:9). Ne guiropa, rizíʼdinu ximodo gudxíʼlunu ca guendanagana ca (Rom. 15:4).

5. ¿Tu riquiiñeʼ Jehová para gabi laanu xi gúninu?

⁵ Sti modo rabi Jehová laanu xi gúninu nga ra iquiiñebe ca hermanu stinu.b Gatigá riganna superintendente de circuito ca congregación ne rudiicabe discursu ni ruquidxi fe stinu ne racané laanu para chuʼnu tobi si (Hech. 15:​40–16:5). Laaca rizaalaʼdxiʼ ca ancianu de guidubi ladxidoʼcaʼ chuʼ cada tobi de ca publicador galán (1 Ped. 5:​2, 3). Ca ni napa xiiñiʼ rusiidicaʼ xiiñicaʼ gannaxhiicaʼ Jehová, guicaacaʼ decisión jneza ne racanecaʼ laacabe guidxíñabe gaxha de Dios (Prov. 22:6). Ne ca hermana ni maʼ biniisi ndaaniʼ xquidxi Dios racanecaʼ ca hermana ni jma nahuiiniʼ ra quíxhecaʼ ti ejemplu galán nezalúcabe, gudiicaʼ conseju né stale cariñu ne cuʼcaʼ gana laacabe (Tito 2:​3-5).

6. Ora gabi Jehová laanu xi gúninu, ¿xi caquiiñeʼ gúninu para cueendunu ni galán?

⁶ Maʼ bidii Jehová laanu guiráʼ ni caquíʼñenu para guicaanu decisión jneza ne guibáninu nayecheʼ. ¿Xi caquiiñeʼ gúninu para cueendunu ni galán ne gusihuínninu rudiʼnu xquixe peʼ laabe yaʼ? Proverbios 3:​5, 6 ná: «Gupa confianza Jehová de guidubi ladxidoʼloʼ, ne cadi chinándaluʼ ni ná xpiaaniluʼ». ¿Xi zabeenduluʼ pa chinándaluʼ conseju riʼ yaʼ? «Zúnibe ca neza stiluʼ derechu». Ni caninu nga, zacanebe laanu cadi gápanu stale guendanagana ne guibáninu jma nayecheʼ. ¡Nabé rudiʼnu xquixe peʼ Jehová purtiʼ guizáʼ nadxii laanu ne rudiibe conseju cada tobi de laanu ora peʼ caquíʼñenu ni! (Sal. 32:8).

RUDII JEHOVÁ LAANU NI CAQUÍʼÑENU

7. ¿Ximodo racané Jehová laanu casi riete lu Filipenses 4:19?

⁷ (Biindaʼ Filipenses 4:19). Casi maʼ bidúʼyanu rabi Jehová laanu xi gúninu para chuʼnu gaxha de laa. Peru cadi ngasi, laaca riguube ndaayaʼ stipa ni rúninu para gápanu ca cosa ni caquíʼñenu casi guendaró, lari ne ti lugar ra cuézanu (Mat. 6:33; 2 Tes. 3:12). Neca normal nga guicá íquenu gápanu ca cosa ni caquíʼñenu peru rabi Jehová laanu cadi chuʼnu xizaa pur ca cosa ca (biiyaʼ primé nota de estudiu stiʼ Mateo 6:25). ¿Xiñee cadi naquiiñeʼ chuʼnu xizaa yaʼ? Purtiʼ Bixhózenu ni nuu guibáʼ maʼ guníʼ qué ziuu dxi gusaanaʼ ca xpinni ni qué rixeleʼ de laa (Mat. 6:8; Heb. 13:5). Zanda chuʼnu seguru zuni cumplirbe ni maʼ guniʼbe ne zudiibe laanu ni caquíʼñenu.

8. ¿Ximodo gucané Jehová David?

⁸ Guiníʼ íquenu ximodo gucané Jehová David laga canazánanda rey Saúl laa. Lu ca iza nagana que, bidii Jehová laabe ne ca xpínnibe guiráʼ ni caquiiñecabe para guibánicabe. Ra cayetenalaʼdxiʼ David guiráʼ ni bizaaca que, sicaríʼ bicaa: «Dxiqué nahuiineʼ, ne yanna maʼ bioxhuaʼ, peru qué huayuuyaʼ guirutiʼ ni runi ni jneza gusaana Dios laa stubi, ne nin qué huayuuyaʼ ca xiiñibe cananabaʼ pan» (Sal. 37:25). Zándaca laaca huayuuyaluʼ, biaʼ tiempu maʼ bibániluʼ, ximodo né stale guendarannaxhii huadii Jehová lii ni caquiiñeluʼ o ni caquiiñeʼ ca hermanu stiluʼ.

9. ¿Ximodo rudii Jehová ni caquiiñeʼ ca xpinni ora guizaaca xiixa desastre? (Laaca zanda gúʼyaluʼ ca imagen ca).

⁹ Laaca rudii Jehová ni caquiiñeʼ ca xpinni ora guizaaca xiixa desastre. Guzéʼtenu ti ejemplu, lu primé siglu que, biseendaʼ ca xpinni Cristu de gadxé gadxé lugar ni caquiiñeʼ ca hermanu de Jerusalén, purtiʼ guyuu ti hambre tiempu que (Hech. 11:​27-30; Rom. 15:​25, 26). Tiempu riʼ qué huasaana xquidxi Dios de gudii de guidubi ladxidóʼ. Ora guizaaca xiixa desastre, cumu nadxii Jehová laanu runiibibe ladxidóʼ ca xpínnibe para gudiicaʼ guendaró, nisa, lari ne medicina ca ni nabeza ca lugar ra gucaná. Ne laaca nuu hermanu ni ruuyaʼ gaca chaahuiʼ ca yoo ne ca Yoo stiʼ Reinu ni gucaná. Ne nagueendaca rudii ca xpinni Jehová guendaró espiritual ne riguixhedxicaʼ ladxidóʼ ca hermanu ni biniti lidxi o guti ti familia stiʼ.c

10, 11. ¿Xi rusiidiʼ ni bizaaca Boris laanu?

¹⁰ Naca Jehová ti Dios ni rudii de guidubi ladxidóʼ ne rudiibe ni caquiiñeʼ ca ni caʼruʼ gaca xpínnibe. Laanu laaca rinándanu ejemplu stibe ra guyúbinu modo gacanenu ca binni ni qué runi cré ni runi crenu (Gál. 6:10). Stale biaje pur ni rúninu racanenu binni gunibiáʼ laanu ne guiziidiʼ de Jehová. Guidúʼyanu ni bizaacaʼ Boris, ti director de scuela ni nabeza ndaaniʼ guidxi Ucrania. Neca cadi testigu stiʼ Jehová laabe, nácabe nachaʼhuiʼ ne runi respetarbe ca alumnu ni naca Testigu. Ora bizulú guerra, ndaaniʼ guidxi Ucrania gudixhe íquebe chebe stiʼ lugar laaca ndaaniʼ guidxi que ra cadi cayuniná guerra que, ne gucané ca hermanu laabe. Despué guyebe Conmemoración. Ne ra guníʼ íquebe guiráʼ ni biʼniʼ ca hermanu pur laabe, guniʼbe: «Nabé bizaalaʼdxiʼ ca testigu stiʼ Jehová naa ne gúpacaʼ naa. Nga runi guizáʼ rudieeʼ xquixe peʼ laacabe».

¹¹ Guiranu zanda chinándanu ejemplu stiʼ Bixhózenu ni nuu guibáʼ, rianu binni ne racanenu ca ni caquiiñeʼ ni neca cadi Testigu laacaʼ (Luc. 6:​31, 36). Ribézanu pur ca ni gúninu pur laacabe gucaani laacabe chuuláʼdxicabe guiziidicabe de Jehová ne guninécabe laanu xhiiñaʼ (1 Ped. 2:12). Peru pa quixhe íquecabe gúnicabe ni ná Jehová o pa coʼ, zuni sentirnu galán purtiʼ riuʼnu nayecheʼ ora racanenu xcaadxi (Hech. 20:35).

RAPA JEHOVÁ LAANU

12. ¿Xi maʼ guníʼ Jehová zuni pur xquidxi? (Salmo 91:​1, 2, 14).

¹² (Biindaʼ Salmo 91:​1, 2, 14). Maʼ biʼniʼ prometer Jehová zapa ca ni nuu ndaaniʼ xquidxi de intiica cosa ni zanda guxheleʼ laacaʼ de laabe. Qué zudiibe lugar gucueeza Binidxabaʼ xquídxibe de guni adorar laabe modo rinábabe ni (Juan 17:15). Ne nanna dxíchinu ora guzulú «gran tribulación», zuni Jehová ni maʼ guníʼ, zapa xquidxi, zacanebe laacaʼ iguidxi fe sticaʼ ne zulabe laacaʼ (Apoc. 7:​9, 14; nota).

13. ¿Ximodo rapa Jehová cada tobi de ca xpinni?

¹³ ¿Ximodo rapa Jehová cada tobi de ca xpinni? Rúnibe ni ra bidiibe laanu Biblia para gacané laanu gánnanu xii nga ni jneza ne ni cadi jneza (Heb. 5:14). Ra gúninu ni ná ca principiu zeeda lu Biblia nácani casi ti escudu ni rapa laanu para cadi gácanu xiixa ne para cadi guixélenu de Dios (Sal. 91:4). Laaca riquiiñeʼ Jehová congregación para gapa laanu (Is. 32:​1, 2). Ora riuʼnu lade binni ni nadxii Jehová ne ni ruzuubaʼ stiidxabe, riguuni gana laanu ne rudiini laanu stipa para gucáʼnanu intiica cosa malu (Prov. 13:20).

14. a) ¿Xiñee cadi guiráʼ diʼ biaje zuni Jehová xiixa para cuee ca guendanagana stinu? b) ¿Xi cayabi Salmo 9:10 laanu? (Laaca zanda gúʼyaluʼ nota ca).

¹⁴ Dxiqué guyuu biaje gupa Jehová ca xpinni para cadi gacanacaʼ, peru cadi guiráʼ ora bíʼnibe ni. Rusiidiʼ Biblia laanu guiranu zanda guizaacanu «cosa ni cadi caníʼ íquenu ne ora cadi cabézanu ni» (Ecl. 9:11). Cásica dxiqué ne zaqueca tiempu riʼ, huayuu biaje huadii Jehová lugar sanándacabe ca xpinni o dede gáticaʼ. ¿Xiñee yaʼ? Para gusihuínnibe rusiguii Binidxabaʼ (Job 2:​4-6; Mat. 23:34). Peru ora gápanu guendanagana zándaca qué zuni Jehová xiixa para guireeni, peru ti cosa ni cadi naquiiñeʼ guiaandaʼ laanu nga qué ziuu dxi gusaanabe ca ni nadxii laabe (Sal. 9:10).d

RIGUIXHEDXÍ JEHOVÁ LADXIDOʼNO

15. ¿Ximodo riguixhedxí Jehová ladxidoʼno ora runi orarnu laa, ora ridúʼndanu Stiidxaʼ ne ora riuʼnu gaxha de ca hermanu? (2 Corintios 1:​3, 4).

¹⁵ (Biindaʼ 2 Corintios 1:​3, 4). Guiranu nuu biaje riuʼnu triste, racananu o racaná ladxidoʼno. Ne zándaca yanna peʼ cudxiilunu xiixa ni nabé riguu xizaa laanu ne runi sentirnu nuunu stúbinu. Neca ruluíʼ guirutiʼ riene ni cazaacanu peru Jehová riene laanu ne cadi rienesibe laanu, sínuque laaca riguixhedxibe ladxidoʼno lu guiráʼ guendanagana ridxaagalunu. ¿Ximodo rúnibe ni yaʼ? Riguixhedxibe ladxidoʼno ra guni orarnu laabe, guidúʼndanu Biblia ne chuʼnu gaxha de ca hermanu stinu. Ora runi orarnu Dios ricabi laanu ne rudii laanu «paz stiʼ dede guirutiʼ zanda guiene ximodo ni» (Filip. 4:​6, 7). Ora ridúʼndanu Stiidxabe ridúʼyanu pabiáʼ nadxiibe laanu, rizíʼdinu de ca conseju galán stibe ne riguixhedxibe ladxidoʼno purtiʼ rudiibe laanu ti esperanza. Ne ora riuunu ca reunión ca, riuʼnu gaxha de ca hermanu stinu, runi sentirnu nadxiicaʼ laanu ne riquiiñecaʼ Stiidxa Dios para cuʼcaʼ gana laanu.

16. ¿Xi rusiidiʼ ni bizaaca Nathan ne Priscilla laanu?

¹⁶ Guidúʼyanu ximodo riquiiñeʼ Jehová Stiidxaʼ para quixhedxí ladxidoʼno ne cuʼ gana laanu. Guidúʼyanu ni bizaacaʼ Nathan ne Priscilla, ti guendaxheelaʼ ni nabeza ndaaniʼ guidxi Estados Unidos. Raca chupa chonna iza gudixhe íquecabe chindézacabe sti lugar para chigacanécabe ra caquiiñeʼ jma binni guni predicar. Nathan guníʼ: «Nánnadu zaguu Jehová ndaayaʼ laadu». Peru ora yendácabe congregación nacubi que guca huarácabe ne bizulú biaadxaʼ bueltu laacabe. Ngue runi gupa xidé bibiguétacabe ra lídxicabe peru guparucabe guendanagana purtiʼ cayaadxaʼ bueltu laacabe. Sicaríʼ guníʼ Nathan: «Guníʼ iqueʼ, ¿xiñee qué niguu Dios ndaayaʼ laadu pue? Dede guníʼ iqueʼ pa bínidu xiixa cosa malu». Peru despué guirópacabe bidiicabe cuenta qué nusaana Dios laacabe. Sicaríʼ guníʼ Nathan: «Ora cadídidu lu ca guendanagana que, guidúʼndadu Biblia beeda gácani casi ñaca nucaʼdiágadu ti xhamígudu ni caguu gana ne cudii laadu conseju galán. Bizíʼdidu cadi guiníʼ ique xhatadu guendanagana que, sínuque guidúʼyadu ximodo cayacané Jehová laadu gudxíʼludu ni. Ne gucané ni bizaacadu riʼ laadu gápadu confianza intiica guendanagana gudxíʼludu despué, zacané Jehová laadu».

17. ¿Ximodo gudixhedxí Jehová ladxidóʼ Helga? (Laaca zanda gúʼyaluʼ ca imagen ca).

¹⁷ Casi maʼ bidúʼyanu laaca zanda quixhedxí ca hermanu ladxidoʼno, guidúʼyanu ni bizaaca Helga, ti hermana ni nabeza ndaaniʼ guidxi Hungría. Pur stale iza gúpabe stale guendanagana dede biʼniʼ sentirbe guirutiʼ zanda gacané laabe ne biʼniʼ sentirbe qué risácabe. Peru yanna ora rietenaláʼdxibe guiráʼ ra gudíʼdibe que, ruuyabe ximodo biquiiñeʼ Jehová ca hermanu para quixhedxí ladxidoʼbe. Laabe guniʼbe: «Siempre gucané Jehová naa ora guʼyaʼ maʼ huaxiéʼ stipa napaʼ pur dxiiñaʼ stinneʼ, purtiʼ cayapaʼ xiiñeʼ ni huará ne pur xcaadxi guendanagana. Lu ca últimu 30 iza ni maʼ gudiʼdiʼ riʼ zanda guiniéʼ qué huayuudxí gusaana Jehová de guni cumplir ni maʼ guníʼ: quixhedxí ladxiduáʼ. Stale biaje rúnibe ni pur ca diidxaʼ ni riguixhedxí ladxiduáʼ ni rabi ca hermanu naa. Nuu biaje ruseendacabe mensaje ra nuaaʼ, rudiicabe naa xiixa guichihuiiniʼ ra caguucabe gana naa o rábicabe naa xiixa cosa galán de naa, rúnicabe ni biaʼsi peʼ ora peʼ caquiiñeʼ ni.

18. ¿Ximodo zanda quixhedxinu ladxidóʼ xcaadxi binni?

¹⁸ Ti ndaayaʼ ni nápanu nga quixhedxinu ladxidóʼ xcaadxi. ¿Ximodo zanda gúninu ni yaʼ? Ra gucaʼdiáganu laacabe né stale paciencia, gábinu laacabe xiixa diidxaʼ ni quixhedxí ladxidóʼcabe ne gúninu xiixa para gacanenu laacabe (Prov. 3:27). Ne qué rúninu ndiʼ né ca hermanu si stinu, sínuque né ca binni ni cayacaná dede né ca ni qué runi ni ná Jehová. Ne pa cadíʼdicaʼ lu xiixa guendanagana, nápacaʼ xiixa guendahuará o guti ti familia sticaʼ, rigánnanu laacaʼ, rucaʼdiáganu laacaʼ ne riguixhedxinu ladxidoʼcaʼ né Stiidxaʼ Dios. Ra chinándanu ejemplu stiʼ «Dios ni riguixhedxí ladxidoʼno» zacanenu ca hermanu stinu guni huantarcaʼ xiixa guendanagana ne laaca zándaca gacanenu ca binni ni qué runi ni ná Jehová gacaláʼdxicaʼ guiziidicaʼ de laabe (Mat. 5:16).

QUÉ ZIUUDXÍ GUIXELEʼ JEHOVÁ DE LAANU

19. ¿Xi runi Jehová pur laanu ne ximodo zanda chinándanu ejemplu stibe?

¹⁹ Guizáʼ rizaalaʼdxiʼ Jehová de guiranu ca ni nadxiinu laabe ne qué ziuudxí gusaanabe laanu ora cadídinu lu xiixa guendanagana. Nadxiibe laanu ne rápabe laanu cásica runi bixhoze binni né xiiñiʼ, rábibe laanu xi gúninu, rudiibe laanu ni caquiiñenu, rápabe laanu ne riguixhedxibe ladxidoʼno. Zanda chinándanu ejemplu stibe ra gacanenu ne cuʼnu gana ca ni cadiʼdiʼ lu xiixa guendanagana. Intiica si ni guidxaagalunu, zanda gápanu confianza qué zusaana Jehová laanu purtiʼ maʼ biʼniʼ prometerbe cada tobi de laanu: «Cadi guidxíbiluʼ, purtiʼ nuaaniáʼ lii» (Is. 41:10). ¡Guizáʼ ratadxí ladxidoʼno gánnanu qué ziuudxí gusaana Jehová laanu stúbinu!