Nagueendaca gacanenu ca ni nachaʼhuiʼ ladxidóʼ ni napa gana guiziidiʼ de Stiidxaʼ Dios

1. ¿Ximodo ricaa binni mensaje ni runi predicarnu laa? (Hechos 13:47, 48; 16:14, 15).

LU PRIMÉ siglu que, stale binni despué de binadiágacaʼ ni ná Stiidxaʼ Dios nagueendaca biʼniʼ crecaʼ ni (biindaʼ Hechos 13:47, 48; 16:14, 15). Ca dxi stinu riʼ, laaca nuu stale binni primé biaje gunadiágacaʼ ca noticia galán stiʼ Reinu riuulaʼdxiʼ cani ne runi crecaʼ ni. Ne zándaca dede ca binni ni qué niná nucaadiágacaʼ Stiidxaʼ Dios despué maʼ chuuláʼdxicaʼ guiziidicaʼ de Dios. Yanna, ¿xi naquiiñeʼ gúninu pa ora guni predicarnu guidxélanu binni ni «nachaʼhuiʼ ladxidóʼ» ni napa gana guiziidiʼ de Stiidxaʼ Dios yaʼ?

2. ¿Ximodo zanda guchaaganu dxiiñaʼ de guni predicarnu ne dxiiñaʼ ni runi tuuxa ni rudxiibaʼ yagahuiiniʼ?

² Zanda guchaaganu dxiiñaʼ de guni predicarnu ne dxiiñaʼ ni runi tuuxa ni rudxiibaʼ yagahuiiniʼ. Laga cudxiibabe xiixa yagahuiiniʼ zándaca gúʼyabe nuu de laacani maʼ bidiicani cuananaxhi, ngue runi nagueendaca rindísabe ni bidxiibabe. Zacaca nga rizaaca laga zigánnanu ti binni para gacanenu laa guiene chaahuiʼ xiñee risaca guiziidiʼ de lu Biblia. Zándaca guidxélanu tuuxa ni dxandíʼ peʼ racalaʼdxiʼ guicaa mensaje ni zinenu, ngue runi nagueendaca rúninu guiráʼ ni nuu lu nanu para gacanenu laa (Juan 4:35, 36). Pa guiduʼyaʼ chaahuinu, zanda gudiʼnu cuenta gadxé gadxé nga modo riaba Stiidxaʼ Dios ndaaniʼ ladxidóʼ binni ne zánnanu ximodo gacanenu cada tobi de laacaʼ. Lu artículo riʼ zadúʼyanu xi zanda gúninu ora guinínenu binni primé biaje ne guidúʼyanu racalaʼdxiʼ guiziidiʼ. Laaca zadúʼyanu ximodo gacanenu laa cadi gusaana de guiziidiʼ de Stiidxaʼ Dios.

XIMODO ZANDA GACANENU BINNI NI RACALAʼDXIʼ GUIZIIDIʼ DE BIBLIA

3. Pa guidxélanu ti binni ni riuulaʼdxiʼ guiziidiʼ de lu Biblia ora maʼ cayuni predicarnu, ¿xi zanda gúninu? (1 Corintios 9:26).

³ Pa guidxélanu ti binni ni riuulaʼdxiʼ guiziidiʼ de lu Biblia ora maʼ cayuni predicarnu, ni racaláʼdxinu nga gacanenu laa nagueendaca para guiziidiʼ de Jehová ne guidxiña gaxha de laabe. Cadi naquiiñeʼ cuézanu: primé biaje guinínenu laabe, ni jma galán gúninu nga gábinu laabe pa riuuláʼdxibe guidúʼndanenu laabe Biblia ne guni invitarnu laabe chebe ca reunión stinu (biindaʼ 1 Corintios 9:26).

4. ¿Xi rusiidiʼ experiencia ni riete lu párrafo ca laanu?

⁴ Gudxi laabe pa zuundaneluʼ laabe Biblia. Nuu binni riná gúʼndaneluʼ laa Biblia dede primé biaje guiníʼneluʼ laa. Guidúʼyanu ni bizaaca ndaaniʼ guidxi Canadá. Ti jueves, bidxiña ti baʼdudxaapaʼ lu exhibidor ne gucuaabe ti folletu ¡Zanda guibániluʼ nayecheʼ! hermana ni zuhuaa né exhibidor que bisiene laabe né folletu que zanda guicaabe ti estudiu de Biblia sin quíxebe. Guníʼ baʼdudxaapaʼ que racalaʼdxiʼ guʼndaʼ Biblia ne bidiibe númeru stibe hermana que. Dxiqueca biseendabe mensaje hermana que para guinabadiidxabe laa ximodo ridúʼndanenu binni Biblia. Gudxi hermana que laabe chiganna laabe sábadu peru óraque bicábibe: «¿Qué zanda ixíʼ la? napaʼ tiempu». Sti dxi queca bizulú biʼniʼ estudiarbe Biblia né hermana que, ne domingu que guyebe reunión primé biaje. Ne despué guizáʼ nagueenda modo biʼniʼ progresarbe.

5. ¿Xi cadi naquiiñeʼ guiaandaʼ laanu ora gábinu binni pa riuulaʼdxiʼ guidúʼndanenu laa Biblia? (Laaca zanda gúʼyaluʼ ca imagen ca).

⁵ Dxandíʼ, cadi guiráʼ diʼ binni ni guni predicarnu naca casi baʼdudxaapaʼ ni bizéʼtenu lu párrafo ca. Ngue runi galán cadi guiaandaʼ laanu ziuu biaje primé nga naquiiñeʼ guinínenu binni de xiixa tema ni riuulaʼdxiʼ ti zacá chuulaʼdxiʼ guiziidiʼ. Neca zacá, pa cadi guireʼnu gana ne gusihuínninu rizaaláʼdxinu binni zándaca qué zaca nagana para laanu guzulú guidúʼndanenu binni Biblia. ¿Xi zanda guininu para gábinu ti binni pa zadúʼndanenu laa Biblia yaʼ? Nga nga ni gunabadiidxacabe stale hermanu ne hermana ni nápacaʼ gracia para guzulú gúʼndanecaʼ binni Biblia. Guidúʼyanu xi bicábicabe.

6. ¿Xi zanda gúninu para gudii binni lugar guibiguetaʼ guinínenu laa de lu Biblia?

⁶ Bisiene ca publicador ne ca precursor riʼ nuu lugar zándaca ni jma galán nga cadi guzeetecabe lu binni ca pa zacaa ti cursu o estudiu. Ni jma huayacané laacabe nga gábicabe binni pa ziuiʼnécabe laa diidxaʼ o guiníʼcabe de xiixa tema ne zacá guiene chaahuicabe xi ná Biblia. Lugar de gábicabe binni ca ñuuláʼdxicabe nibiguétacabe, rusiénecabe jma galán guininu «Guizáʼ zadxagayaaluʼ ra gánnaluʼ ricabi Biblia ca pregunta ni huayúniluʼ» o «Cadi puru si de Dios nga riníʼ Biblia laaca rudiini conseju ni racané laanu tiempu riʼ». Ne laaca zanda guzéʼtenu lu binni ca: «Né chii o quince minutu zanda guiziidiluʼ stale cosa ni zacané lii». Cadi caquiiñeʼ peʼ guzéʼtenu lube racaláʼdxinu chigánnanu laabe guiráʼ semana, zacá qué zuni sentirbe cayuni obligarnu laabe gúʼndabe Biblia.

7. ¿Pora nga rudii caadxi binni cuenta bidxélacaʼ ni dxandíʼ? (1 Corintios 14:23-25).

⁷ Biʼniʼ invitar binni ca cheʼ reunión. Ruluíʼ si tiempu bibani apóstol Pablo guyuu binni primé biaje guyé reunión bidii cuenta maʼ bidxela ni dxandíʼ (biindaʼ 1 Corintios 14:23-25). Ca dxi stinu riʼ, zaqueca rizaaca. Stale binni nagueenda ridxiña gaxha de Jehová ora ruzulú riecaʼ reunión. Yanna, ¿pora nga guni invitarnu binni ca cheʼ reunión yaʼ? Lu lección chii stiʼ libru ¡Zanda guibániluʼ nayecheʼ! zeeda ti invitación, peru cadi caquiiñeʼ cuézanu de ora chindanu lu lección ca. Zanda gábinu binni ca cheʼ reunión ni raca ca fin de semana dede primé biaje guinínenu laa, zanda guzéʼtenu lube lá discursu ni chigucaadiáganu fin de semana o xiixa puntu ni guyuuláʼdxinu stiʼ artículo stiʼ Torre stiʼ ni rapa ni chiguiuundaʼ semana ca.

8. Pa guni invitarnu ti binni cheʼ reunión, ¿xi zanda gusiénenu laabe? (Isaías 54:13).

⁸ Ora guni invitarnu binni ca cheʼ reunión, galán gusiénenu laabe xiñee maʼ gadxé ca reunión ni rápanu ne ca reunión ni runi xcaadxi religión ni zándaca runibiaʼbe. Ndiʼ nga ni bizaaca ti binni ni cayuundanécabe Biblia, despué de guyebe primé biaje reunión ra riuundaʼ Torre stiʼ ni rapa, gunabadiidxabe hermana ni rudii laabe estudiu: «¿Ñee nanna binni ni runi pregunta ca lá cada tobi de ca binni ni nuu raríʼ la?». Bisiene hermana que laabe naca congregación casi ti familia, ngue runi guiranu rúninu stipa gánnanu lá cada tobi de laanu. Bicabi estudiante que laabe yuʼduʼ ra rié huaxiéʼ si tu laa nanna lá cada tobi ni rié raqué. Ne stale tu laa zándaca qué ganna xi pur rúninu ca reunión stinu ngue runi galán gusiénenu laacabe xi pur rácacani (biindaʼ Isaías 54:13). Raca reunirnu para gusisácanu Jehová, guizíʼdinu de laa ne cúʼsaanu gana laanu (Heb. 2:12; 10:24, 25). Nga runi ca reunión stinu nexheʼ chaahuicani ne racanécani laanu para guizíʼdinu, qué raca xiixa ritual lúcani ne laaca qué rinándanu tradición o ceremonia ni runi binni guidxilayú (1 Cor. 14:40). Cumu para guizíʼdinu nga riuunu ra Yoo stiʼ Reinu la? raca stipa chuʼ biaaniʼ ndaanicani. Laaca nácanu binni ni qué riuu lu política ne qué runi apoyarnu xiixa partidu. Ne lu ca reunión stinu qué rucaʼnu ridxi ne laaca qué ridinde diidxanu pur xiixa tema. Para ganna binni ca ximodo nga ca reunión stinu la? zanda guluinu laabe videu ni láʼ Ximodo raca ca guendaridagulisaa stidu.

9, 10. Pa guni invitarnu tuuxa cheʼ reunión, ¿xi zanda gábinu laabe para gacanenu laabe cadi guidxíbibe? (Laaca zanda gúʼyaluʼ imagen ca).

⁹ Nuu binni rituilú cheʼ reunión purtiʼ ridxíbicaʼ gábicabe laacaʼ naquiiñeʼ gácacaʼ testigu stiʼ Jehová. Nga runi, guyúbinu ganna binni ca galán ridxaagalunu tutiica cheʼ reunión neca cadi nácacaʼ Testigu; pa racalaʼdxiʼ binni ca, zanda cheʼ reunión, gucaadiaga ne guirutiʼ zucaa laa guni comentar ne laaca qué zucaacabe laabe guchaabe de religión. Qué raca diʼ reunión aparte para ca xcuidi, ngue runi ca familia ca zanda cuicaʼ juntu para guiziidicaʼ. Zacá zanna bixhoze ne jñaa ca xcuidi ca xi caziidicaʼ ne paraa nuucaʼ (Deut. 31:12). Laaca qué ridopa guna lu ca reunión stinu ne qué rinábanu bueltu, purtiʼ rúninu ni guníʼ Jesús: «Gucuaatu gratis, lagudii gratis» (Mat. 10:8). Laaca zanda gábinu binni ca cadi caquiiñeʼ peʼ gacu lari caru. Qué ruuyadxí diʼ Dios modo rihuinni binni o ni nacu, sínuque ni ruuyabe nga ni nuu ndaaniʼ ladxidóʼ (1 Sam. 16:7).

¹⁰ Pa cheʼ binni ca reunión, gúninu guiráʼ ni nuu lu nanu para guni sentirbe galán. Zanda chinenu laabe ra nuu ca ancianu para gunibiaʼbe laacaʼ ne gunibiaʼcaʼ laabe ne zaqueca ra nuu xcaadxi hermanu. Pa guyúbinu guni sentirbe galán la? zándaca zucaani laabe chebe sti reunión. Ora maʼ cayaca reunión ca, pa qué gápabe Biblia, galán guluinu laabe ca textu ca de lu Biblia stinu ne gábinu laabe ximodo zanda chinándabe ni cayete lu reunión ca.

PA GUZULÚ GUIDÚʼNDANENU TUUXA BIBLIA

11. ¿Ximodo rusihuínninu runi respetarnu tiempu ni maʼ gudixhe binni para guidúʼndanenu laa?

¹¹ Pa guzulú guidúʼndanenu tuuxa Biblia, ¿xi caquiiñeʼ gánnanu? Galán nga guni respetarnu tiempu ni maʼ gudixhe binni ca chigánnanu laa. Guzéʼtenu ti ejemplu, pa gábinu binni ca zigánnanu laa ti hora, galán gúninu ni maʼ guninu, neca ruluíʼ qué rusisaca binni neza ra nabézanu chindá tuuxa tempranu. Zaqueca, laaca galán primé biaje guidúʼndanenu laabe cadi guindaapenu. Caadxi hermanu ni napa gracia para gudiicaʼ estudiu nacaʼ neca gacalaʼdxiʼ binni ca guiziidiʼ jma peru jma galán cadi tídinu de biaʼ tiempu ni gudíxhenu guidúʼndanenu binni ca. Ne laaca galán cadi guininu stale, gudiʼnu lugar binni ca guiníʼ (Prov. 10:19).

12. Dede primé biaje guidúʼndanenu binni Biblia, ¿xi racaláʼdxinu gúninu?

¹² Ora gudiʼnu estudiu ti binni, ni racaláʼdxinu nga dede primé biaje guidúʼndanenu laabe gunibiaʼbe ne gannaxhiibe Jehová ne zaqueca Jesús. Nga runi, cadi gusíʼdinu laabe ni ná si xquendabiaaninu, sínuque iquíʼñenu Biblia para gusíʼdinu laabe (Hech. 10:25, 26). Ora bisiidiʼ apóstol Pablo binni bisiidibe laacaʼ de Jesucristu, binni ni gulí Jehová para gacané laanu gunibiaʼnu laa ne gannaxhiinu laa (1 Cor. 2:1, 2). Laaca bizeetebe nabé risaca nga gacanenu ca ni nacubi guca xpinni Cristu para gápacaʼ cualidad nabé risaca ni zeeda gaca casi oro, plata ne guié sicarú (1 Cor. 3:11-15). Caadxi de ca cualidad ca nga fe, guendanuuxpiaaniʼ ne guendaridxibi Jehová (Sal. 19:9, 10; Prov. 3:13-15; 1 Ped. 1:7). Galán chinándanu ejemplu stiʼ apóstol Pablo ne gacanenu ca estudiante stinu iguidxi fe sticaʼ ne gaca xhamígucaʼ Jehová Bixhózenu ni nuu guibáʼ ni guizáʼ nadxii laanu (2 Cor. 1:24).

13. ¿Ximodo zanda gusihuínninu nápanu paciencia ne riénenu binni ni cudiʼnu estudiu? (2 Corintios 10:4, 5; laaca zanda gúʼyaluʼ imagen ca).

¹³ Chinándanu modo bisiidiʼ Jesús, gápanu paciencia ne guiénenu binni. Ora gúninu pregunta binni ni cudiʼnu estudiu guyúbinu guni sentirbe galán. Pa guidúʼyanu cadi cayénebe xiixa puntu, gundúʼxenu lección ca ne maʼ despué guininu puntu ni qué ñénebe ca. Ne pa guidúʼyanu raca nagana para laabe guiene chaahuibe xiixa ni rusiidiʼ Biblia cadi gucaʼnu laabe guiziidibe ni, sínuque gudiʼnu lugar tidiʼ ti tiempuhuiiniʼ ti guiaba ni dxandíʼ ca ndaaniʼ ladxidoʼbe (Juan 16:12; Col. 2:6, 7). Ruchaaga Biblia ca cosa ni cadi dxandíʼ casi ti muru ni naquiiñeʼ gusábanu (biindaʼ 2 Corintios 10:4, 5; biiyaʼ nota de estudiu «derrumbar cosas fuertemente atrincheradas»). Para ganda gusaana binni ni cudiʼnu estudiu ca cosa ni cadi jneza ni maʼ biaa guni o gusaana de guni cré ni cadi jneza, primé, naquiiñeʼ gacanenu laabe gúʼyabe Jehová casi ti lugar ra zanda guilabe (Sal. 91:9).

PA CHEʼ BINNI CA REUNIÓN

14. ¿Ximodo guni tratarnu ca ni nacubi cheʼ reunión?

¹⁴ Racalaʼdxiʼ Jehová cadi gúninu menu binni ne guni tratarnu laa né guendarannaxhii ne gusihuínninu nadxiinu guiráʼ binni cheʼ ca reunión stinu, gastiʼ naca de padé laa, xi costumbre napa, pa ricu, pa pobre laa o de xi guidxi laa (Sant. 2:1-4, 9). Guidúʼyanu chupa chonna modo zanda gúninu ni bizéʼtenu riʼ.

15, 16. ¿Xi zanda gúninu para guni sentir cani nacubi cheʼ reunión galán?

¹⁵ Nuu tu laa rié ca reunión stinu para ganna ximodo racacani o purtiʼ biʼniʼ invitar tuuxa ni nabeza sti ladu laacaʼ. Nga runi, pa guidúʼyanu tuuxa ni nacubi guedandá ra Yoo stiʼ Reinu, galán guidxíñanu laabe para gudiʼnu laabe ti bienvenida. Gácanu nachaʼhuiʼ ne laabe peru sin gucaʼnu guni sentirbe cuchíʼñanu laabe. Zanda guni invitarnu laabe cuibe né laanu. Galán guyúbinu ti Biblia para laabe ne zaqueca ca publicación ni cayaca estudiar o gutíʼñenu laabe ca stinu. Galán guiníʼ íquenu xcaadxi modo para gacanenu binni ca guni sentir galán. Guzéʼtenu ti ejemplu, ti hombre ni guyé ra Yoo stiʼ Reinu rietenaláʼdxibe nabé cutuílube purtiʼ guníʼ íquebe cadi jneza lari nácube que. Para cadi guni sentirbe zaqué, hermanu ni bidxagalú laabe que gudxi laabe cadi chuʼbe xizaa, naca ca testigu stiʼ Jehová cásica guiráʼ binni. Guyuunisa hombre que ne qué ñuu dxi nusiaandabe ni biʼniʼ hermanu que pur laabe. Dxandíʼ, neca rizaaláʼdxinu ca binni ni rié ca reunión stinu peru naquiiñeʼ gápanu cuidadu cadi chuʼnu lu xquendanabánicaʼ (1 Ped. 4:15).

¹⁶ ¿Xiruʼ zanda gúninu para guni sentir binni ca galán cadxaagalunu laa? Guzéʼtenu chupa chonna ejemplu, galán gusihuínninu nápanu respetu pur ca cosa ni guininu de ca binni ni cadi naca Testigu o ca cosa ni guininu pur ca ni runi crécabe ora maʼ cayuinu diidxaʼ, ca comentariu ni gudiʼnu lu ca reunión ca ne zaqueca ora gápanu xiixa participación lu reunión. Galán cadi guininu xiixa ni guniná ca binni ni chiganna laanu o gúninu xiixa ni gucaa laacabe maʼ cadi guibiguétacabe (Tito 2:8; 3:2). Guzéʼtenu ti ejemplu, cadi galán diʼ nga gúninu menu ni runi cré xcaadxi binni (2 Cor. 6:3). Ca hermanu ni cudiicaʼ discursu lu plataforma naquiiñeʼ gápacaʼ stale cuidadu né ni bizéʼtenu riʼ. Laaca naquiiñeʼ gusihuínnicabe rizaaláʼdxicabe ca binni ni chiganna laanu ra gusiénecabe ca diidxaʼ ni riquíʼñenu casi testigu stiʼ Jehová ne ni zándaca qué guiene ca binni ca.

17. ¿Xii nga ni naquiiñeʼ quixhe íquenu gúninu pa guidxélanu tuuxa ni «nachaʼhuiʼ ladxidóʼ»?

¹⁷ Zeʼ dxi jma peʼ caquiiñeʼ guni predicarnu ne guyúbinu ca binni «ni nachaʼhuiʼ ladxidóʼ ni maʼ nuu para guicaa guendanabani ni qué zaluxe» (Hech. 13:48). Nga runi pa guni predicarnu tuuxa ne guidúʼyanu cayuulaʼdxiʼ ni cucaadiaga, nagueendaca gábinu laa pa zadúʼndanenu laa Biblia ne guni invitarnu laa cheʼ ca reunión stinu. Zacá zacanenu laabe sabe lu «neza ni zeʼ lu guendanabani» (Mat. 7:14).