Modo guca traducir programa stiʼ asamblea regional 2020 ni láʼ «¡Siempre lachuu nayecheʼ!»

Ndiʼ nga primé biaje biʼyaʼ ca testigu stiʼ Jehová ni nuu lu guidubi naca Guidxilayú grabación stiʼ asamblea regional 2020, juntu biiyacabe ni lu beeu julio ne agosto. Para gunda guca ndiʼ gupa xidé guca traducir asamblea riʼ lu jma de 500 idioma. Para gaca traducir ti asamblea rindaa ni ti iza o jma. Peru pur pandemia stiʼ coronavirus, gupa ca traductor biaʼ tapa beeu para biʼniʼ traducircaʼ asamblea regional 2020 ni láʼ «¡Siempre lachuu nayecheʼ!».

Gucané Departamento Mundial de Compras ne departamento de Servicios de Traducción ni nuu ra central mundial stiʼ ca testigu stiʼ Jehová para gunda guca dxiiñaʼ naroʼbaʼ riʼ. Bidii Servicios de Traducción cuenta caquiiñeʼ ca equipu ni runi traducir jma herramienta para ganda gúnicaʼ dxiiñaʼ riʼ, ne tobi de laacani nga micrófono para guni grabarcaʼ. Ne guzíʼ Departamento Mundial de Compras 1,000 micrófono ne biseendaʼ ni biaʼ 200 lugar.

Para ganda gaca ahorrar bueltu guzíʼcabe maca stale micrófono, yendá guirani ti lugar si ne de racá biseendacabe ca ni ra nuu ca hermanu ni nuu lu guidubi naca Guidxilayú. Cumu maca stale micrófono bixuíʼ la? biaʼ 170 dólar bisaca cada micrófono ne qué niguíxhecabe zaca guyé ca ni. Zacá biʼniʼ ahorrarcabe jma de 20 % de bueltu.

Departamento Mundial de Compras guzíʼ ne biseendaʼ ca herramienta riʼ lu beeu abril ne mayo de 2020, tiempu pandemia dxi huaxiéʼ tienda nuxhaleʼ para gutoo. Peru ra maʼ ziluxe beeu mayo, stale de ca oficina de traducción, sucursal ne xcaadxi lugar ra raca traducir maʼ nápacaʼ ca herramienta ni caquiiñecaʼ.

Jay Swinney, hermanu ni ruuyaʼ modo raca dxiiñaʼ ra Departamento Mundial de Compras, guníʼ: «Dede dxi bizulú proyectu riʼ, galán modo runi ca departamentu ni nuu Betel dxiiñaʼ ne ca binni ni rutoo. Espíritu stiʼ Jehová nga cayacané para gapa ca hermanu ni caquiiñecaʼ nagueenda ne guireeni baratu».

Sicaríʼ guníʼ Nicholas Ahladis ti hermanu ni runi dxiiñaʼ lu departamentu de Servicios de Traducción: «Ca traductor ni qué ganda guiree pur pandemia, guizáʼ biéchecaʼ ora gucuaacaʼ ca herramienta riʼ. Neca nuucabe zitu de xcaadxi traductor gunda gucanécabe para guca traducir ne guca grabar discursu, videu ne canción lu jma de 500 idioma».

Ni bizéʼtenu riʼ nga tobi de ca cosa ni guca para gunda gupa guiráʼ hermanu asamblea regional 2020 ni láʼ «¡Siempre lachuu nayecheʼ!». Gunda bixuíʼ ca herramienta riʼ pur ca donación ni bíʼnitu lu sitiu donate.jw.org ne xcaadxi modo bíʼnitu ni.