Rudi’du mantenimientu ca Yoo sti’ Reinu stidu ti chú’cani galán

«¡Guizá’ riuuladxe’ Salón stinne’!». Zacá guníʼ Nicole, ti hermana joven de Colombia. ¿Xiñee nabé riuulá’dxibe Salón stibe yaʼ? Laabe guni’be: «Purtiʼ racá nga nuu ca hermanu ni zeeda gaca casi familia stinne’». ¿Ñee runi sentirluʼ cásica Nicole la?

Lu guidubi Guidxilayú, laadu ca testigu stiʼ Jehová, raca reunirdu ndaani’ 63,000 Yoo stiʼ Reinu. Cadi naca si cani ti lugar galán ra runi adorardu Dios. Sicarí’ guníʼ David, ti precursor regular de Colombia: «Racané ca Yoo stiʼ Reinu ca chuula’dxi’ binni mensaje stinu. Ne ora reeda gánnaca’ laadu ridxagayaaca’ ora gú’yaca’ pabiá’ rápadu cani». Ne dxandí’ ni riní’cabe ca purti’ guizá’ rúnidu stipa para gusiadu ne gudi’du mantenimientu ca Yoo stiʼ Reinu stidu. ¿Ximodo rúnidu ni ya’?

Ximodo riguixhe chaahuidu ca dxiiñaʼ de mantenimientu ni caquiiñe’ gaca

Cada congregación nga rudii mantenimientu Yoo stiʼ Reinu stiʼ. Nga runi, gatigá rusiá ca hermanu ne rudiica’ mantenimientu ni ra guni chaahuica’ xiixa cosa nahuiini’ ni caquiiñeʼ gaca chaahui’.

Racané Departamento Local de Diseño y Construcción (LDC) ca congregación ca, ¿ximodo rúnicabe ni ya’? Ribícabe hermanu para gaca capacitador de mantenimientu. Cada tobi de laacabe runi tender biaʼ xhoopaʼ o hasta chii salón. Rigánnacabe ne runi capacitárcabe ca publicador para gánnaca’ ximodo gapa chaahuica’ salón stica’. Cada chonna iza, ruuyacabe ximodo nuu salón ca ne rábicabe ca hermanu paraa caquiiñe’ gaca chaahui’ ti gácani ti lugar seguru.

Nabé rudii ca hermanu ne ca hermana xquixe peʼ pur capacitación ni ricaaca’. Sicarí’ guníʼ Indhumathi, ti hermana de la India: «Guizá’ sicarú guirá’ ni bisiidicabe laadu. Ne ti privilegiu nga guizí’didu ximodo gapa chaahuidu Yoo stiʼ Reinu stidu». Sicarí’ guníʼ Evans, ti hermanu de Kenia: «Bidú’yadu pabiá’ risaca nga guni chaahuidu ti cosa nahuiiniʼ ni caquiiñe’ gaca chaahui’ ante gácani jma naro’ba’, ne zacá qué zunítidu stale bueltu».

Ximodo riaxa ca gastu ni raca

Para ganda iquiiñe’ ne gaca mantener ti Yoo stiʼ Reinu lu ti iza, runi gastu ca hermanu ca gayuaa o hasta mil de dólar,a según guidxi nuu salón ca, tiempu de zúbani ne panda congregación riquiiñe’ ni. ¿Ximodo riaxa ca gastu ri ya’?

Riaxa guirá’ ca gastu ca né ca donación ni rudi’du. Sicarí’ guníʼ ti hermanu de Kazajistán ni lá’ Alexander: «Riquiiñe’ ti ndaa de ca donación ca para guiaxa internet, nisa ne biaani’. Ne sti ndaa ca riquiiñe’ ni para guixuí’ xcaadxi cosa ni caquiiñe’, casi gui’chi’ para guchaa nácabe, guante ne ca cosa ni riquiiñe’ para guiané salón ca». Ne ni riaana de ca donación ca, rié ni para obra mundial ti gacanenu ca proyectu de mantenimientu jma naro’ba’ ne jma caru ni cayaca lu guidubi Guidxilayú.

Ca proyectu de mantenimientu jma naro’ba’

Nuu biaje, jma stale bueltu caquiiñeʼ para ti proyectu de mantenimientu stiʼ ti Yoo stiʼ Reinu que bia’ ñúnini gastu lu chupa chonna beeu de caquiiñe’ ni. Ora chigaca ca dxiiñaʼ ri’, rini’né ca ancianu capacitador de mantenimientu stiʼ LDC. Pa guiní’ LDC zanda gaca dxiiña ri’, stale biaje, bueltu ni nuu lu obra mundial nga riquiiñecabe para gúnicabe ni. Lu iza de serviciu 2023, guca 8,793 proyectu de ni caninu ri’, bia’si guca gastu 76 millón 600 mil dólar. Guzé’tenu chupa de ca proyectu ri’.

Ndaani’ guidxi Angola, nuu ti Yoo stiʼ Reinu ni gurí ma’ raca 15 iza ne nápani stale ra ma’ caquiiñeʼ gaca chaahui’. Ma’ caquiiñeʼ guidxaa ca cable biaani’ stini ne ma’ cá bi ca pader que. Ne laaca guca quejar ca vecinu que pur nisaguié ni riete de ra salón que, purtiʼ rieni neza ra lídxicabe. Nga runi, bizulú LDC ti proyectu para ganda gaca chaahui’ ca cosa que, bia’si guca gastu 9,285 dólar. Guizá’ bidxagayaa ca vecinu que pur modo guca ca dxiiña’ que ne bidiica’ xquixe peʼ ca hermanu.

Ndaani’ guidxi Polonia, nuu ti Yoo stiʼ Reinu ni ridxuuni’ ique, ne ma’ guca feu alfombra stini. Biʼniʼ aprobar LDC ti proyectu para gaca chaahui’ ne gaca impermeabilizar íqueni, ne para guidxaa alfombra que. Bia’si guca gastu 9,757 dólar. Pur ca dxiiña’ ni guca ri’, ma’ qué zaquiiñe’ salón ri’ mantenimientu naro’ba’ lu chupa chonna iza.

Rusisaca ca dxiiña’ de mantenimientu ca Jehová

Ora ricaa ca Yoo stiʼ Reinu ca mantenimientu qué raca ahorrar si bueltu stiʼ ca donación ca, sínuque laaca rusisácani Jehová. Sicarí’ guní’ ti hermanu de archipiélago de Tonga ni lá’ Shaun: «Randa rusisácadu Jehová ndaani’ ti salón nayá, ni nexhe’ chaahui’ ne galán pur ca dxiiñaʼ de mantenimientu ni raca. Ne pur laani, riní’cabe galán de Jehová ndaani’ xquídxidu. Nabé riuulá’dxidu guni invitardu binni gueeda ndaani’ Yoo stiʼ Reinu stidu».

Lii laaca zanda gacaneluʼ

Guiranu zanda gacanenu para guiá ne gudi’nu mantenimientu ca lugar ra runi adorarnu Dios. Sicarí’ guníʼ Marino, ti capacitador de mantenimientu de Australia: «Ti privilegiu para laanu nga gápanu Yoo stiʼ Reinu stinu, ne guiranu nga zanda gacanenu. Pa gúninu ni, zacanenu gaca ahorrar stale bueltu, ti ganda iquiiñe’ bueltu ca ra dxandí’ peʼ caquiiñe’ ni».

Sicarí’ guní’ Joel, ti hermanu de la India ni nabé riuula’dxi’ gacané lu mantenimientu stiʼ Yoo stiʼ Reinu: «Ora racaniá’ ca hermanu, racané ni naa guxui’luá ximodo nga chigúnidu dxiiña’ ndaani’ guidxilayú cubi ca». Sicarí’ guní’ Nicole, hermana joven ni maca bizé’tenu que: «Cadi tan xadxí, biʼniʼ chaahui’ ca hermanu ra cadxuuni’ ique bañu stiʼ salón stidu, ne naa guca caber gucuiidxe’ lu pisu que. Ni dxandí’ nga cadi naa bine’ chaahue’ ni, peru gucaniá’ para cadi gaca ti accidente».

Pa racalá’dxiluʼ gacaneluʼ lu mantenimientu stiʼ Yoo stiʼ Reinu stiluʼ la? guni’né ca ancianu de congregación stiluʼ. Cadi guiaanda’ lii, cadi para guiaapa si salón stiluʼ nga ca donación ni rudiiluʼ, sínuque para guirá’ ca salón ni nuu lu guidubi Guidxilayú. Zanda gusábaluʼ ca donación stiluʼ ndaani’ ca cajahuiini’ ni nuu ndaani’ salón stiluʼ o laaca zanda gúniluʼ ni lu donate.jw.org. Xquixe peʼ lii pur ca ni rudiiluʼ.