Stale bueltu riniti ora raca guerra | ¿Peru ñee bueltu si nga riniti la?

Stale bueltu riniti ora raca guerra.

• «Maʼ biniti 2,2 billón de dólar pur ca guerra ni huayaca lu guidubi guidxilayú» (The Washington Post, 13 de febrero de 2024).

Peru cadi bueltu si nga riniti. Guiníʼ íquenu guerra ni cayaca Ucrania.

• Soldadu. Dede dxi bizulú guerra riʼ raca chupa iza maʼ gucaná o maʼ guti biaʼ gaayuʼ gayuaa mil soldadu.

• Binni. Guníʼ Naciones Unidas maʼ guti o gucaná jma de veintiocho mil binni. Ne cadi ngasi, ti hombre ni runi dxiiñaʼ ra ONU guníʼ: «Guizáʼ stale nga riniti lu ca guerra ca, dede qué zanda gánnanu panda peʼ binni nga ruchaani xquendanabani».a

Guizáʼ naroʼbaʼ yuubaʼ rapa binni lu guidubi guidxilayú ora raca ca guerra ca.

• Ti gayuaa catorce millón. Biaʼ ca nga binni ni maʼ bisaanaʼ lidxi ne rindeza sti lugar pur ca guerra ne guendaridinde ni cayaca lu guidubi guidxilayú ne bizuluni dede lu beeu septiembre de 2023.

• Gadxe gayuaa ochenta y tres millón. Biaʼ ca nga binni ni maʼ qué gapa ni gó. «Stale binni qué gapa ni gó pur nuu stale guerra ne biaʼ 70% de ca binni riʼ nabánicaʼ ndaaniʼ ca guidxi ra cayaca guerra» (Programa Mundial de Alimentos).

¿Ñee zedandá dxi maʼ qué ziuu guerra la? o ti bacaandaʼ si ni? ¿Ñee zedandá dxi maʼ qué ziuu guendapobre ne guiráʼ binni zapa ni gó la? ¿Xi rusiidiʼ Biblia yaʼ?

Tiempu cayaca guerra

Riquiiñeʼ Biblia ti caballu ne ni dxiʼbaʼ laame para guiníʼ de ca guerra ne guendaridinde ni zazaaca lu guidubi guidxilayú.

• «Ne biree sti caballu, color bele. Ne bidiicabe ni dxiʼbaʼ laame que ti espada roʼ ne gucuaa autoridad para cuee paz ndaaniʼ guidxilayú ti gatisaa binni» (Apocalipsis 6:4).

Despué de biree caballu color bele riʼ, biree xhupa caballu ni nanda laame ne laacaʼ runi representarcaʼ xcaadxi cosa ni cadúʼyanu cazaaca lu guidxilayú riʼ, laacani nga: hambre ne ra cayati binni pur guendahuará o pur xcaadxi cosa (Apocalipsis 6:5-8). Pa racalá’dxilu’ gánnaluʼ jma de profecía riʼ ne xiñee zanda chuʼnu seguru cayaca cumplirni ca dxi riʼ, biindaʼ artículo ni láʼ «¿Qué representan los jinetes del Apocalipsis?».

Tiempu ra maʼ cadi chuʼ guerra

Xcaadxi si maʼ qué zaquiiñeʼ ca cosa ni nuu lu guidxilayú riʼ lu ca guerra ca, peru cadi pur ni guni binni guidxilayú nga zácani. Biblia ná:

• Runduuxeʼ Dios «guiráʼ guerra nuu lu guidxilayú» (Salmo 46:9).

• Zuni chaahuiʼ Dios guiráʼ ra maʼ bininá ca guerra ca. «Zuchaabe nisa riete lucaʼ, maʼ qué ziuuruʼ guendaguti, maʼ guirutiʼ qué ziuu triste, maʼ guirutiʼ qué zuunaʼ ne maʼ qué ziuuruʼ yuubaʼ. Maʼ gudiʼdiʼ guiráʼ ni guyuu dxiqué» (Apocalipsis 21:4).

• Zudii Dios laanu guendariuudxi. «Zabeza binni xquidxeʼ ti lugar ra nuu guendariuudxi, ziuucaʼ ndaaniʼ yoo sin chuʼ tu guchibi laacaʼ ne gastiʼ zuchiiñaʼ laacaʼ lugar ra guiziiláʼdxicaʼ» (Isaías 32:18).

Casi ná ca profecía ni zeeda lu Biblia, ca guerra ni nuu yanna ne xcaadxi cosa ni cazaaca culuíʼcani mayaca chuʼ paz.

¿Xi chiguni Dios para chuʼ paz yaʼ? Zaquiiñebe Reinu stibe, laani nga ti gobiernu ni nuu guibá’ (Mateo 6:10). Para gannu’ xii nga Reinu ri’ ne xi chigunini pur lii la?, biiya’ videu ni lá’: ¿Xii nga Reinu stiʼ Dios?