Isaías 26:3 | «Zudiiluʼ paz ni qué rirá ca ni zuhuaa dxiichiʼ nezaluluʼ»

«Zápaluʼ ca ni napa stale confianza lii; qué ziuu dxi gusaana de gudiiluʼ laacabe paz purtiʼ nápacabe confianza lii» (Isaías 26:3, Traducción del Nuevo Mundo).

«Zudiilu’ paz ni qué rirá ca ni zuhuaa dxiichi’ nezalulu’, purti’ nápaca’ confianza lii» (Isaías 26:3, La Biblia de las Américas).

Significadu sti’ Isaías 26:3

Biquiiñe’ profeta Isaías ca diidxa’ ni riguixhedxí ladxido’no ri’ para gusihuínnibe rapa Jehová ca ni rapa confianza laa. ¿Ximodo rúnibe ni ya’? Racanebe laacaʼ guni sentircaʼ seguru ne gápacaʼ paz.

«Zápaluʼ cani napa confianza lii siouʼ». Ndaa de versículo riʼ cusiene de ca binni ni maʼ gudixhe ique gapa confianza Jehová guiráʼ ora.a Ca ni napa confianza Jehová nánnacaʼ caquiiñecaʼ de laabe. Casi pa chicaacabe ti decisión nabé risaca la? qué rápacabe confianza né ni riníʼ iquesícabe, sínuque ruuyacabe xi riníʼ ique Dios de ni laani (Proverbios 3:5, 6). Para gánnacabe ximodo ruuyaʼ Dios xiixa cosa la? ruundaʼ chaahuicabe Stiidxabe, Biblia, ne riníʼ ique chaahuicabe ni ruundacabe (Salmo 1:2; 119:15). Ne ora ridiʼdiʼcabe lu xiixa guendanagana ruyúbicabe Jehová ne runi orárcabe laa de guidubi ladxidóʼcabe para gacané laacabe (Salmo 37:5; 55:22). Zacá rusihuínnicabe nápacabe confianza Dios ne laa rudii paz laacabe.

«Qué ziuu dxi gusaana de gudiiluʼ paz». Lu textu hebreu ni gucuá Biblia dxiqué, chupa biaje riete diidxaʼ paz luni. Ne gucuá ni zacá para gudiini énfasis. Para gudiini ngueca idea la? guca traducir diidxa’ ca casi «qué ziuu dxi gusaana de gudiiluʼ paz», «paz ni qué rirá» o «paz completu». Nga riní’, ca ni napa confianza Jehová la? ratadxí ladxido’ca’ ne qué runi sentircaʼ zacá purtiʼ si galán modo nabánicaʼ (Salmo 112:7; 119:165). Sínuque runi sentírcabe zacá purti’ guizá’ xhamígucabe Jehová ne rúnicabe ca cosa ca modo riuula’dxi’ (Proverbios 3:32; Isaías 48:18).

Cadi purti’ qué rusaana de gapa ca xpinni Dios paz ri’, riní’ nga rulabe laaca’ de guirá’ guendanagana gápaca’ o que ziuu dxi gápaca’ ansiedad (1 Samuel 1:6, 7; Job 6:1, 2; Salmo 31:9). Sínuque ni rúnibe nga racanebe laaca’ gudxiiluca’ ca guendanagana gápaca’ (Isaías 41:10, 13). Ricábibe oración stica’ ra rudiibe laaca’ guendanuuxpiaani’, stipa ne riguixhedxibe ladxido’ca’ (Salmo 94:19; Proverbios 2:6; Isaías 40:29). Ngue runi neca cadíʼdicabe ra jma nagana qué raca lúgucabe (Filipenses 4:6, 7).

Contextu stiʼ Isaías 26:3

Bibani profeta Isaías lu siglu xhono ante de ca dxi stiʼ Jesús. Tiempu que, stale de ca ni guyuu lu reinu sti’ Judá ma’ qué ñúnica’ ni ná Dios de guidubi ladxido’ca’. Cumu qué nuchaacabe la? lu iza 607, bidii Jehová lugar guinitilú Jerusalén, lugar ra nuu pe’ reinu que.

Peru ti gayuaa iza ante guinitilú Jerusalén bicaa Profeta Isaías ti canción para gusisaca Jehová, zeeda ni lu capítulo 26 (Isaías 26:1-6). Canción que ná ziuu ti guidxi sti’ Judá ni zacachaahui’ despué, ne laani nga Jerusalén.

Bizulú guca chaahuiʼ Jerusalén lu iza 537 ante de ca dxi sti’ Jesús. Biluxe guca chaahuiʼ si guidxi que, bi’ni’ sentir ca judíu ni biguetaʼ raqué seguru ne guni’ca’ ma’ nápaca’ ti guidxi nadipaʼ (Isaías 26:1). Peru cadi ca muralla naro’ba’ ni napa guidxi que nga runi laa nadipa’. Sínuque ni racané guidxi que guni sentir nuu nadipa’ ne seguru nga rapa Jehová ne riguu ndaayaʼ laacabe (Isaías 26:2).

Ngaca nga rizaaca ca dxi ri’. Ca ni napa confianza Jehová runi sentirca’ seguru, purti’ naca Jehová ti Guié para laacabe, ti lugar ra zanda gucaachilúcabe (Isaías 26:4).

Para gannalu’ xidé caní’ guidubi libru sti’ Isaías la? biiya’ videu ri’.