Runi defenderdu derechu ni napa binni ni riníʼ sti diidxaʼ para guni adorarcaʼ Dios

Ndaaniʼ ca guidxi ni nuu Latinoamérica, nuu millón de binni ni nabeza ndaaniʼ guidxihuiiniʼ ra riníʼcabe gadxé gadxé idioma ne nápacaʼ gadxé gadxé costumbre. Ndaaniʼ ca guidxihuiiniʼ ca nabeza stale de ca hermanu stidu. Para gacanedu ca binni ca guiziidicaʼ de lu Biblia, laadu ca testigu stiʼ Jehová runi traducirdu ne riguíʼzidu publicación ni biree lu Biblia lu jma de 130 idioma ni nuu Latinoamérica.a Neca riuulaʼdxiʼ ca hermanu riʼ cultura sticaʼ, peru ridxaagalucaʼ guendanagana purtiʼ rúnicaʼ ni ná Jehová ne qué rinacaʼ chinándacaʼ ca costumbre ni cadi zeeda lu Biblia. ¿Ximodo riquiiñedu ca donación para gacanedu laacabe yaʼ?

Gucanedu laacabe guibiguétacabe ra lídxicabe

Ndaaniʼ ti guidxihuiiniʼ ra riníʼcabe huichol lade ca dani stiʼ Jalisco (México), qué niná ca hermanu ñuni participarcaʼ lu caadxi costumbre ni cadi zeeda lu Biblia ni runi religión stiʼ guidxihuiiniʼ que.b Cumu guizáʼ bidxiichi caadxi binni de guidxihuiiniʼ que la? ngue runi 4 de diciembre iza 2017, bicaalú ca binni que caadxi Testigu né xcaadxi binni ni qué niná ñuni participar lu ca costumbre que. Guladxi ca binni riʼ laacabe de ndaaniʼ guidxi que, bixuuxecaʼ ca cosa stícabe ne guniʼcaʼ zuuticaʼ tu gacalaʼdxiʼ guibiguetaʼ.

Gucané ca Testigu ni nabeza ndaaniʼ ca guidxi ni nuu gaxha ca hermanu que. Yanna, ¿ximodo guni ca hermanu que para guibiguétacaʼ ra lídxicaʼ yaʼ? Agustín, tobi de ca hermanu que guníʼ: «Qué gápadu bueltu para quíxedu ti abogadu ne laaca qué gánnadu tu ra nuu chuudu para gacané laadu».

Cumu cadi cayaca respetar derechu napa ca hermanu que para guni adorarcaʼ Dios la? nagueendaca biʼniʼ sucursal de Centroamérica xiixa para gacané laadu. Primé la? gunábacabe ca autoridad stiʼ guidxi que gúʼyacaʼ xi guiráʼ bizaaca. Despué, biʼniʼ aprobar Comité de Coordinadores stiʼ Grupu ni Zániru stiʼ ca Testigu stiʼ Jehová guniné sucursal de Centroamérica dxiiñaʼ Departamento de Asuntos Legales ni nuu ra central mundial. Ne cuʼcaʼ ti demanda nezalú autoridad para gacanecaʼ ca hermanu huichol. Gudiʼdiʼ si tiempu yendá casu riʼ ra nuu Suprema Corte de Justicia de la Nación, tribunal ni jma napa autoridad México.

Ti grupu de abogadu de stale guidxi biʼniʼ prepararcaʼ ti discursu ra cusiénecaʼ, cásica runi respetar binni cultura stiʼ ca guidxihuiiniʼ ni riníʼ sti diidxaʼ, zaqueca naquiiñeʼ guni respetar ca guidxihuiiniʼ riʼ derechu ni napa cada binni ni nabeza ndaaniʼ ca ni. Ra tiica si naquiiñeʼ gaca respetar derechu ni napa binni de cuiʼ xi guni.

Ne 8 de julio iza 2020, guiráʼ ca ni nuu lu Suprema Corte de Justicia guyuucaʼ pur ca testigu stiʼ Jehová ne bidiicaʼ ti orden guibiguetaʼ ca hermanu riʼ ndaaniʼ xquídxicaʼ. Agustín, hermanu ni bizéʼtenu que, guníʼ xi biʼniʼ sentir guiráʼ hermanu que: «Guizáʼ cayéchedu pur guiráʼ ni biʼniʼ ca hermanu que pur laadu. ¡Nanna xi nizaacadu pa qué ñacanécabe laadu yaʼ!».

«Stale pur caadxi si binni»

Ndaaniʼ guidxi Ecuador zacaca bizaaca ca hermanu de San Juan de Ilumán, ti guidxi ni nuu lade dani de Otavalo ra nuu stale guidxi ra riníʼcabe sti idioma. Lu iza 2014, despué de gucuaacabe permisu bizulú bicuícabe ti Yoo stiʼ Reinu. Peru bicaalisaa ti sacerdote biaʼ ti gayuaa binni ne bicaabe laacaʼ gucueezacaʼ dxiiñaʼ ni cayuni ca hermanu que. Ne laaca bicueeza guidxi que ca Testigu para cadi gápacaʼ reunión sticaʼ.

Departamento de Asuntos Legales stiʼ sucursal ni nuu Ecuador ne ni nuu ra central mundial bíʼnicaʼ dxiiñaʼ para guni defendercaʼ libertad ni napa ca hermanu riʼ para guidagulisaacaʼ ne guni adorarcaʼ Dios. Yendá casu que ra nuu ca tribunal stiʼ guidxi, ngue runi maʼ qué nucueeza ca binni de guidxi que ca hermanu para guiluxe gucuicaʼ Yoo stiʼ Reinu ne guidagulisaacaʼ sti biaje. Peru para gaca respetar derechu ni napa ca hermanu despué la? gunabaʼ ca abogadu stidu ca tribunal ni jma napa autoridad para guicábicaʼ pregunta riʼ: ¿naquiiñeʼ guni respetar ca guidxihuiiniʼ ca derechu ni napa guiráʼ binni la?

Ne 16 de julio iza 2020, Corte Constitucional ni nuu Ecuador, tribunal ni jma napa autoridad ndaaniʼ guidxi ca, biʼniʼ atender casu riʼ. Ca ni biʼniʼ representar congregación nezalú tribunal que nga caadxi hermanu de Ecuador ni naca abogadu. Laaca gucané tapa hermanu laacabe ni naca abogadu ne guizáʼ nanna de ca tipu guendanagana riʼ. Pur pandemia stiʼ COVID-19, guca reunión riʼ gadxé gadxé guidxi pur videollamada. Ndiʼ nga primé biaje gudii ti tribunal lugar gudii ti equipu legal stiʼ ca testigu stiʼ Jehová guni presentar casu stiʼ pur videollamada.c Bizeeteʼ ca abogadu que lu ca autoridad de xcaadxi guidxi, qué runiti binni ca derechu stiʼ purtiʼ si naca de ti guidxihuiiniʼ ra riníʼ binni sti idioma.

Hasta nagasi la? cabeza ca hermanu ni nabeza lade dani de Otavalo decisión ni guicaa Corte Constitucional ne guizáʼ cudiicaʼ xquixe peʼ pur cayacané xcaadxi hermanu laacaʼ. César, ti ancianu stiʼ congregación Ilumán Quichua, guníʼ sicaríʼ: «Jehová si zanda iquiiñeʼ organización stiʼ para guni stale pur caadxi si binni».

Guiráʼ ca abogadu ni biʼniʼ representar ne gucané ca hermanu stinu riʼ, nácacaʼ testigu stiʼ Jehová ne qué nuquíxecaʼ pur dxiiñaʼ bíʼnicaʼ. Peru biquiiñeʼ tiempu ne bueltu para gunda guca preparárcabe ne biʼniʼ defendércabe ca hermanu ca. Yené ca abogadu stidu ne xcaadxi hermanu jma de 380 hora para guni prepararcaʼ casu ni guca México ne 240 hora para guni traducircaʼ ca documentu que. Ne ni bizaaca Ecuador que la? biaʼ 40 abogadu de xcaadxi guidxi biquiiñecaʼ stale hora para biʼniʼ prepararcaʼ casu que. ¿Paraa riree bueltu ni riquiiñeʼ para guni defenderdu ca hermanu stidu yaʼ? Riree ca ni lu ca donación ni rudiitu lu ca modo rácani lu donate.jw.org. Xquixe peʼ laatu pur ca donación stitu.