Xiñee qué rié ca testigu stiʼ Jehová lu guerra
Laadu, ca testigu stiʼ Jehová, qué riuudu lu guerra pur ca razón riʼ:
Ti mandatu stiʼ Dios ni. Maca bizeeteʼ Biblia zuni ca xpinni Dios espada sticaʼ «cubu ni riuu ruaa aradu» ne maʼ qué zaziidicaʼ tíndecaʼ para checaʼ lu guerra (Isaías 2:4).
Ti mandatu stiʼ Jesús ni. Sicaríʼ gudxi Jesús apóstol Pedru: «Guluu espada stiuʼ jlugar, purti irá ni cuʼ ná espada la? zati né espada» (Mateo 26:52). Ora guníʼ Jesús ca diidxaʼ riʼ bisihuínnibe cadi naquiiñeʼ cuʼ náʼ ca xpínnibe guiibaʼ.
Laaca guníʼ Cristu cadi zinanda ca discípulo stiʼ binni guidxilayú. Nga runi, cadi naquiiñeʼ chúʼcabe lu política (Juan 17:16). Laaca cadi galán gucaalúcabe ca binni ni runi guerra ne cadi galán gucueezacabe xcaadxi de chuʼ lade ejércitu.
Naquiiñeʼ gannaxhii ca xpinni Cristu binni. Sicaríʼ gudxi Jesús ca discípulo stiʼ: «Chi tixhe caʼ xiixa nacubi guni tu, ganaxhii saa tu» (Juan 13:34, 35). Cani dxandíʼ xpinni Cristu zeeda gácacaʼ casi ti familia ni nuu lu guidubi Guidxilayú ne qué ziuu dxi uguu nacaʼ guiibaʼ para guutisaacaʼ laacaʼ (1 Juan 3:10-12).
Qué ñe ca primé xpinni Cristu lu guerra. Libru Encyclopedia of Religion and War na: «Qué ñe ca primé xpinni Cristu lu guerra ne qué ñúnicaʼ serviciu militar», purtiʼ nánnacaʼ «maʼ gadxé ni bisiidiʼ Jesús, laa bisiidiʼ gannaxhiicabe guiráʼ binni ne biʼniʼ mandar gánnaxhiicabe xhenemígucabe». Ne Edward Gibbon, ti historiador de Gran Bretaña, bicaa lu libru ni láʼ Historia de la decadencia y caída del Imperio romano: «Qué ninácabe ñácacabe soldadu [...] pacaa zusaanacabe de gúnicabe ni jma risaca para laacabe».
Racanedu guibani binni galán
Laadu, ca testigu stiʼ Jehová, binni runi dxiiñaʼ laadu ne qué rúnidu xiixa ni guniná binni xquídxidu. Dede runi respetardu ley riguixhe gobiernu purtiʼ zacá nga rusihuínnidu zinándadu ca mandatu zeeda lu Biblia riʼ.
«Naquiiñe uzuuba irá binni stiidxa cani runi mandar ndaani xquidxi.» (Romanos 13:1.)
«Laudii César sti César, ne laudii Dios sti Dios.» (Mateo 22:21.)
Nga runi, rúnidu ni na ley, riguíxedu impuestu ne racanedu gaca guiráʼ ni riguixhe gobiernu ti ganda guibani binni xquídxidu galán.