NI ZACANÉ CA FAMILIA | GUENDAXHEELAʼ
Lacuee tiempu para laatu
¿Xiñee raca nagana para stale guendaxheelaʼ güicaʼ diidxaʼ neca nabézacaʼ ti lugar si?
Nabézacaʼ ti lugar, peru huaxiéʼ riniʼcaʼ. ¿Xiñee yaʼ?
«Guizáʼ maʼ bidxágadu»
Anna guníʼ: «Ora maʼ nápadu tiempu para güidu diidxaʼ, o maʼ bidxagaʼ la? o maʼ bidxágabe laabe. Ne ora maʼ bidxagaʼ, ridxiicheʼ pur intiica cosa. Nga runi mejor ridúʼyadu televisión».
«Jma riquiiñedu tiempu para chuʼdu lu internet»
Katherine guníʼ: «Zanda gunítiluʼ stale tiempu lu internet ne lu ca red social. Zanda chuaaʼ lu internet stale hora ne sin guinieniáʼ xheelaʼ. Dede nuu biaje runi sentirdu nuudu stúbidu neca nuudu ndaaniʼ ti cuartu si».
«Gadxé gadxé ni riuuláʼdxidu gúnidu»
Jane guníʼ: «Ora rindá xheelaʼ ra yoo, runi cosa ni riuulaʼdxiʼ para gaca relajar. Ne biaʼsi ni, purtiʼ guizáʼ rúnibe dxiiñaʼ. Peru ñuuladxeʼ nibeebe tiempu para naa».
«Guizáʼ rúnidu dxiiñaʼ»
Mark guníʼ: «Cumu nápadu dispositivu electrónicu, nga runi rúnirudu dxiiñaʼ neca maʼ cadi nuudu ra dxiiñaʼ. Stale biaje maʼ cacabeʼ mensaje o correu de ra dxiiñaʼ, lugar de niquiiñeʼ tiempu ca para xheelaʼ».
Ni zanda gúnitu
Naquiiñeʼ cueetu tiempu para chuʼtu tobi si, ne cadi guiníʼ íquetu gúnitu ni ora si ganda.
Textu ni zanda gacané lii: Naquiiñeʼ «ganna chaahuitu xii nga ni jma risaca» (Filipenses 1:10).
Laguiníʼ ique ndiʼ: ¿Ñee riníʼ íquetu jma risaca xquendaxheelatu que dxiiñaʼ stitu o ca cosa ni riuuláʼdxitu gúnitu la? ¿O maʼ tiempu si ni runi sobra lii nga gudiiluʼ xheelaluʼ?
Sugerencia: Lacuee tiempu para güinetu xheelatu diidxaʼ.
“Anna guníʼ: «Guizáʼ riuuladxeʼ ora ribee xheelaʼ tiempu para gúnidu xiixa juntu. Runeʼ sentir nadxiibe naa ne riuuláʼdxibe cueebe tiempu para naa. Nga rucaa naa gannaxhieeʼ laabe jma».
Bisaanagá ca dispositivu electrónicu stiluʼ.
Textu ni zanda gacané lii: «Nuu tiempu para guiráʼ cosa» (Eclesiastés 3:1).
Laguiníʼ ique ndiʼ: ¿Panda biaje huasaanaluʼ de gucaadiágaluʼ xheelaluʼ purtiʼ cayuuyaluʼ ti mensaje?
Sugerencia: Laguni stipa goto juntu neca ti biaje lu ti dxi, ne lagusaana celular stitu sti lugar. Galán guni aprovechartu tiempu ca para guiniʼtu xi cazaacatu.
Pa ganda la? laché guirópatu ora chisitu ca cosa ni caquiiñetu ne laguni ca buelta ni raca ra yoo juntu.
Textu ni zanda gacané lii: «Jma galán ora nuu chupa binni que tobi si, purtiʼ jma stale ni ribeendúcabe pur dxiiñaʼ nadipaʼ rúnicabe» (Eclesiastés 4:9).
Laguiníʼ ique ndiʼ: ¿Panda biaje rieluʼ stúbiluʼ risiluʼ o rigúniluʼ xiixa mandadu o rié xheelaluʼ stubi?
Sugerencia: Laguni dxiiñaʼ casi ti equipu ne lagacanesaa, dede lu ca cosa ni ruluíʼ cadi caquiiñeʼ gúnitu juntu.
Nina guníʼ: «Chisitu juntu, quíʼbitu traste, guzeechutu lari, gusiatu patiu... Lugar de gúʼyatu ca cosa riʼ casi ti dxiiñaʼ, laguni cani para chuʼtu juntu».
Lagaca binni ni riuu razón ne cadi guinábatu xheelatu cosa ni qué zanda guni.
Textu ni zanda gacané lii: «Guiráʼ binni naquiiñeʼ gunibiáʼ laatu casi binni riuu razón» (Filipenses 4:5).
Laguiníʼ ique ndiʼ: ¿Ximodo zanda gánnaluʼ cadi canábaluʼ xheelaluʼ cosa ni qué zanda guni?
Sugerencia: Lagüiʼ diidxaʼ para gánnatu xi caquiiñeʼ guni cada tobi de laatu. Despué lachuu de acuerdu ne laquixhe chaahuiʼ tiempu stitu.
Daniela guníʼ: «Guizáʼ daʼ xheelaʼ gana para guni stale cosa peru naa coʼ pur guendahuará stinneʼ. Nuu biaje rabeʼ laabe chigúnibe sti cosa ne naa chuaa stubeʼ ti ratu ra yoo. Laabe rigúnibe ejerciciu ne naa riziiladxeʼ. Zacá guirópadu riuʼdu nayecheʼ».
Ni zanda guiníʼ íquetu
Primé, cada tobi de laatu laguicabi ca pregunta riʼ. Despué cada tobi guiníʼ xi bicabi.
¿Ñee rábiluʼ ribeetu tiempu ni caquiiñetu para chuʼtu juntu la?
¿Xi cosa runi xheelaluʼ para chuʼtu juntu riuuláʼdxiluʼ?
¿Xi sti cosa ñuuláʼdxiluʼ ñuni xheelaluʼ para ñuutu juntu?
¿Panda biaje qué rucaadiagaluʼ ni rabi xheelaluʼ lii purtiʼ cayuuyaluʼ teléfono o tablet stiluʼ?
¿Xi zanda gúnitu para gusihuínnitu riénetu xheelatu?
¿Xi ñanda ñúnitu semana riʼ para chuʼtu juntu ne gúʼyatu xi caquiiñeʼ xheelatu?