¿Ximodo nga ti ángel?
Ni rusiidiʼ Biblia
Ti ángel nga ti binni ni napa capacidad ne poder ni qué gapa ti binni guidxilayú (2 Pedro 2:11). Ná Biblia nuucabe guibáʼ, ti lugar jma luguiáʼ que universu ni ridúʼyanu, ra nuu ca espíritu (1 Reyes 8:27; Juan 6:38). Nga runi, nuu biaje laaca rábicabe laacaʼ espíritu (1 Reyes 22:21; Salmo 18:10).
¿Padé beeda ca ángel?
Dios bizáʼ ca ángel. Ne para bizaʼbe laacaʼ biquiiñebe Jesús, ni maca nuu «ante cha irá xixé ni nuu». Sicaríʼ rusiene Biblia dxiiñaʼ biʼniʼ Jesús: «Dxi bizáʼ be irá xixé ni nuu ibáʼ ne ni nuu guidxilayú la? Xiiñi be biʼni irá ni, casi ni rihuinni, zaqueca ni qué rihuinni», casi ca ángel (Colosenses 1:13-17). Qué richaganáʼ ca ángel ne qué rápacaʼ xiiñicaʼ; «xiiñiʼ Dios ni dxandíʼ» guiracaʼ (Job 1:6; Marcos 12:25). Tobi pur tobi bizáʼ Dios laacabe.
Maʼ raca stale iza de guyáʼ ca ángel, dede ante chaʼ planeta stinu. Ora bizáʼ Dios Guidxilayú, ca ángel riʼ «bizulú bisisácaca’ laabe ne ridxi nadipa’» (Job 38:4-7).
¿Panda ángel nuu?
Qué riníʼ diʼ Biblia panda ángel nuu, peru rusiene ni guizáʼ stálecabe. Guzéʼtenu ti ejemplu, biiyaʼ apóstol Juan ti visión ra rihuinni stale gayuaa millón de ángel (Apocalipsis 5:11).
¿Ñee napa ca ángel ca lacaʼ ne personalidad sticaʼ la?
Nápacaʼ. Biblia ruzeeteʼ lá chupa ángel: Miguel ne Gabriel (Daniel 12:1; Lucas 1:26).a Laaca guníʼ xcaadxi ángel nápacaʼ lacaʼ, peru qué ninacaʼ niniʼcaʼ ni (Génesis 32:29; Jueces 13:17, 18).
Cada ángel napa personalidad stiʼ ne randa riníʼ íquecaʼ. Laaca randa riniʼné ca ángel riʼ sti ángel casica laacaʼ ne rusisácacaʼ Jehová (Lucas 2:13, 14; 1 Corintios 13:1). Ne zanda gúnicabe cosa galán o cosa malu, casi bidúʼyanu biʼniʼ caadxi de laacabe dxi gulícabe gúnicabe cosa malu ne gúcacabe tobi si né Binidxabaʼ para gucaalúcabe Dios (Mateo 25:41; 2 Pedro 2:4).
¿Ñee nuu ángel ni jma napa autoridad que xcaadxi la?
Nuu. Ángel ni jma napa poder ne autoridad nga Miguel, arcángel que (Judas 9; Apocalipsis 12:7). Ca serafín nga ca ángel ni napa ti puestu jma risaca ne nuucaʼ guidubi buelta de trono stiʼ Jehová (Isaías 6:2, 6). Xcaadxi ángel ni napa puestu risaca nga ca querubín, laacaʼ rúnicaʼ caadxi dxiiñaʼ risaca. Guzéʼtenu ti ejemplu de ti dxiiñaʼ bíʼnicabe: gúpacabe entrada stiʼ jardín de Edén dxi gulee Dios Adán ne Eva de raqué (Génesis 3:23, 24).
¿Ñee zanda gacanécabe laanu la?
Zanda. Dios riquiiñeʼ ca ángel stiʼ para gacané binni. Guidúʼyanu ximodo:
Riquiiñeʼ Dios ca ángel stiʼ para guni dirigir ca xpinni ni nuu lu Guidxilayú ti ganda guni predicar ca binni riʼ ca noticia nacubi stiʼ Reinu (Apocalipsis 14:6, 7). Cásica cani runi predicar ne cani rucaadiaga ca noticia riʼ ribeenducaʼ ni galán pur modo cayacané ca ángel riʼ binni (Hechos 8:26, 27).
Racané ca ángel riʼ ca congregación para cadi chuʼ binni qué iquiiñeʼ guni biidiʼ cani (Mateo 13:49).
Runi guiar ca ángel ne rápacaʼ ca binni ni naca leal né Dios (Salmo 34:7; 91:10, 11; Hebreos 1:7, 14).
Maʼ cadi candaa zacané ca ángel riʼ Jesús para cueecabe guendaquéiquiiñeʼ ne guiráʼ yuubaʼ nuu lu Guidxilayú riʼ (2 Tesalonicenses 1:6-8).
¿Ñee napa cada tobi de laanu ti ángel ni rapa laa la?
Racané ca ángel para chuʼ ca xpinni Dios galán en sentidu espiritual, peru qué riníʼ diʼ nga runi asignar Dios laacabe para gápacabe o guni defendércabe cada xpinni Cristu (Mateo 18:10).b Qué rulá diʼ ca ángel cada tobi de ca xpinni Dios de guiráʼ guendanagana nin de ca trampa stiʼ Binidxabaʼ. Biblia rusiidiʼ zanda gacané Dios binni ra gudii laacabe guendabiaaniʼ ne stipa para guni huantárcabe (1 Corintios 10:12, 13; Santiago 1:2-5).
Ni cadi jneza riníʼ íquecabe de ca ángel
Ni runi cré binni: Nachaʼhuiʼ guiráʼ ca ángel.
Ni dxandíʼ: Biblia riníʼ de «ca espíritu ni runi mandar ndaani guidxilayú cahui riʼ» ne de «ca ángel ni bichee» (Efesios 6:12; 2 Pedro 2:4). Laacabe nga ca demonio, ca ángel qué iquiiñeʼ ni guyuu pur Binidxabaʼ ne bidxiidéchecaʼ Dios.
Ni runi cré binni: Qué rati ca ángel.
Ni dxandíʼ: Ca ángel qué iquiiñeʼ, ne Binidxabaʼ la? zanitilucaʼ (Judas 6).
Ni runi cré binni: Ora rati tuuxa binni, reeda gaca ti ángel.
Ni dxandíʼ: Ca ángel ca la? cadi binni diʼ ni biasa de lade gueʼtuʼ laacabe. Sti clase binni laacabe (Colosenses 1:16). Cani guiasa de lade gueʼtuʼ ne cheʼ guibáʼ la? maʼ qué ziuu dxi gáticaʼ (1 Corintios 15:53, 54). Ne laaca zacaacaʼ ti puestu ni jma risaca que ca ángel (1 Corintios 6:3).
Ni runi cré binni: Guyáʼ ca ángel para gúnicaʼ ni ná binni guidxilayú.
Ni dxandíʼ: Rinanda ca ángel instrucción stiʼ Dios, ne cadi stinu (Salmo 103:20, 21). Jesús peʼ gunna naquiiñeʼ guinabaʼ gacané Dios laa ne cadi ca ángel (Mateo 26:53).
Ni runi cré binni: Zanda guni orarnu ca ángel.
Ni dxandíʼ: Ora runi orarnu, cayuni adorarnu Dios, ne Dios si nga naquiiñeʼ guni adorarnu (Apocalipsis 19:10). Ora guni orarnu Dios, naquiiñeʼ gúninu ni de lu lá Jesús (Juan 14:6).
a Nuu Biblia riquiiñeʼ diidxaʼ Lucifer lu Isaías 14:12, ne stale tu riníʼ ique zacá láʼ ángel ni beeda gaca Binidxabaʼ, o Diablo. Peru diidxaʼ ni biquiiñecabe lu diidxaʼ hebreu riníʼ ni «resplandeciente», o tuuxa ni ruzaaniʼ. Contextu stiʼ ni rusihuinni qué niquiiñeʼ diidxaʼ riʼ para guiníʼcabe de Binidxabaʼ, sínuque de familia stiʼ ca rey de Babilonia, ni chigusabanáʼ Dios purtiʼ nabé ruchacaʼ bi yánnicaʼ (Isaías 14:4, 13-20). Diidxaʼ «resplandeciente» ca riquiiñeʼ ni para guni búrlacabe Babilonia purtiʼ maʼ qué gapa binni gaca rey.
b Nuu tu huaníʼ ique gupa Pedru ti ángel ni rapa laa, purtiʼ nuu ti relatu ni caníʼ gulee ti ángel laabe ndaaniʼ cárcel (Hechos 12:6-16). Ora yeguuya Pedro ca discípulo que, laacaʼ guniʼcaʼ beeda «ángel stibe». Zándaca guníʼcabe zacá purtiʼ para laacabe ti ángel ngue beeda casi mensajeru stiʼ apóstol Pedro, peru cadi jneza diʼ ngue modo caníʼ íquecabe.