¿Xi tratu rudii ca testigu stiʼ Jehová ca ni maʼ cadi naca de religión sticaʼ yaʼ?
Laadu ca testigu stiʼ Jehová rúnidu stipa pur gácadu nacha’hui’, gannaxhiidu ne guni respetardu guiráʼ binni. Pa ti Testigu maʼ huaxiéʼ rié reunión, maʼ huaxiéʼ runi predicar o maʼ qué rúnibe ni la? ruyúbidu guinínedu laabea ne guni sentirbe nadxiidu laabe ne riguʼdu gana laabe para guibiguetaʼ chuʼbe gaxha de Dios (Lucas 15:4-7).
Nuu biaje, pur ca ni guni tuuxa nga zanda cueecabe laa de ndaaniʼ congregación (1 Corintios 5:13). Cumu guizáʼ nadxiidu ca hermanu stidu, racanedu laacabe ti cadi guizaaca nga. Peru pa guireebe de ndaaniʼ congregación rúnidu casi ná Biblia ne rusihuínnidu nadxiidu ne runi respetardu laabe (Marcos 12:31; 1 Pedro 2:17).
¿Xi runi ti binni para cueecabe laa de ndaaniʼ congregación yaʼ?
Biblia ná: pa ti xpinni Cristu bi’ni’ ti pecadu grave ne qué naʼ gaca arrepentir naquiiñeʼ cueecabe laabe de ndaaniʼ congregaciónb (1 Corintios 5:11-13). Yanna, ¿guná nga ca pecadu grave runi ti binni para cueecabe laa de ndaaniʼ congregación yaʼ? Biblia ruzeeteʼ caadxi de laacani, casi, gapa binni jnadxii, xhudxi, guuti, guniná binnilidxi ne cuanaʼ (1 Corintios 6:9, 10; Gálatas 5:19-21; 1 Timoteo 1:9, 10).
Neca zacá, cadi casi guni binni ca ti pecadu grave maca ziree de ndaaniʼ congregación. Primé, racané ca ancianu de congregaciónc laabe guchaabe xpiaʼbe (Romanos 2:4). Riniʼnécabe laabe né diidxaʼ nadóʼ né stale cariñu. Ne rácacabe nacha’hui’ ne laabe (Gálatas 6:1). Ndiʼ zanda gacané laabe gudiibe cuenta paraa bicheebe ne zucaani laabe gaca arrepentirbe (2 Timoteo 2:24-26). Pa maʼ biyúbicabe modo gacanécabe laabe peru cadi cuchaabe xpiaʼbe ne cadi cayaca arrepentirbe la? zabeecabe laabe de ndaaniʼ congregación. Rudii ca ancianu ca ti anunciu ndaaniʼ congregación ne riníʼcabe maʼ cadi naca binni ca testigu stiʼ Jehová.
¿Xi rizaaca ora ribeecabe binni ni qué naʼ gaca arrepentir de ndaaniʼ congregación yaʼ? ¿Primé la? Rusihuínnidu ruzúʼbadu stiidxaʼ ca ley ni maʼ bidii Dios laadu ne qué ricá xpiaʼ binni ca, ca ni nuu ndaaniʼ congregación (1 Corintios 5:6; 15:33; 1 Pedro 1:16). Ne zanda gucaani binni gusaana ca cosa ni cadi jneza cayuni ne guni stipa pur guchaa (Hebreos 12:11).
¿Xi tratu rudii ca testigu stiʼ Jehová ca ni maʼ guleecabe de ndaaniʼ congregación yaʼ?
Biblia ná naquiiñeʼ gusaana de guidxaaga ca xpinni Cristu ca binni ni maʼ guleecabe de ndaaniʼ congregación ne «cadi lica gonécabe binni ca» (1 Corintios 5:11). Nga runi, qué zadxaaganu laabe. Peru qué riníʼ nga qué zulábinu laabe, sínuque zuni tratarnu laabe né respetu. Zándaruʼ chebe ca reunión ca ne zanda ugapadiuxi ca xpinni Cristu laabe ora chebe.dLaaca zanda guinábabe ca ancianu gacané laabe ti guibiguétabe ndaaniʼ congregación.
Peru ¿xi rizaaca pa cueecabe tuuxa de ndaaniʼ congregación, peru xheelabe ne ca xiiñibe nácarucaʼ testigu stiʼ Jehová yaʼ? Neca maʼ cadi juntu zuni adorárcabe Dios, peru familia ruʼ laacabe. Ne cumu ngueca yoo nga nabézacabe la? qué zuchaa modo runi tratarbe xheelabe ne ca xiiñibe, ne zúnicabe ni né cariñu.
Tuuxa ni maʼ biree de ndaaniʼ congregación zanda guinábabe chiganna ca ancianu laabe. Ca ancianu ca zaquiiñecabe Biblia para gacanécabe laabe né stale cariñu ne guendarannaxhii, zaguucabe gana laabe gaca arrepentirbe ne guibiguétabe gaxha de Dios (Zacarías 1:3). Pa gusaana de gúnibe ni cadi jneza ne quixhe íquebe chinándabe ca ley stiʼ Dios, zanda guibiguétabe ndaaniʼ congregación. Ca hermanu ca zácacaʼ nacha’hui’, zuni perdonarcaʼ laabe ne zaguixhedxicaʼ ladxidoʼbe, cásica bi’ni’ ca xpinni Cristu de Corinto dxi guca arrepentir xa hombre ni bichee que (2 Corintios 2:6-8).
¿Ximodo runi sentir ca ni maʼ biree de ndaaniʼ congregación ne yanna maʼ bibiguétacaʼ yaʼ?
Biiyaʼ xi guníʼ caadxi testigu stiʼ Jehová ni biree de ndaaniʼ congregación peru yanna maʼ gudixhe íquecaʼ guibiguétacaʼ ra nuu Dios.
«Dxi gudixheʼ iqueʼ guibiguetaʼ, guníʼ iqueʼ zanabadiidxaʼ ca ancianu naa xi bineʼ biaʼ tiempu bireeʼ de ndaaniʼ congregación. Peru qué ñácani zacá, ni gúdxicabe naa nga: “Racaláʼdxidu guiníʼ íqueluʼ lu ca ni chigúniluʼ yanna. Guizáʼ gudixhedxí ca diidxaʼ que ladxiduáʼ...” » (María, Estados Unidos).
«Ma’ cabeza congregación guibiguetaʼ. Bineʼ sentir nadxiicabe naa. Gucané ca hermanu que naa gudieeʼ cuenta maʼ bi’ni’ perdonar Jehová naa ne laaca maʼ bi’ni’ perdonar congregación naa ne guiníʼ iqueʼ lu ca ni chiguneʼ que. Laaca guyuu ca ancianu listu para quixhedxicaʼ ladxiduáʼ. Ne gucanécabe naa guibiguetaʼ gacaʼ xhamiguaʼ Jehová ne gudieeʼ cuenta nadxiirube ne rusisácabe naa» (Malcom, Sierra Leona).
«Riecheʼ guuyaʼ pabiáʼ nadxii Jehová xquidxi ne pur nga ruuyabe chuʼni nayá. Neca nuu tu riníʼ ique cadi jneza nga cueecabe tuuxa de ndaaniʼ congregación, peru rusihuínnini pabiáʼ nadxiicabe binni ca. ¡Guizáʼ rudieeʼ xquixe peʼ purtiʼ naca Bixhózenu ni nuu guibáʼ ti Dios ni rannaxhii ne ni runi perdonar!» (Sandi, Estados Unidos).
a Cadi para ca hombre si nga gucuá artículo riʼ, sínuque né para ca gunaa.
b Dxiqué gunidu raca expulsar ti binni ora runi ti pecadu grave ne qué na gaca arrepentir. Yanna maʼ riquiiñedu diidxaʼ ni zeeda lu Biblia ne maʼ rinidu maʼ guleecabe binni ca de ndaaniʼ congregación.
c Ca ancianu ca nácacaʼ binni ni maʼ biniisi lu stiidxaʼ Dios ne rusiidisícabe ni zeeda lu Biblia, rápacabe, racanécabe ne riguucabe gana ca ni nuu ndaaniʼ congregación. Ne qué riáxacabe pur dxiiñaʼ ni rúnicabe (1 Pedro 5:1-3).
d Peru, pa chuʼ tuuxa ni maʼ biree de ndaaniʼ congregación ne gacalaʼdxiʼ guniná o gucaa xcaadxi guni cosa malu la? rinándadu ni zeeda lu Biblia ne qué lica rugapadiúxidu binni ca (2 Juan 9-11).