2 Corintios 12:9 | «Nuaaʼ para gacaniaʼ lii, ne nga si caquiiñelu’»

«Ma’ guca’ nacha’hui’ né lii, ne ngasi nga caquiiñelu’, purti’ rihuinni pabiá’ nadipa’ poder stinne’ ora huaxié’ stipa nápalu’» (2 Corintios 12:9, Traducción del Nuevo Mundo).

«Nuaa para acaniá lii, ne nga si caquiiñu’. Purti jma rihuinni enda nandxó’ stinne ora cayaadxa stipa lii» (2 Corintios 12:9, Stiidxa Dios Didxazá).

Significadu sti’ 2 Corintios 12:9

Bi’ni’ prometer Dios apóstol Pablo zudii stipa laabe para ganda gudxiilube guendanagana gápabe ne gúnibe ca ni riní’ íquebe qué zanda gúnibe.

«Ma’ guca’ nacha’hui’ ne lii, ne ngasi nga caquiiñelu’». Ne ca diidxa’ ri’ bicabi Dios guirá’ ca oración ni bi’ni’ Pablo laa, ne laaca zanda gaca traducir ni casi «guendanacha’hui’ stinne’ nga si nga ni caquiiñelu’», laaca zanda guininu ni sicarí’: guendanacha’hui’ sti’ Dios si zanda gacané Pablo gudxiilú ca guendanagana guidxaagalú. Diidxa’ guca traducir «ma’ guca’ nacha’hui’ ne lii» o nuaa’ para gacaniá’ lii rini’ni de ti regalu rudii Dios pur guendanacha’hui’ sti’ guirá’ binni neca qué runi merecerca’ ni. Lu ca carta bicaa Pablo rusihuinni cani ximodo guleendube ni galán pur guca Dios nacha’hui’ né laabe. Neca guzananda Pablo ca xpinni Cristu bidii Dios stipa laabe ni caquiiñebe para guchaabe ne gacanebe xcaadxi binni gaca xpinni Cristu. (1 Corintios 15:9, 10; 1 Timoteo 1:12-14). Nga runi, gunna dxichi Pablo zanda gacané Dios laa para gudxiilú intiica guendanagana gapa.

«Purti’ rihuinni pabiá’ nadipa’ poder stinne’ ora huaxié’ stipa nápalu’». Bisietenala’dxi’ Jehováa Pablo jma rihuinni poder stibe ora riquiiñebe ni para gacanebe binni guidxilayú (2 Corintios 4:7; 12:8). Ora ti xpinni Cristu nanna nuu ni qué zanda guni ne guinaba’ Jehová gacané laa la? cudiibe lugar gudii poder sti’ Dios stipa laabe ra caquiiñebe ni (Efesios 3:16; Filipenses 4:13). Zacá nga rihuinni modo racané poder sti’ Dios binni ra caquiiñe’ ni.

Contextu sti’ 2 Corintios 12:9

Bia’ lu iza 55 despué de ca dxi sti’ Jesús, gudxi Dios Pablo gucaa ti carta ra nuu ca xpinni Cristu de Corinto. Purti’ raqué nuu caadxi hombre ni naca’ nácaca’ maestru ne riní’cabe mal de laabe, zándaca pur modo rihuínnibe o pur modo rusiidibe. Ngue runi, ra ma’ zilúxebe carta stibe bi’ni’ sentirbe caquiiñe’ guni defenderbe autoridad ni nápabe casi apóstol (2 Corintios 10:7-10; 11:5, 6, 13; 12:11).

Ra guca defender Pablo bisiénebe qué ñanda di’ ñúnibe xhiiña’ Dios ne qué ñanda ñuni huantarbe ca prueba bidxaagalube pur stipa si stibe (2 Corintios 6:4; 11:23-27; 12:12). Lu capítulo 12 ca, cani’be casi ñaca ñápabe «ti guichi lu beela» ládibe, zándaca gúcani ti yuuba’ gúpabe lu xcuérpube o lu xquendabiaanibe ni qué ñanda ñacachaahui’ (2 Corintios 12:7). Neca qué niní’ Pablo xii nga guendanagana gupa la? guni’be zanda guni huantarbe ni, purti’ zacané Dios laabe.

Ca dxi stinu ri’, ca xpinni Cristu laaca ridxaagaluca’ guendanagana ne rizananda binni laaca’, peru ratadxí ladxidó’cabe gánnacabe né poder sti’ Dios, zanda gudxiilucabe intiica cosa. Cásica Pablo zanda guiní’cabe né confianza: «Ora qué gapa’ stipa, óraque nga jma napa’ poder» (2 Corintios 12:10).

Para gánnalu’ xidé caní’ Guiropa Carta para ca Corintio, biiya’ videu ri’.